کازمی ودەسکیشە تولەگان

موئیەد عەبدوسەتار
کازمی لە رەسینی ئەرا پای سەرۆکایەتی وەزیران سەرکەفت، دویای ئەوە ک سێ کاندید وەرجە خوەی لە بردن کورسی سەرۆکایەتی شکست هاوردن، یەکمین شکستکار عادل عەبدلمەهدی بوی، ک جەماوەر رەتی کرد لە وەخت نژی وەخشانەگەی ک وەپی سەردەمە لەناوچگەگەی کردەو، بیجگە کوشیان و زەخمدارەیل ک بوینە قوربانی لە مەیدان تەحریر، لوەر ك داوای خاسەوکردن و سزادان گەندەڵەیل كردن.
دویەم و سێەم سەرنەکەفتەیل لە وەرگردن پۆست سەرۆک وەزیران، محمد تەوفیق عەلاوی و عەدنان زورفی بوین، بلا کارەگەیان بخەیمنە کنار تا ئەوەنە پۆستیگ لە ئایندە وەرگرن.
نەگ لە نیاز کەشکولی، بەڵکم هیمان لەلای کازمی سەرۆک وەزیران لەوەختیگ سەرۆکایەتی وەرگردگە چشتیگ نەیمنە ک نوقڵانە وە بەڕنامەیگ ئاشکرا ودیار بیەێد، تا لەبانی ری بکەێد دژوە گەندەڵی و تاڵان دارایی گشتی، وکەمەوکردن مووچەیل مەلیۆنی ئەرا هەرکەسیگ لە سەرۆکایه‌تیەگان و وەزارەتەگان و ئەو پۆستەگان ک تەنیا خودا وەپیان زانێد، وئەوانەگ لەی زانستە رەسنەو.
ئی قەیران هاووەختیە وەل دەسڵاتداری لە عراق، لە رمانن چەتەیل سەدام لە ٢٠٠٣ چارەسەر جیگریگ تواێد لە فرە روو؛ یەکەمیان لەناوبردن گەندەڵی و دزی دارایی گشتی، ودویەمیان چارەسەر هەژاری وبیکاریە له‌ ناو گەنجەیل.
ئەوەیش ئەنجام نیدریەێد وەبی ئامادەکردن گورجیگ ووەکارهاوردن هێز جەماوەر پشتیوان تا هاوکار بوود ئەرا بڕیاردان زوینە، وە هاوردنەوەی پویلە تاڵان کریاگە، و وەیاساکردن مووچە بەرزەگان، و وسانن مووچەیل (فەزائی – بن دیواری)، وه‌ ئه‌ڵگرتن گامەیل پێوست و زوی وەزوی ئەرا لەناوبردن گەندەڵی و بەرتیل، وکارکردن لەبان هاوردنەوەی عراق ئەرا ریە راسەگە، وبڵاوکردن دەسپاکی لە دامەزراوه‌یل دەوڵەت وفەرمانگە وەرپرسەگان.
رینماگەی کازمی دەربارەی مووچەیل رەفحا ئومیدیگ پەیا کرد، ک سەرۆک وەزیران ئازایی داشتوود وەگورەی خواست، وبڕیارەیلیگ جیەوەجیکەر دەربکەێد لە رۆتین فەرمانبەری دەرچوود، وسزای گەندەڵەیل بیەێد وەسەختی، وهویچ ئاسانکارییگ لەباوەت تاوانبارەیل دزی له‌ دارایی گشتی نەکێد.
هەوڵدانەگەی کازمی وەگەرد گەندەڵی وخراوی وەڕیەوبردن وە شیوەی وەکارهاوردن دەسکیش تولین ودەرکردن بڕیار ک وەسەرخوەی ریکەێد، هیلێدەی بوودە پەڕیگ هەوا بوەێدەی، وبیدەسڵات مینێد ئه‌را وه‌ده‌سهاوردن ئومید جەماوەرە فرەگە ک چەوەڕی ئاستە خوارینەی ژیان ئاسودەیی کەن، لە خاکیگ بی بەدبەختی ونەداری، عراقیگ ك هەر روژیگ مەلیۆنها بەرمیل نەفت فروشێد، وپویلەگەی جوور پویش باڵەوگرێد وەرەو ریشەیل فشەوبوی و زگەیل پەنەمیاگ ومەغزەیل دروکانی.