ژنەیلیگ لەناو ستەم کارکردن ماف خوەیان نیەزانن

 ژنەیل عراق کەفنە وەر سەختیەیل فرەیگ لە بازاڕ کار، وەتایبەت لە کەرت تایبەت، لەبان ئەو زوورەیل ژیان لەبان ملیان، وەلێ لەوەر بەدی رەوش ئابووری، ناچار بوون وەکارەیلیگ رازی بوون ئەگەر مافیان لە ساعەتەیل کاریان یا کرایانیش لەلیان بسینێد، لە وەختیگ بڕیگیان ناچار بوون لە چشتیلیگ واز بارن، تا کاریان بکەفێدە ری.

 روقەیە، دویەتیگ خەڵک پارێزگای بابل، لەناو یەکیگ لە مارکیتەیل کار کەێد، ئویشێد: بەشیگ لە خاوەن نەفەس نزم لە خاوەن مۆڵ و دوکانەیل هەنای نووڕن ک ژنەگە ری وەپی نیەێد تا لەلی نزیکەو بوود، مینەتی وەکارکردن دەێد، و ناچاری کەێد تا وەخت دیریگ لەناو کارەگە بمینێد، و ئەوەیش کیچەڵیگ ئەرای دروس کەێد، ک شەوانە دیر چوودە ماڵ.

 روقەیە لە قسەیلی ئەرا ئاژانس شەفەق نیوز ئویشێد: برا و باوگیش رازی نیەوون ژن بکەفێدە دیریگ لە کار، و بڕیگیش لە ژنەیل کار ماڵ و مناڵ و خیزان دیرن، ک دویەتیگ نزیک خوەم وەیجویرە وەسەری هات، ک باوانی رازی نەوین تا وەخت دیریگ کار بکەێد، یەیش زووریگ دارایی و دەروینی هاوردە بانی.

خەم نەخواردن 

داڵگ نەرجس (٥٠ ساڵە) خەڵک پارێزگای دیوانیە، باس ئەو گرفتەیلە کەێد ک لە مەوقەی کارکردنی لەناو یەکیگ لە کارخانەیل پارێزگاگە کەفنە نوای، ک باقلە چنێدەو، و کەفێدە وەر خەم نەخواردینیگ وەگەرد گەورە تەمەنەیل لە ناو کار.

داڵگ نەرجس لە قسەیلی ئەرا ئاژانس شەفەق نیوز وت ئویشێد: زوور لەبان گەورە تەمەنەیل تیارن، چ لەناو کارخانەیل لە وەرز باقلە چنین، وەرانەوەر ئەوە دویەتە جوانەیل نازیان هەڵگریەێد، چوینکە یاسایگ نییە کریکارەیل جویر یەک دانەێد، ک مەینەتی لەش و دەروینی خەێدە وەرمان. 

سەختیەیلیگ دووقاتی

سارە جاسم خانمە چالاکوان و وەرگیریکەر لە ماف مرۆڤ، ئویشێد: ژنەیل عراق زیان لە بازاڕ کار  کەرت تایبەت مەینەتییان دوو ئەوەنەی پیاوە، لەلای بەد وەکارهاوردن و چزداین و دەسدرویژی، و بەشیگ لە کۆمپانیایل ساعەتەیل کار زیای کەن.

 سارە خان لە قسەیلی ئەرا ئاژانس شەفەق نیوز ئویشێد: بەشیگ لە ژنەیل واز لە کار تیارن، وەلێ بەشیگ ناچار بوون، رازی وە کارەیلیگ بوون وەرانەوەر زیایکردن کرایان یا کەمەوکردن ساعەتەیل کارکردنیان، تا کار خوەیان بخەنە ری و بڕەسنە هانای خیزانیان، لەسای ئی رەوشەیل ئابووری بەدە. 

ستەمدیدەیلیگ ماف خوەیان نیەزانن

ئەسیر عبادی، جیگر سەرۆک یەکێتی کریکارەیل لە بەسرە، ئویشێد: فرە لەو ژنەیل ک لە کەرت تایبەت کار کەن، کەفنە ژیر ستەم، و ماف خوەیان لەکار نیەزانن، ک خوەی لە رووژیگ ٨ ساعەتە، یەک ساعەتیش هوچان هاناوی.

عبادی لە قسەیلی ئەرا ئاژانس شەفەق نیوز ئویشێد: یەکێتی کریکارەیل ئەرا هوشیارکردن کریکارەیل وە یاسای کار، خول و کۆڕ رووشنهویرکرن سازێد تا ژنەیل یاسا بناسن.

یاسای کار

یاسای کار، ٤٠ ساعەت لە هەفتەیگ ئەرا ژن و پیاو جویر یەک دیاری کەێد، لەبان پەنج رووژ بەشەو بویە، لە یەکشەممە تا پەنجشەممە، هەر رووژیگ ٨ ساعەت، و لە کەرت تایبەت، گریەبەسی پابەند هەردوگ لایەنەگە کەێد، و ئەگەر چەواشە کریا توەنێ لە وەزارەت داد سکاڵا توومار بکەێد، وەگورەی قسەی خانمە دادپەروەر ئەزهار دلێمی.

ئەزهار خان لە قسەیلی ئەرا ئاژانس شەفەق نیوز ئویشێد: وەلێ خانمەیلیگ کریکار لە کەرت تایبەت هەس، تەمەنیان ناخاڵەس، ک یانە ماف یاسایی نەیرن، چوینکە لەی تەمەنە گریەبەسی کار ئەرایان نیەکریەێد، ئەراوە مافیان لە کرا و لە ساعەتەیل کار خوریاگە، و داوا لە وەزارەت کار کریاگە تا چارەی ئی لایەنە بکەێد، باوجی وەزارەتەگە جویلەیگ لەی باوەتە نەکرد.