لە رووژ جهانی توندوتیژی رەگەزی.. یاد نەهامەتی دوێەتەیل ئەیزدی

شەفەق نیوز/ شەش ساڵ لەبان ئەو نەهامەتیە رەد بوی ک دوێەتە ئەیزیدیەیل لەوەر ستەم داعش کەفتنە وەری، لەماوەی داگیرکردن یەک لە سێ بەش خاك عراق، و ناوچەیلیگ گەورەتر لە سوریا.

رزگار بویەیل لە دوێەتە ئەیزیدیەیل جەور دوو تاڵی کیشن، تاڵی دەسدریژی رەگەزی و کار زوور نەوکەرییان، و تاڵی وەداد نەڕەسینیان وەشیوەی گونجیاگ.

*رووژ جهانی دژوە توندوتیژی رەگەزی

رووژ ١٩ی حوزەیران لە گشت ساڵیگ، رووژیگ جهانیە ئەرا لەناوبردن توندوتیژی رەگەزی لە ململانەیل، و بی گومان فرە لە خانمە ئەیزیدیەیل ک کەفتنە وەر خراوترین شیوەیل توندوتیژی رەگەزی و دەسدریژی ئەندامەیل ریخریایە توندڕەوەگە، دویای داگیرکردن ناوچەیل شەنگال لە ساڵ ٢٠١٤، زیان وەخوەیان دوینن. و لەی رووژە، خانمە ئەیزیدیەیل یاد ئازادکردنیان لە چنگ ریخریاگ داعش و یاد زیانەیلیان لەمەوقەی رفانن کەن، ئەوەیش لە باسکردیان ئەرا ئاژانس شەفەق نیوز.

*خانمە رزگاربویەیلیگ لە داعش

هەنا (٢٥ ساڵان)، خانمیگ ئەیزیدیە لە چنگ داعش قورتار بویە، باس زیانەیلی ئەرا ئاژانسەگە کرد، وت: هەکاتی کوەیلە و نەوکەر رەفتار وەردمان کردیان، جاروباریگ دەس لەلیمان وەشانیان، و جارەیلیگ پەلامار رەگەزیمان دیان.

هه‌نا وە دیەیل ئەسرینی وت: دەرمان دژوە دووگیانی خواردیام، تا زایینیگ لەلیان نەکەم، وتیش؛ یەی جا تەقەلای خوەیکوشتن دام، وەلی وەپیم نەکریا، هەنای هویر وە باوان و کەسوکارەیلم کردم.

هەنا، وەگورەی قسەیلی، ئیڕنگە لە بیمارەیل دریژماوەیلیگ زیان وەخوەی دوینێد، و هەمیش لە رەوشەیل مرۆیی سەختیگ گوزەران کردگە، ک ئیسە تەق و تەنیاس، چوینکە هیمان گشت خیزانەگەی بیسەروشوونن، و کەسیگ هیچ لە چارەنوسیان نێزانێد.

خوخی، خانمە ئازادبوییگ ترە لە دەس داعش، لە ساڵ ٢٠٢٠ دەرفەت واین لە کامپ هۆل ئەرای پەیا بوی، هەنای یەکیگ لە کەسوکارەیلی پویل فرەیگ دا دەس یەکیگ لە قاچاخچیەیل.

خوخی، یاد رووژە تاریکەیلی کرد، هەنای خوەی و خوەشک بویچگی دەسوەسەر کریان، وت؛ یەکیگ لە ئەمیرەیل داعش دوێتەیل وەگورەی رەنگین وناشرین جیاوە کرد.

و هەنای باس لە کەفتنی وەوەر دەسدریژی رەگەزی کرد، روخساری شیویا، وت: تەنیا ئەرا ئەمیرەیل داعش پەسنی کردن، و چەن جاریگ کەفتە وەر دەسدریژی رەگەزی، و یەی جار وەرخودان لەنوای ئەوە کرد، وەلێ بیخود، ک هەر جاریگ وەرخودان بکردیاد، کەفتیادە وەر دەسوەشانن سەختیگ.

*هیمان ٢٨٠٠ خانم هانە چنگ داعش

لەلای خوەییش، حسێن کورو وەرپرس نووسینگەی رفیایەیل ئەیزیدی ئەرا ئاژانس شەفەق نیوز وت: تا ئیسە ٢٨٠٠ لە ژن و مناڵ هانە دەس داعش لە عراق و سوریا، و باس ئازادکردن ٣٥٤٦ کرد.

*رینماداینیگ نەتەوەیی وەداد رەسینیان

لەلای خوەییش، ئینگیبیورگ سولرون گیشلادوتێر خانمە جیگر نوێنەر تایبەت نەتەوە یەکگرتگەیل لە عراق، داوا لە دەسەڵاتەیل عراق کرد، گشت ماف و شایستەیل خانمە قورتاربویەیل وەگورەی یاسای  خانمە رزگاربویە ئەیزیدیەیل بخەنە وەردسیان.

گیشلادوتێر داوا لە حکومەت عراق کرد رەنجەیلی ئەرا مسۆگەرکردن سزادان تاوانباره‌یل  ئی تاوانەیل ناشرینە خەسەو بکەێد، و گشت داهاتەیل بخەنە پشت دەس، جوور داهاتەیل دارایی و مرۆیی، ئەرا جیوەجیکردن خوازینەیل گشت قوربانیەیل توندوتیژی رەگەزی لە مەوقەی ململانە.

وتیش؛ داناین یاسای خانمە رزگاربویە ئەیزیدیەیل لە مانگ ئادار لەی ساڵە، گام گرنگیگە وەرەو جیوەجیکردن خوازینەیل خانمە رزگاربویەیل لەو کردەوەیل ناشرینە ک داعش لە عراق جیوەجییان کرد.

یاساگە باس پێشکەشکردن قەرەبووەیل و چەودیریکردن خانمە رزگاربویەیل و دووارە ئامادەکردنیان ئه‌ڕا ژیان لەناو کۆمەڵگا کەێد.

وتیش؛ جیوەجیکردن تەواوی یاسەگە وە کار گرنگیگ دانریەێد.