روزا کوردۆ .. لە مناڵی سەختیگ ئەرا تەقەلای سەرکەفتن لە شاجوان ئینگلترا
شەفەق نیوز/ هەنای روزا کوردۆ لە تەمەن چوار ساڵان بوی، ژیان خوەی و خیزانەگەی ملهڕی وەخوەی دی، وە رەدبۊن وەرەو ئەوروپا وە دەیشت و دەریا، تا لە ستەم سەدام حسێن قورتار بوون، باوجی ئیرنگە خوازێد بوودە شاجوان ئینگلترا.
رووژنامەی "میرۆر" بەریتانی لە راپۆرتیگ ئاژانس شەفەق نیوز ئەڵگەردانی کرد وت: روزا لە دەس ئەو تاوانەیل جینۆسایدە ک رەسیە کوردستان دەرچگ، وەرەو شوین ژیانیگ خاستر لە بەریتانیا، و ئیسە رەسیە تەمەن ٢٥ ساڵان و کار پەرستاری کەێد.
رووژنامە بەریتانیەگە وتیش: روزا ئیسە فرە بیزارە لە رەوشەیل سیاسی و هان بەریتانیا دەێد ک پیشوازییگ فرەتر لەو ئاوارەیلە بکەێد ک لە ستەم واینە، هەکاتی خوەی لە جارانی، و باس پلانەیل بەریتانیای دویایین وە دویرخستن پەنابەرەیل لە رەواندە وە کاریگ رخبەر کرد.
پەنابەری روزا لە ساڵ ٢٠٠١ دەسوەپی کرد، ک وەرجە دوو ساڵ لە جەنگ رمانن رژیم سەدام حسێن بوی، و باس سەرەتای هەڵمەتەیل جینۆساید کەێد ک وەناو ئەنفال ناسریا لە ساڵ ١٩٨٨، هەنای هیزەیل سەدام حسێن دەیان هەزار لە کورد لە کوردستان عراق کوشتن.
باوگ و داڵگ روزا هەنای ناخاڵە بوینە، لە ئوردگای ئیرانی چەویان کەفتیەسە یەک، هەنای ئەوانیش لەورا ئاوارە بوینە، و دڵیان چیەسە یەکتر.
روزا وت: گەل و باوگ و داڵگم لەو مەوقەیلە ک لەدەس رژیم سەدام واینە، زیان فرەیگ وەخوەیان دینە.
"میرۆر" لە زوان روزا وت: هەنای بەددترین سەختی و تونەڕەوی و ململانەیش رفوو بوێ، هەمیش وڵاتەگە وە خراوە مەن، ومناڵەیلیش لە ورسگی مردیان، و ئابووری ویران بوی و مەردم کەفتنە وەر نەمان.
باوگی لە ساڵ ١٩٩٧ لە عراق دەرچگ، هەنای روزا هیمان مناڵ بوی، باوجی لە دیدار رووژنامەگە وت: داڵگی دویای خوەی وە چوار ساڵ رەسیە بەریتانیا، ئەوەیش وەڕی دەریا و ماشینەیل بارهەڵگر، و روزا بویە هاووڵاتییگ بەریتانی، و خیزانەگەی تا ١٨ ساڵ لە بلایموت جیگیر بوین، هەرچەن روزا ناچار بوی بچوودە ئیلفۆرد، خوەرئاوای لەندەن، ئەرا کارکردن.
روزا بەشیگ لە یادەیل دەرچینی لە عراق لە هویری مەنیە، ک نزیک بوی بمرێد هەنای لە کوردستان وەرەو تورکیا چگ، ک ئەو ماشین بارهەڵگرە ک لەناوی بوی، پەنچ گلە پلیا، ک رانندەگە لە خوەشی دەرچگنی لەدەس دەسەڵاتەیل گومرگ سەرخوەش بوی، و چیە خوینی کەسەیل فرەیگ، و بڕیگیش لەهووش خوەیان چگن، و خوین ئەو ناوە گردە وەر، باوجی روزا وەزنی مەن.
روزا و داڵگی لە شوینیگ ناوبەین شوین رانندە و چشتەیل ناو ماشینەگە خیپکە کردن، و ئەگەر لەو شوینە نەویاتان، وەنە لەی رویداوە قورتاریان نەوی، روزا هەمیش باس کەێد چوین چینە ناو دارسانەیل وەرجەیەگ پۆلیس بڕەسێد.
ئەوانەگ لەو رویداوە قورتار بوین، رەسینە بانزینخانەیگ خاوەنەگەی کوردە خەڵک تورکیا، و دەسمیەتییان دا و میوانییان کرد، و چگنیان وەرەو ئەنقەرە ئاسان کرد.
ئیجا روزا ناچار بوی وەبان دەریای ناوڕاس لە تورکیا خوەی بڕەسنێدە یۆنان، ک لەورەیش نزیکبوی نقوم بوود.
دویای رەدکردن ئەوروپا، خیزانەگە رەسیە بەریتانیا، ئەوەیش وەناو ماشینیگ بارهەڵگر، و ئەو مەوقە باوگ و داڵگ روزا زوان ئینگلیزی نیەزانن، و زیان لە قسەکردن وەگەرد مەردم دیرن.
روزا وتیش: گشت کارمان ئەوە بوی ک چشتیگ بەیمنە ئی وڵاتە چوینکە پیشوازی لەلیمان کرد، و خوەشمان لە کەلتور بەریتانیا هات، و لیوا بزانم حکومەت هەڵەی گەورەیگ کەێد ئەگەر ئی مەردم ئازا دویرەو بخەێد ک لەدەس مەرگ و ستەم هاتنەسە ئیرا، ک بایەتە لەی وڵات دووسدارە پیشوازی لەلیان بکریەێد، و دەرفەت وەپیان بیریەێد.
باس ئەوەیش کرد هەنای لە ساڵ ٢٠١٨ مکیسی کریا تا لەناو پەرلەمان قسە بکەێد، و باس زیان کورد و مافەیلیان بکەێد ک وەدرویژی میژوو نوو وەپشتگووش خریا، وتیش: من شانازی وە بنچینەیی کوردم کەم، و شانازییش کەم ک هایمنە بەریتانیا.
هەنای چگە ناو پێشبڕکێ شاجوان ئینگلترا، روزا وت: ئەوەسا چمە ناوی نەگ تا وەپیم بنووڕن، باوجی تا هەمیش گووش لەلیم بگرن، خوازم ئی پلاتفۆرمە وەکار بارم تا رووشنایی بخەمە بان ئەو نەهامەتیەیلە ک لەبان گەل کورد کەفتن.
راپۆرتەگە لە زوان خانمە وەڕیەوبەر پێشبڕکێ شاجوان ئینگلترا، ئینجی بیسلی وت: وە گەرمی پیشوازی لە روزا کەێد، و هەرکەس جویر خوەیە زیان فرەیگ لە سەختیەیل وەخوەی دیە، و ئومید خوازیمن وەخت خوەشیگ بوەێدە سەر.
