بەرزەفڕ
ئەی باڵ دریژ پەڕ دە موولەق
چنگیڕ دە ئەور و سەر دە موولەق
پاشای پەشێو ئاسمان ئەی
ئەی داڵ دە دیل دام ئەرێ هەی
شای بەرزەفڕەێل جار جاران
هاناو همێد بان بانان
کاسەو بییە زار و زەۊ ژە قیڕەت
کەڕ کردگە ئاسمانە قیژەت
هەر وەڵنگێ پەڕێ ژە تیژباڵت
هەر دار بەڕۊ سۊکێ ژە ماڵت
لافاو؛ تکێ ژە ئەسر شووڕت
ئەرژن؛ خش نەخش پاێ مەپووڕت
دنیا جگێ بی دە قوڕن چاوت
گردێ گڕێ بی دە نام خاوت
خەیلێگە دە ئی شار خەریوە
ئاپارتمان شیک و لێوە
تەنیام؛ ژیان من هە هووڵە
هووڵێ ک هە بار بان کووڵە
هووڵ خوەت و ئەو کێۊەێل بەرزە
هووڵ خوەت و ئەو سنوورە مەرزە
دڵ داین خوەت وە ئەو وڵاتە
ئەو دڵبەری ئەو خاسە خڵاتە
سۊک قەفەسە نە جیگەێ ئیوەس
ئاز نەفەسەێلە گرت بێ‌کەس
ئی شارە ئەڕا م هەم قەفەس بی
دۊد و تەم و تووز و هەر هەوەس بی
ئێسە من و تو کوور و کز و مات
بێ‌دەستر و بێ‌کەستر و کشمات
کەفتیمنە دەێ خەریوییە کز
دامایمنە دەێ ئەسیرییە کز
دڵ دڵ نەکە بەورەو ئەڵفڕیمن
ها ئی قەفەسەێلە ئەڵدڕیمن
هەم باڵ دە باڵ ئەور واران
هەم چەم دە چەم هەڵۆ دە بەرزان
ئازادتر و لەچەرتر ئەژ وا
جاماڵ قەفەس بشێونیما
ئەڵفڕ فڕە دەر خەم و وڕینە
ئی وێم و وڕینەێل وەرینە
کوومڕ سەر کوومڕ ئەڵنەکیشە
دەێ سۊکییە بێ‌دەس ئەونەنیشە
ژەی سەردەهناسییە هەی ئەڵ هەی
ژەی مردەمڵاسییە وەی ئەڵ وەی
ئەی باڵ دریژ و دڕ، تەمەن کوڵ
ئەی دیلی دەرد سەرد و واوڵ
وەرد تونم ئەی دە هووڵ موولەق
فێشتر ژە م سەردە مردە دڵڕەق
خوەت خوەت نەخوە ئەی لفانەگەی خوەم
هووکارە نەکەی منیش کەم‌کەم
.
شعر
رودوس فەیلی ( مصطفی بیگی )
