بازاڕ داعش.. هاوسه‌گيرى و نرخ ئافره‌ت له‌ناونى 30 و 150 دۆلار
وه چه‌واشه‌وه، به‌ڵكوو ئه‌و ريكخرياگ ترۆريستيه شانازى وه دويره‌وخستن ئافره‌ت ومناڵه‌يل پيكهاته‌ى ئێزيدى ئه‌كا له باكوور عراق.
داعش له مانگ ته‌شرين يه‌كه‌م ساڵ گوزه‌يشت له ژماره‌ى 4 گووڤاره دعايه‌كاره‌گه‌ى باوه‌ت ته‌ماميگ ته‌رخان كرد، ئه‌را باسكردن له‌بان ئى مه‌سه‌له.
ترۆريسته‌يل شانازى وه‌و باوه‌ته ئه‌كه‌ن له‌ژير ناونيشان"زينگه‌و به‌نه‌يه‌تى"، ئه‌ويش وه ئه‌وه‌گ داعش لايه‌نيگ له شه‌ريعه‌ت ئسلامى هاورده‌سه‌و ئه‌را ماناى بنه‌ڕه‌تى خوه‌ى ك مه‌ردم دويريه‌و خستنه.
داعش له‌و باوه‌ت دعايه‌كاريه وت: دوياى ده‌سگيركردن مه‌ردم و مناڵه‌يل ئێزيدى، وه‌گووره‌ى حوكم شه‌ريعه‌ت دابه‌شيان كريا له‌بان ئه‌و چه‌كداره‌يله ك به‌شدارى كردن له كرده‌وه‌و په‌لاماره‌يل شار شه‌نگاڵ.
ئافره‌ته‌يل و نرخه‌يل
ئمجا دوياى مانگيگ له دراوردن و بڵاوكردن ئه‌و باوه‌ته، ليستيگ ده‌رچى و له‌تى نرخ ئافره‌ت و مناڵه‌يل پيكهاته‌ى ئێزيدى ديارى كريا.
ئه‌و ليسته ك پيكهات له يه‌ك لاپه‌ڕه، ئه‌وه ده‌رخست ك ليژنه‌ى به‌يتولمال بار ئه‌و ڕى وشوون و نرخه‌يل ده‌سنيشان كردگه له‌باوه‌ت فرووشتن ئافره‌ته‌يل و مه‌رج كرد له‌بان ئه‌وانه‌گ سيننه‌يان پابه‌ند بوون وه‌و كاره و هه‌ر وه‌و خاتريشه هه‌ڕه‌شه له‌و كه‌سه‌يله دا سه‌رپيچى له‌لى بكه‌ن.
ئه‌و ليسته له هه‌مان وه‌خت ده‌سنيشان مناڵه‌يل ئێزيدييش كرد له‌وانه‌گ ته‌مه‌نيان ها ناونى يه‌ك ساڵان و 10 ساڵان، له كوڕ و دويه‌ت وه نرخ 150 دۆلار.
له‌وه‌رانوه‌ر ئه‌وه‌يش، دويه‌ته‌يل 10 ساڵان تا ته‌مه‌ن 20 ساڵانيش وه 100 دۆلار ئه‌را فرووشتن ده‌سنيشان كرد.
وه‌لێ ئافره‌ته‌يليگ ك ته‌مه‌نيان ها ناونى 20 و 30 ساڵان وه نزيكه‌ى 80 دۆلار فرووشيه‌ن و ئه‌و ئافره‌ته‌يليشه ك ته‌مه‌نيان ها ناونى 30 و 40 ساڵان وه نزيكه‌ى 40 دۆلار فرووشيه‌ن و ئه‌و ئافره‌ته‌يليشه ك ته‌مه‌نيان له 40 ساڵان فيشتره وه 30 دۆلار فرووشيه‌ن.
هه‌ر وه‌و خاتريشه بڕيگ ده‌نگ گومانكردن له وه‌رانوه‌ر ئه‌و ليسته په‌يا بوى، وه‌لێ وه‌رپرسه‌يل ناونه‌ته‌وه‌يى جه‌خت له‌ڕاسى ئه‌و مه‌سه‌له كردن.
ئه‌و ليسته دروشم "ريكخرياگ ده‌وڵه‌ت ئسلامى له عراق" وه‌پيه‌و بوى، ك له‌ڕاسى دروشم فه‌رمى داعش نيه، به‌ڵكوو ئه‌و ناوه بوى ك ريكخرياگه‌گه هاوردياده‌ى كار وه‌رجه ده‌سڵاتگرتن له‌بان بڕيگ له به‌شه‌يل خاك سوورى ك دوياخر ئه‌و دروشمه ئاڵشت بوى ئه‌را "ريكخرياگ ده‌وڵه‌ت ئسلامى له عراق و شام".
له‌وه‌رانوه‌ر ئه‌وه‌يش زه‌ينه‌ب بانغورا نوێنه‌ر ئه‌ميندار گشتى نه‌ته‌وه‌يل يه‌كگرتگ ئه‌را كاروبار تون وتيژى ره‌گه‌زى له ناوچه‌يل كيشه‌دار، جه‌خت له ڕاسى ئه‌و به‌ڵگه كرد و باس له‌وه كرد ك ئاگادار روينويسيگ له‌و به‌ڵگه بويه.
بانغورا يه‌يش ده‌رخست ك روينويسيگ تر له‌و ليسته كه‌فته‌سه ده‌سى ك نرخ فرووشتن ئافره‌ت و مناڵه‌يل پيكهاته‌ى ئێزيدى له‌تى بويه، ئه‌ويش له‌وه‌خت سه‌ردانى ئه‌را عراق له نيسان/ ئبريل ساڵ گوزه‌يشت.
بانغورا ئاماژه وه‌يه‌يش كرد ئه‌و ئافره‌ته‌يله له بازاڕ وه شيوه‌ى فرووشتن به‌رميل به‌نزين ئه‌فرووشيه‌ن و هه‌ميش وت: په‌نج يا شه‌ش پياويش ئه‌تويه‌نن وه گشتيانه‌و ته‌نيا يه‌ك ئافره‌تيش بسينن.
بانغورا باسه‌يل فريه‌يگ كرد له‌باوه‌ت بازرگانى وه دويه‌ته‌يل له عراق و سورياو وت: ئه‌وله‌ويه‌ت له‌ى باوه‌ته‌و ئه‌دريه‌ێده سه‌كرده‌يل له‌و ريكخريگه‌و ڕى وه‌پيان ئه‌دريه‌ێد هه‌ر دويه‌تيگ وه دڵ خوه‌يانه هه‌ڵوژنن له‌و دويه‌ته‌يل ده‌سگيركرياگه.
ئه‌و وه‌رپرس ناونه‌ته‌وه‌ييه هه‌ميش وت: ئه‌و ئافره‌ته‌يليشه ك كه‌س ناخوازێده‌يان، له مه‌زاد ئاشكرا له‌وه‌رده‌م مه‌ردمه‌يل ده‌وڵه‌مه‌ن ئه‌فرووشيه‌ن.
وه‌ل ئه‌وه‌يشا بانغورا باس له‌وه‌يش كرد و وت: چه‌كداره‌يل داعش جارجاريگيش ئافره‌ته‌يل ئه‌فرووشنه خيزانه‌يليان وه هه‌زاران دۆلار جوور فديه.
بانغورا وت: چه‌كداره‌يل داعش نويسنگه‌ى هاوسه‌رگيرييش ديرن و ده‌ليلنامه‌يش ديرن ئه‌را چوينێتى مامڵه وه‌ل ئه‌و ئافره‌ته‌يله‌و ليست فرووشتنيش وه‌پيان ديرن.
له‌ى باوه‌تيشه‌و، ريكخرياگ داعش له مانگ ئاب 2014 ده‌سكرده فرووشتن ئافره‌ته‌يل پيكهاته‌ى ئێزيدى وه‌شيوه‌يگ وه‌جه‌م، ئه‌ويش دوياى ده‌سگيركردن فيشتر له 2000 ئێزيدى له‌وه‌خت په‌لاماره‌يلى له باكوور عراق.
