سەردان مەسعود بارزانی ئەرا بەغداد.. دەرفەتیگ ئەرا خاسی لە گشت عراق.. وینە
پەیامنێر ئاژانس شەفەق نیوز وت: هەرلە دوو جیگر سەرۆک وەزیرەیل عراق، و فوئاد حسێن وەزیر دەیشت، و محمد تەمیم وەزیر پلانسازی، و سابت عەباسی وەزیر وەرگری، و ئەحمەد ئەسەدی وەزیر کار و کاروبار کۆمەڵایەتی، و بنکین ریکانی وەزیر ئاوەدانی و شارەوانی گشتی، و بڕیگ لە وەرپرسەیل حکومەتی و فەرماندەیل سەربازی هاتنە پیری ریبەر کورد و شاند یاوەی، و لەناو فڕۆکەخانەی ناودەوڵەتی بەغداد پیشوازی لەلی کردن.
چوارچیوەی هەماهەنگی میوانداری مەسعود بارزانی لە گردەوبوینەیلی کرد، كە چوارچیوە دووپات لە گرنگی سەردانەگەی مەسعود بارزانی ئەرا بەغداد کرد.
لەلای خوەییش، عائد هلالی سەرکردە لە چوارچیوەی هەماهەنگی ئەرا ئاژانس شەفەق نیوز وت: سەردان بارزانی ئەرا بەغداد لەی مەوقە فرە گرنگە، ئەرا چارەکردن گیچەڵەیل گیرهاتگ ناوەین بەغداد و هەولێر، و ئی سەردانە گرنگی گەورەیگ دیرێد لە نزیکەوکردن نووڕینەیل لە فرەی باوەتەیل گیرهاتگ.
هلالی وتیش: بارزانی سەنگین سیاسی گەوریگ دیرێد لە بەغداد، و ئی سەردانە ئەنجامەیل خاسیگ لە پەیوەندییەیل ناوەین حکومەت هەرێم کوردستان و حکومەت فیدڕاڵی دیرێد.
وتیش: بارزانی چارەسەری فرەیگ ئەرا قەیرانەیل زەرد خوەی هەڵگردیە، وەتایبەت وەگەرد نیازیگ راستەقینە وەلایەن سودانی و حکومەتی ئەرا چارەکردن گیچەڵەیل گیرهاتگ وەرد هەرێم کوردستان.
لە خود رووژ رەسینی ئەرا بەغداد پایتەخت، محمد شیاع سودانی سەرۆک وەزیرەیل پیشوازی لە خوەی و شاند یاوەری کرد.
لە دیدارەگە سودانی باس سەردان بارزانی ئەرا بەغدا وە گرنگ کرد، و وت: گفتوگۆ بیناکەر ئەرا جویراجویر باوەتەیل ناوخوەیی و رەوشەیل هەرێمی کردیمن.
وتیش: گامیگ گرنگ لە بیناکردن دڵنیایی ناوەین حکومەت فیدراڵی و حکومەت هەرێم لە بڕیمن، و کێشەیل فرەیگ نایمنە پشتسەر کە یە چەن ساڵیگە هەسەی، وەگورەی دەستوور و یاسا.
سودانی وتیش: وەرەو وازکردن دەرفەتەیل ئەوزەڵکردن و ئاسووەیل بانان چیمن، وەو شیوە کە گەلمان لە گشت شوینیگ بکەفێدە خێر و خوەشگوزەرانی.
سەرۆک ئەنجومەن وەزیرەیل دووپات کرد کە رەوشەیل هەرێمی بەشیگ گرنگ بوی لەو باسکردنە کە لەی قۆناغ سەختە لە ناوچەگە گرنگە.
لەلای خوەییش؛ بارزانی لە وتار هاوبەشیان وت: فرە وە دیدار سەرۆک وەزیرەیل خوەشهاڵم.
وتیش: سەردانم ئەرا بەغداد وە ئامانج قایمکردن تەقەلایل سەرۆک وەزیرەیل تیەێد کە رەسیە ئەفاقەیک راسی لە پەیوەندییەیل ناوەین حکومەت فیدراڵی و حکومەت هەرێم کوردستان.
بارزانی : گفتوگۆمان بیناکەر بوی لە رەوشەیل ناوخوەیی و هەرێمی و نووڕینەیل جویر یەک بوین.
دویای ئەوە، سەرۆک ئەنجومەن دادوەری باڵا، پیشوازی لە مەسعود بارزانی کرد.
لە دیداریگ ناوەین مەسعود بارزانی و سەرۆک ئەنجومەن دادوەری باڵا، وەگورەی بەیاننامەیگ رەسیە ئاژانس شەفەق نیوز؛ باس بڕیگ باوەت یاسایی و دادوەری گرنگ کریا، لە باوەت گەشەکردن کار دادوەری لە هەرێم کوردستان.
لە سەردانەگەی مەسعود بارزانی، سەرۆک پارت دیموکرات کوردستان، ئەرا بەغداد، چەوی کەفتە شمارەیگ لە باڵیۆزەیل چەن دەوڵەتیگ مەزن.
نویسنگەی مەسعود بارزانی لە بەیاننامەیگ رەسیە ئاژانس شەفەق نیوز وت: بارزانی چەوی کەفتە ئیلبروس کوتراشیف باڵیۆز رووسیا لە عراق، و باس نووڕین و رای خوەیان لەباوەت پەیوەندییەیل ناوەین هەولێر و بەغدا و رەوشەیل سیاسی عراق کردن.
نویسنگەی مەسعود بارزانی وتیش: بارزانی چەوی کەفتە تسوی وی باڵیۆز وڵات چین لە عراق.
وەگورەی بەیاننامەگە، لە دیدارەگە وەگەرد باڵیۆز وڵات چین، رووشنایی خریا بان رەوشەیل سیاسی عراق، و بارزانی باس مدووەیل سەردانی ئەرا بەغدا و دیدارەیلی وەرد لایەنەیل سیاسی کرد، وەگەرد نیاز چارەسەرکردن گیچەڵەیل ناوەین بەغداد و هەولێر، و ئەوەیش وە دەرفەت خاسیگ دانا ئەرا یەکلاوەکردن گیچەڵەیل و خستن بەرژەوەنەیل نیشتمانی لەوەر چەو.
لە دیدارەگە، باڵیۆز وڵات چین، باس خوەشاڵیی وە سەردان سەرۆک بارزانی ئەرا بەغداد کرد، و دووپات لە پاڵپشتیکردن وڵاتەگەی ئەرا چارەکردن گیچەڵەیل ناوەین بەغداد و هەولێر.
نویسنگەی بارزانی دیاری کرد کە مەسعود بارزانی لە سەردانەگەی ئەرا بەغدا، چەوی کەفتە ستیڤن هیتشن باڵیۆز بەریتانیا لە عراق.
لە دیدارەگە باس ناکۆکیەیل ناوەین هەولێر و بەغدا کریا، و بارزانی باس مدووەیل سەردانی ئەرا بەغدا و دیدارەیلی وەرد لایەنەیل سیاسی کرد.
باڵیۆز بەریتانیا دووپات لە پاڵپشتیکردن وڵاتەگەی ئەرا سەردان سەرۆک بارزانی ئەرا بەغدا کرد، و قایمکردن پەیوەندییەیل ناوەین هەولێر و بەغدا، و دیاری کرد کە بەریتانیا وە گرنگی نووڕێدە عراق و هەرێم کوردستان لە گشت رەوشەیل، وەتایبەتی لە باوەتەیل ئابووری و هەڕەشەیل تیرۆر و دیاردەی کووچبەری.
نویسنگەی بارزانی دیاری کرد کە مەسعود بارزانی لە سەردانەگەی ئەرا بەغداد، چەوی کەفتە پاتریک دورێل باڵیۆز فەرەنسا لەلای عراق.
بیجگە باسکردن لە گیچەڵ و کێشەیل سیاسی لە عراق، بارزانی لە دیدارەگەی وەرد باڵیۆز فەرەنسا، باس مدووەیل سەردانی ئەرا بەغدا و دیدارەیلی وەرد لایەنەیل سیاسی و وەرپرسەیل کرد.
لە دیدارەگە باڵیۆز فەرەنسا لەلای عراق وە کێوکب باس سەردان بارزانی ئەرا بەغدا کرد، و پیشوازی لە دیاریکردن مەوقەی ئەنجامدان هەڵوژاردن هەرێم کوردستان کەێد، و دووپات کرد کە وڵاتەگەی پاڵپشتی لە قایمکردن پەیوەندییەیل ناوەین هەرێم کوردستان و عراق کرد.
هەرلیوا، مەسعود بارزانی سەرۆک پارت دیموکرات کوردستان، لە سەردانەگەی ئەرا بەغدای پایتەخت، چەوی کەفتە موحسن مەندەلاوی سەرۆک پەرلەمان وە جینشینی.
بارەگای بارزانی لە بەیاننامەیگ رەسیە ئاژانس شەفەق نیوز وت: مەندەلاوی نرخدار رۆڵ و پایەی میژووی سەرۆک بارزانی لە کار سیاسی عراق کرد.
مەندەلاوی باس لە ئومید خوەی کرد کە هاتن سەرۆک بارزانی دەسمیەتی لە چارەسەرکردن کێشەیل عراق بەێد.
لەلای خوەییس، مەسعود بارزانی دووپات کرد لە نیاز پاکی لایەنەیل، و وت: گرنگە گفتوگۆکردن بوودە بنەمای چارەکردن گیچەڵەیل.
هەمیش لە سەردانەگەی مەسعود بارزانی ئەرا بەغدا، پەتی کەفتە شاندیگ هاوبەش لە باڵیۆزخانەیل هەشت دەوڵەت عەرەبی، لە باڵیۆزە دەوڵەت کوێت، باڵیۆز دەوڵەت قەتەر، باڵیۆز وڵات میسر، باڵیۆز بەحرەین، باڵیۆز سەڵتەنەتی عومان، و جیوەجیکار باڵیۆزخانەی ئوردن، و جیوەجیکار باڵیۆزخانەی ئیمارات.
وەگورەی بەیاننامەیگ لەلایەن بارەگای بارزانی، مەسعود بارزانی لە دیدارەگەی وەرد شاند باڵیۆزەیل هەشت وڵات عەرەبی، باس رەوشەیل سیاسی عراق و مدووەیل سەردانی ئەرا بەغدا کرد، هەمیش باس دیدارەیلی و هاندەرەیل سەردانکردن بەغداد کرد.
باڵیۆزەیل هەشت وڵات عەرەب باس ئومید خوەیان کردن کە سەردان مەسعود بارزانی ئەرا بەغدا بوودە مایەی خێر و ئارامی عراق، و دووپات کردن کە وڵاتەیلیان پشتگیری تەواو لە عراق کەن، ئەرا قایمکردن ئاسایش و ئارامی و خوەشگوزەرانی هاوڵاتیەیل عراقی، و چارەکردن ناکۆکیەیل سیاسی لە وڵاتەگە.
لە سەردانەگەی ئەرا بەغدای پایتەخت، مەسعود بارزانی چەوی کەفتە ئەلینا رۆمانسکی، خانمە باڵیۆز ئەمریکا لەلای عراق.
تویش راگەیانن بارزانی لە بەیاننامەیگ رەسیە ئاژانس شەفەق نیوز وت: بارزانی رووشنایی خستە بان مدووەیل سەردانی ئەرا بەغدا، و وت: دویای هەستکردن وە نیاز پاکی ئەرا چارەکردن گیچەڵەیل و پابەندبوین وە دەستوور و دروسکردن کەشوهەوای گونجیاگ لەلای بەغدا، هاتە ئی سەردانە.
لە دیدارەگە، خانمە باڵیۆز ئەمریکا باس پاڵپشتیکردن وڵاتەگەی ئەرا سەردان بارزانی کرد، و خاسەوکردن پەیوەندییەیل ناوەین هەولێر و بەغدا، و دووپات لە هاندان حکومەت هەرێم کوردستان و حکومەت فیدڕاڵی کرد ئەرا قایمکردن پەیوەندییەیل ناوەینیان.
وە ئامادەبوین مەسعود بارزانی، لە سەردانەگەی ئەرا بەغدای پایتەخت، لایەنەیل سوننە، گردەوبوینیگ یەکلاوەکەر ئەنجام دانی ئەرا چارەکردن قەیران سەرەک پەرلەمان.
سەرچەوەیگ ئاگادار، رووژ پەنجشەممە، ئەرا ئاژانس شەفەق نیوز وت: گردەوبوینیگ گرنگ ئەرا گشت سەرکردەیل سیاسی سوننە لە نویسنگەی سەرۆک هاوپەیمانی (سیادە) خەمیس خەنجەر لە بەغداد وەڕیەو چگ، ئەوەیش وە بەشداریکردن مەسعود بارزانی سەرۆک پارت دیموکرات کوردستان.
وەرجە ئەوە، خەمیس خەنجەر لە بارەگای خوەی لە بەغداد پیشوازی لە مەسعود بارزانی و شاند یاوەری کرد، وە ئامادەبوین شمارەیگ لە سەرکردەیل و پەرلەمانتارەیل سوننە.
هەمیش لە سەردانەگەی مەسعود بارزانی، لە دیداریگ وەرد محمد حەلبووسی، سەرۆک حزب تەقەدوم، باس گەشەیل سیاسی لە عراق کرد.
بارەگای بارزانی لە بەیاننامەیگ رەسیە ئاژانس شەفەق نیوز وت: لە دیدارەگە باس رەوشەیل سیاسی لە عراق، باوەت دانان سەرۆک پەرلەمان، و جیوەجیکردن و پابەندی لایەنەیل وە رێککەفتن وەڕیەوبردن دەوڵەت کریا.
لە وەردەوامی دیدارەیلی، لە سەردانەگەی مەسعود بارزانی ئەرا بەغدا، چەوی کەفتە محمد کازم سادق باڵیۆز ئیران لەلای عراق، ز ئەنیل ببورا باڵیۆز تورکیا لەلای عراق، کە باس رەوشەیل سیاسی لە عراق و هەرێم کوردستان، و رەوشەیل ناوچەگە کریا، وەگەرد پەیوەندییەیل هەرێم کوردستان و عراق وەرد کۆمار ئیسلامی ئیران، و پەیوەندییەیل هەرێم کوردستان و عراق وەرد تورکیا.
هەرلیوا، مەسعود بارزانی سەرۆک پارت دیموکرات کوردستان، لە سەردانەگەی ئەرا بەغدای پایتەخت، ئیوارەی پەنجشەممە، سەردان عەبدولەتیف رەشید سەرۆک کۆمار فیدراڵی کرد،
وەگورەی بەیاننامەیگ رەسیە ئاژانس شەفەق نیوز؛ شمارەی گەورەیگ لە سەرکردەیل سیاسی عراقی لەو دیدارە ئامادە بوین، و سەرۆک کۆمار رێز خوەی ئەرا سەردان مەسعود بارزانی ئەرا بەغدا کرد، و وە گرنگی و کاریگەر لە قویلکردن گفتوگۆ بیناکەر ناوەین لایەنەیل سیاسی باسی کرد، و باس ئومید خوەی کرد کە ئەنجامەی ئی سەردانە بکەفێدە خزمەت ئارامی عراق و وەدەسهاوردن بەرژەوەیی.
لە دیدارەگە، باس رەوشەیل گشتی لە عراق و دویاترین گەشەیلی کریا، و دووپات کریا لەبان خەسەوکردن کار هاوبەش و قایمکردن هەماهەنگی ناوەین لایەنەیل ئەرا وەپشتسەرنان ریگریەیل و سەختیەیل، و وەردەوامکردن کەشوهەوای گونجیاگ لە کار سیاسی عراق.
