دوو پارچە شيعر
شه‌وم هه شه‌وه، رووژم هه شه‌وه
له‌رزم ها له ته‌و، ته‌وم هه ته‌وه
خه‌مم ها له جووش و شادیم خه‌مه
زه‌وقم داڵ‌گیژان په‌ژاره‌ێ جه‌مه
داره‌یل بێزێ که‌ن، زه‌مین ها له ژان
ئاوس مه‌رگن خه‌نن وه سنان
مانگ گوڵوه‌نی مه‌رگ به‌سیایه وه سه‌ر
سۊر هساره‌یل بۊە وه چه‌مه‌ر
په‌ریزایه‌گان گیر دێو که‌فتن
شه‌و وریاکه‌ره‌یل وه قه‌سی خه‌فتن
شه‌ره‌ف و وژدان ریشخه‌نی بارن
برایل ئازا سه‌رچووکه‌ێ دارن
هه‌ڵ‌هه‌ڵی کیه‌نی ڕا ئه‌وره‌یل ره‌ش
خودا چڕینه سه‌ره‌یل بێ‌له‌ش
بڕیان گیس ئاهووه‌یل وه زوور
سه‌یرانگاێ نه‌چیر ک بۊە وه گووڕ
مه‌رگ باوه‌ڕم، چریکه‌ێ گیانم
خوه‌م له خوه‌م مرم، له کوومه‌ێ ژانم
م هامه کووره؟ خودا ها له کوو؟
یه‌ک گوم کردیمه ،که‌ی رێ پێا بوو؟
حه‌ریر ده‌نگم دڕیا له هاوار
ئه‌و مه‌ته‌ڵه‌مه، -چاگه و ژن و مار-
عومر م کوڵ و خه‌مم دریژە
هامه‌ێ بن چا، وه کی چوو قیژە
دی ته‌مام بۊمە وه ته‌مام ئۊشم
ئاگر گرتمه، -م چنگێ پۊشم-
ده‌ردت له خاکم برای نیشتمان
نه‌یلی خوڵه‌گه‌م بچوو وه تاڵان
یانه گوورکه‌نه‌یل شه‌ره‌ف و ژینن
بڕێ قورئان خوه‌ر، بڕێ بێ دینن
یانه ئه‌ڤداڵه‌یل زه‌بوون وه نۊرن
له من و تن و بنیایه‌م دۊرن
هووره‌ێ مه‌خمه‌ڵ نۊر و ئاو بپووش
گه‌نم و خاک و ئایه‌م هانه گووش
ناهید محه‌مه‌دی
م ئۊشم خاسم ؛ ت باوەڕ مەکه
خەياڵم فيشتر؛ دەروەدەر مەکه
له ناو پەژاره؛ گم بی شەوەيلم
ت ڕا ڕووژەيلم ؛ ديده تەڕ مەکه
خەت وه خەت خوەنيم؛ نامەى ئەسرەيلد
بى م نە وەی و نه چەمەر مەکه
هەواڵد پرسيم؛ وەتن بيمارى
له شۊنم سيه ت له وەر مەکه
م سەرگەردانم ؛ وينەى هەساره
ت ئالەم گشتى ؛ باخەوەر مەکه
جوانى بار کرد ؛ زەوقم هەڕاج بۊ
ت فکر باخ بى سەمەر مەکه
يه منم گمم له ناو ئەسرەیلم
يه منم ؛ منم ؛ ت باوەڕ مەکه
جەلال کووهى
