هویر جاران

ماڵه‌یلْ بۊچگ..

دڵه‌یلْ گەورا..

بانێ تیر چوو..

دیوارێ گڵین، دڵه‌یلێ گوڵین،

دەروەچەیل بۊچگ، دیمەنەیل گەورا،

 تاقچەو ڕەفەدار، سەرتاقێگ ڕەنگین...

وێنەی جەوانییەیل باوگ له بانێ.. 

"ڕووڵه‌گەم باوگد گەورای ماڵه"

دەسەی گەنم زەرد و تڵای ناوقەی پێچیای، له ناو لیوان کۊزەیێگ بریقەی هات... 

"ڕووڵه‌گەم یه ڕزق و ڕووزی ماڵ فەرەوا کەێ"

ئەسپه‌ن ڕازاوەی چوار سۊکێگ، له ڕەنگ و گوڵەنگەیل دڵڕفن کوژەک له قەی، چوو تاۊ له قەی، بۊده دارا لە قەی دیوار...

"ڕووڵه‌گەم یه بماره‌که ، چەو بەد کوور کەێ"

وە ڕاس من هێمان دڵم گیروودەی ماڵه‌یل زۊنەس...

چای داڵگم دایەم دەمۊ، گوڵ وە دەمۊ..

 له ناو قووڕی گوڵ له قەیێگ، له بان° سماوەرێگ ک دایەم کوڵۊ..

"ڕووڵه‌گەم گەورا ماڵ، کوانیێ بایه دایەم گوڕوو"

دەر° ماڵ، هەر چۊ ڕۊیەت خاوەن ماڵ دایەم وازۊ... 

هاتن میەمان و ڕێوار و پێوار هەر بێ‌مدوو بۊ، له ڕۊ مەیل بۊ..

"ڕووڵه‌گەم ماڵێ گ پای میەمان لە تێ نەود تەژگای کوورەو بوو، میەمان ڕووزی خوەی ها وە پایەو"

خواردەمەنییەیل سادەو وەتامۊ، چمان گیان بنیایەمۊ..

بوو نان تازەو گەرم° دایه، تا هەفت ماڵ ئەولاتر چێ...

کەسێ نانەوشکەیگ نیاشت..

"ڕووڵه‌گەم نان بەرەکەت خوان و سفرەس"

گەورایل گیشتێ زانا بۊن، ئەمان کەسێ فەرەزان نەۊ...

کەسێ له کەس کینه نیاشت، دووسی هساو کتاو نیاشت...

سڵام،سڵام گورگین نەۊ، سڵام له ڕۊ ڕاسی بۊ..

وەڕاس..

دەوره   دەورەی ڕاسانۊ

گەی وە  دەس   خاسانۊ

دەس کەسێ  پەتی   نەۊ

دڵ کەس خەت‌خەتی نەۊ

سەر مەردم له هامشوو بۊ

گەپ دڵه‌یل له پەیشروو بۊ

ئـــــــــاخ! من هێمان دڵم گیروودەی ماڵه‌یل زۊنەس...

 عەلی ئبراهیمی