ناونى كورد و توركمان له خورماتوو
جه‌نگ و روى وه‌ڕوى بوينه‌وه‌ى ناونى كورد و توركمان له ئاكام ناكووكى بازگه‌يگ وشاكانن هات له ته‌شرين دويه‌م/ نۆڤه‌مبه‌ر گوزه‌يشت، ك هه‌رچه‌نى جه‌نگه‌يليش وسيانه‌و، وه‌لێ تائيسه‌يش ناكووكى ناونى هه‌ردوگلا نه‌وسياگه‌و گرژى فريه‌يگ له‌ناونيان وجوود ديرێد.
هه‌ردوگلا جه‌نگ داعش ئه‌كه‌ن، وه‌لێ له هه‌مان وه‌خت ركابه‌رى چه‌سپانن نفوزيان ئه‌كه‌ن له‌و ناوچه‌يله ك وجوود له‌تيان ديرن و جارجاريگيش ئه‌ڕه‌سێده روى وه‌ڕوى بوينه‌وه‌ى چه‌كدارى ناونى كورده‌يل سنى له‌وانه‌گ پشتگيرى له هه‌رێم كوردستان وه‌ر ئه‌گرن و توركمان شيعه له‌وانه‌گ حكومه‌ت به‌غدا پشتگيرييان ئه‌كا.
ئه‌حمه‌د حه‌سه‌ن مه‌جيد(36 ساڵان) توركمان و شيعه، له ماڵيگ ژيه‌يد نزيك له ناوچه‌يگ ك زوورم مه‌ردمه‌گه‌ى كوردن، ماڵه‌گه‌يشى له‌ناونى يه‌كه‌مين ئه‌و ماڵه‌يله بوى ك له‌ماوه‌ى تون وتيژى سزياو ته‌نيا هه‌ر ديواره‌يلى مه‌ند، وه‌لێ دوكانه‌گه‌يشى ك شوون فرووشتن جنگه‌يل ژنانه بوى هويچ له‌تى نه‌مه‌ند و گشتى سزياو ته‌نيا كراسيگيش له‌تى نه‌مه‌ند.
ئه‌حمه‌د وه حه‌سره‌تيگه‌و باس له‌و زه‌ره‌ده‌يله ئه‌كا ك هاته‌سه تويشى له ماڵه‌گه‌ى، ك نزيكه‌ى 260 مليۆن دينار، ك ئه‌كاده 218 هه‌زار دۆلار و هه‌ر وه‌و خاتريشه ناچار بويه خوه‌ى و خيزانه‌گه‌ى جيواز بوون ئه‌را شوونيگ تر نه‌ك هه‌ر وه بوونه‌ى ئه‌و كاولكاريه له ماڵه‌گه‌ى، به‌ڵكوو له‌وه‌ر ئه‌وه‌يش ك كه‌فته‌سه ناوچه‌يگ كوردنشين.
ئه‌حمه‌د هه‌ناى ك ته‌ماشاى ماڵه سزياگه‌گه‌ى ئه‌كاو هويچ ئه‌راى له‌تى نه‌مه‌ندگه و ته‌نيا هه‌ر ديواره‌يلى مه‌ندگه‌و ته‌نانه‌ت بڕيگ له بنميچه‌گه‌يشى رمياس، وه ده‌سى ئاماژه ئه‌كاو ئويشێد: له‌ى شوونه ك جاده‌گه به‌شياگه نيمه‌ى مه‌ردمه‌گه كوردن و ئه‌و نيمه‌گه‌يشى توركمانه.
دوياى روێداين جه‌نگيش له‌ناونى هه‌ردوگلا، خيزانه‌يل كورد و توركمان له هه‌ردوگ ديم ئه‌و جاده ئاڵشت وئوڵوشت كريان تا هه‌ر يه‌كيگ له‌ليان بچن وه‌ره‌و ناو مه‌ردم نه‌ته‌وه‌ى خوه‌ى له‌وه‌ر ئه‌وه‌گ ناوچه‌يل شاره‌گه له‌ڕوى ره‌گه‌زيه‌و دابه‌ش بكريه‌ێد.
وه‌ل ئه‌وه‌يشا نيهان به‌هادين توركمانى گله‌وخواردن هه‌ڵوژان تا بتويه‌نێد له‌ناو ماڵه‌گه‌ى خوه‌ى بژيه‌ێد ك كه‌فته‌سه ديم ناوچه‌يل كوردنشين.
نيهان(36 ساڵان) ك مامۆستايگه ئويشێد: ئى كاره مه‌ترسيداره، وه‌لێ هويچ بژارده‌يگ تر له‌وه‌رده‌ممان نيه، چوينكه جه‌نگاوه‌ره‌يل كاره‌سات له‌شوون خوه‌يان هيشتنه‌سه جى و ئيمه‌يش ئيسه شوونيگ تر نه‌يريم روى له‌لى بكه‌يم.
نيهان زويتر ناچار واين كريا و ماڵه‌گه‌ى خوه‌ى له موسڵ هيشته‌جى ك دويه‌مين شاره‌يل عراق له‌ڕوى داگيركردنه‌و له‌لايه‌ن ريكخرياگ ترۆريستى داعشه‌و له حزه‌يران / يونيۆ 2014.
له‌وه‌ختيگيش نيهان ك گله‌وخوارد ئه‌را ماڵه‌گه‌ى له ناوچه‌يگ كوردنشين، نوڕست ك له‌قه‌ى ديوار غورفه‌ى مناڵه‌يلى و له شوونه‌يل تر ديواره‌يل ماڵه‌گه‌ى نويسياگه" خورماتوو سه‌ر وه كوردستانه".
هيزه‌يل پێشمه‌رگه له‌چوارچيوه‌ى جه‌نگ دژ ريكخرياگ ترۆريستى داعش له ناوچه‌يل كوردستانى ده‌يشت هه‌رێم كوردستان بڵاوه‌و بوين و زاڵ بوينه بان ئه‌و ناوچه‌يله‌و له‌ناونيشانيش شار خورماتوو، ك كورد هه‌وڵ ئه‌وه ئه‌ياد بارێده‌وه‌ى ئه‌را بان هه‌رێم كوردستان.
ئمجا وه‌ل ئه‌وه‌يشا هيزه‌يل حه‌شد شه‌عبى ك هيزه‌يليگ شيعه‌ن و له‌ناونيانيش هيزه‌يل توركمانى، دژ وه ريكخرياگ ترۆريستى داعش جه‌نگ ئه‌كه‌ن، ئى مه‌سه‌له ره‌ته‌و كردن.
هه‌ر وه‌و خاتريشه مه‌ردم شار خورماتوو ك 100 هه‌زار كه‌س له‌تى نيشته‌جيه‌و هيزه‌يليگ له ميليشيا و هيزه‌يليگ له پێشمه‌رگه‌ى كوردستان زاڵه له‌بانى، باج ئى كيشمه‌كيش و ناكووكيه ئه‌يه‌ن.
له‌يرا قه‌يران له‌ناونى هه‌ردوگلا سه‌خته‌و بوى، له‌وه‌ختيگ ك له بازگه‌يگ وشكانن له 12ى ته‌شرين دويه‌م/ نۆڤه‌مبه‌ر ئاگر ئاشووگه‌رى له‌لى كه‌فته‌و.
سه‌رچه‌وه‌يليگ توركمانى و كوردستانى جه‌خت له‌وه ئه‌كه‌ن ك نزيكه‌ى 110 ماڵ و نزيكه‌ى 200 دوكان بازرگانييش تويش رميان و سزيان هاتگه ك سێكوت له‌لى سه‌ر وه مه‌ردم توركمان بويه له‌و تون وتيژيه ك روێدا.
هه‌ر له‌ئاكام ئه‌و تون وتيژيه‌يليشه نزيكه‌ى 10 توركمان و هه‌يشت كورد كوشيان، ئه‌ويش وه گووره‌ى قسه‌يل شه‌لال عه‌بدول يه‌كيگ له وه‌رپرسه‌يل ناوچه‌يى كورد له‌و شاره‌و ئه‌وه بوى ئاگر وه‌ربوى له نه‌خوه‌شخانه‌ى شاره‌گه‌و دكتۆريگ له‌تى گيان له‌ده‌سدا.
له هه‌مان وه‌خت به‌ياننامه‌ى ريكخرياگ "هيومن رايتس ووتش" ئه‌را مافه‌يل ئاده‌ميزاديش له‌و وه‌خته‌يله جه‌خت له‌بان په‌لامارداين هاووڵاتيه‌يل مه‌ده‌نييش كرد له‌وه‌ر هووكار نه‌ته‌وه‌يى و ئاماژه وه‌يه‌يش كرد ك چه‌كداره‌يليگ په‌لامارده‌ر ده‌س كردنه‌سه كوشتن و رفانن و كاولكردن ماڵ و موڵك مه‌ردم.
ئمجا بازرگانه‌يل له‌وه‌ر ئه‌وه‌گ ماڵ وموڵكيان تويش سزانن يا ويرانكردن ناێد، شماره‌ى فريه‌يگ له‌ليان له‌بان قاپى دوكانه‌يليان وشه‌ى"ئه‌كراد" نويسانن ك تائيسه‌يش فريه‌يگ له‌ليان هه‌ر مه‌ندگه.
هه‌ر له‌وه‌ر ئه‌وه‌يش ناكووكى ناونى كورد و توركمان دريژه ديرێد ئه‌را دوير تر له مه‌سه‌له‌ى خورماتوو، هه‌ر وه‌و خاتريشه وه‌رپرسه‌يل توركمان مه‌سه‌له‌ى هه‌ڵكه‌ندن خه‌نده‌ق له‌لايه‌ن كورده‌يل شه‌رمه‌زار كردن وه ئه‌وه‌گ عراق به‌شبه‌شه‌و ئه‌كا له خوه‌رهه‌ڵات تا خوه‌رئاوا.
له‌ى باوه‌تيشه‌و وه‌رپرسه‌يل كورد ئويشن: ئامانج له هه‌ڵكه‌ندن ئى خه‌نده‌قه وه‌خاتر نواگيريه له په‌لاماره‌يل ريكخرياگ ترۆريستى داعش ك خوازياره په‌لامار هه‌رێم كوردستان بيه‌ێد، وه‌لێ توركمان جه‌خت له‌وه ئه‌كه‌ن هه‌ڵكه‌ندن ئى خه‌نده‌قه ئامانج له‌لى فراوانكردن هه‌رێم كوردستانه.
