عراق وه فه‌رمى به‌تاڵ بوى له وجوود موجاهده‌يل خه‌لق
وه‌رپرسيگ له موجاهده‌يل خه‌لق ئاگادار "ئيلاف" كرد ك دويا شماره‌ى مه‌ردم نيشته‌جى كه‌مپ ليبرتى ره‌سيه‌سه فيشتر له 280 كه‌س و عراق وه‌جيهيشتنه‌و رويكردنه‌سه وڵات ئه‌لبانيا، ك وه‌ى كاريشه مه‌سه‌له‌ى جيوازكردن تاكه‌يل موجاهده‌يل خه‌لق له عراق كووتايى وه وجووديان ئه‌ياد ك شماره‌يان 2300 كه‌س بوى و نزيكه‌ى هه‌زار ژن و مناڵ له‌ناونيان بوى.
ئه‌و وه‌رپرسه جه‌خت له‌وه‌يش كرد ك ئى كووچكردنه وه سه‌ركه‌فتن ئه‌نجام درياگه ك هه‌رچه‌نى چه‌نه‌ها پيلان ئه‌راى دانرياگه بيجگه گرفت و هه‌ڕه‌شه‌يل وه‌رده‌واميگ له‌لايه‌ن رژيم ئيرانى تا دويا رووژ له جيوازبوينيان.
له‌وه‌خت ئه‌و جيوازبوينه ك ئه‌را ماوه‌ى 4 ساڵ و نيم دريژه داشت، مه‌ردم ليبرتى جيواز بوين ئه‌را ده‌وڵه‌ته‌يل ئۆرپى و له‌وانه‌يش ئه‌ڵمانيا و نه‌رويج و هۆڵه‌نداو فنله‌نداو دانيمارك و به‌لجيكاو ئيتاڵياو ئسپانيا.
هه‌مان وه‌رپرس باس له‌وه‌يش كرد ك له‌و ماوه‌يشه رژيم ئيرانى ئاماژه قرمز داسه پۆليس ناوده‌وڵه‌تى ئه‌نته‌رپول و حوكم ده‌سگيركردن دروسكرياگيگ له دادگاى عراقيه‌و ده‌ركردگه و هه‌وڵ ئه‌وه داگه نواگيرى له ده‌رچگن هه‌زار كه‌س له موجاهده‌يل خه‌لق داگه وه‌ل گرتن دو سه‌ركرده له‌ليان.
ساڵ گوزه‌يشتيش هه‌ردوگ ئه‌نجومه‌ن پيره‌يل و نوێنه‌ره‌يل ئه‌مريكييش بريار و ده‌ستووره‌يليگ ياسايى گرتنه خوه‌يان و ته‌كليف حكومه‌ت كردن رى وشوونه‌يل خواست ئه‌را مقه‌يه‌تيكردن مه‌ردم ليبرتى له‌وه‌ر بگرێد و جيوازكردن پڕ ئه‌مانيگ ئه‌رايان دابين بكا له‌وه‌خت جيوازكردنيان ئه‌را ده‌يشت عراق، يه‌يش بيجگه ئه‌وه‌گ بڕياره‌يليگيش هاوشيوه له‌لايه‌ن په‌رله‌مان ئۆرپى و په‌رله‌مان بريتانى و په‌رله‌مانه‌ته‌يل تر له بڕيگ له ده‌وڵه‌ته‌يل تر ئۆرپى و خوه‌رهه‌ڵات ناوينيش ده‌رچى له‌و باوه‌ته‌و.
له 19ى يۆليۆ ساڵ 2016 كۆمسيۆن باڵاى كاروبار په‌نابه‌ره‌يل سه‌ر وه نه‌ته‌وه‌يل يه‌كگرتگ ئاشكراى ئه‌وه كرد ك كومسيۆن باڵا لايه‌نگرى كار جيوازكردن وه‌رده‌وام ئه‌و موجاهده‌يله ئه‌كا له مانگه‌يل ئاينده‌و يه‌يش ده‌رخست ك برياره له وه‌رجه كووتايى هه‌مان ساڵ كووتايى وه‌و پرووژه باريه‌ێد.
كومسيۆن باڵا جه‌خت له‌وه كرد ك وه‌رده‌وامى سه‌ركه‌فتن له جيوه‌جيكردن چاره‌سه‌ر وه گووره‌ى پابه‌ندى مه‌ردمه‌گه هاتگه وه ئه‌وه‌گ خوه‌يان نه‌فه‌قه ئه‌را خوه‌يان دابين بكه‌ن، چوينكه هويچ ده‌سميه‌تيگ حكومى وه‌رنه‌گرتنه ئه‌را مه‌سه‌له‌ى جيوازكردنيان.
رژيم سه‌دام حسێن ڕى وه ريكخرياگ موجاهده‌يل خه‌لق ئيرانى دا ئه‌را ئه‌وه‌گ جيگير بوون له كه‌مپ ئه‌شره‌ف ك ئه‌كه‌فێده دويرى 80 كم باكوور به‌غدا، وه‌لێ دوياى ئه‌وه‌گ وڵاته‌يل يه‌كگرتگ ئه‌مريكى و هاوپه‌يمانه‌يلى هاتنه ناو عراقه‌و له‌ساڵ 2003 چه‌ك له‌و مه‌ردم كه‌مپ ئه‌شره‌فه سه‌نرياوه و ئاسايش ئه‌و كه‌مپه كه‌فته ده‌س ئه‌مريكيه‌يل وه‌رجه ئه‌وه‌گ ته‌سليم وه عراقيه‌يل بكريه‌ێد له 2009.
ريكخرياگ موجاهده‌يل خه‌لق ئيرانى له‌ساڵ 1965 دامه‌زرياس وه ئامانج رمانن رژيم شاهنشاى په‌هله‌وى و دوياى ئه‌وه‌يش رژيم ئسلامى ك دژى وسياو حوكم له‌سێداره ده‌رهه‌ق 30 كه‌س له‌ليان ده‌ركرد له‌ساڵ 1988.
