پیشكه‌فتن هه‌ولێر و دویاكه‌فتن به‌غدا
توركى و تووپه‌یل ئیرانى له‌ناونى ماوه‌یگ و ماوه‌یگ تر وه‌مه‌هانه‌ى په‌لامارداین سه‌نگه‌ره‌یل پارت كارگه‌ره‌یل كوردستانى توركى(په‌كه‌كه)و پارت ژیان ئازاد كوردستان (پژاك)، وه‌لى هه‌ولێر پایته‌خت هه‌رێم كوردستان و پاریزگایه‌یل تر وه‌ك دهۆك و سلێمانى، پیشكه‌فتن وه‌رچه‌ویگ وه‌پیانه‌وه دیاره له‌گشت مه‌یدانه‌یل خزمه‌تگوزارى و له‌وانه‌یش: پرووسه‌یل وه‌به‌رهاوردن گه‌شتیارى ك له‌ى پاریزگایه‌یله كریه‌یگه‌دى و پڕن له‌كویه‌یل سه‌وز و هه‌وارگه‌و دووڵ و چه‌م و كانیاوه‌یل و گشت دیمه‌نه‌یل جوان سروشتى، وه‌و ئومیده ك زه‌وى و ئاسمانى ركابه‌رى(منافسه)ى (دوبه‌ى) پایته‌خت میرنشینیه‌یل یه‌كگرتگ عه‌ره‌بى بكا.
له‌شوون چه‌ن ساڵیگ تر، وه‌تایبه‌ت دویاى ده‌ركردن قانوونه‌یل وه‌به‌رهاوردن له‌هه‌رێم كوردستان عراق، دى واقع و ریڕه‌و هه‌رێم كوردستان له‌كه‌س نیه‌شاریه‌یگه‌وه‌و دى وه‌ئاشكرا ئاست سه‌قامگیرى و پیشكه‌فتن و ڕاده‌ى سه‌ركه‌فتن له‌ڕوى خزمه‌تگوزاریه‌وه له‌تى كریه‌یگه‌دى، ئه‌ویش وه‌گووره‌ى كۆنترۆڵكردن ئاسایش و پیشكه‌فتن له‌جموجویل بنیاتناین و ئاوه‌دانى و هاتن كومپانیایه‌یل جه‌هانى و عه‌ره‌بى ئه‌را وه‌به‌رهاوردن له هه‌ولێر پایته‌خت هه‌رێم و ناوچه‌یل ده‌وروه‌رى. ك ئه‌ویش په‌یابوین 22 كۆمیساریه‌تى(قنصلیه) له‌لى كه‌فته‌وه له‌كوردستان.
بیگومان ئمڕوویش ناو هه‌ولێر له‌ڕووژنامه‌یل جه‌هانى بریه‌یگ و گشت ده‌وڵه‌ته‌یل چه‌و بڕینه‌سه بان هه‌ولێر، ئمجا وه‌گووره‌ى ئه‌و پیشكه‌فتن وه‌رده‌وامه له‌گشت مه‌یدانه‌یل ژیانه‌وه، هه‌ولێر كرده‌سه پایته‌خت ته‌ندروسى(العاصمه الصحیه)ئه‌را عراق، وه‌جووریگ نه‌خوه‌شخانه‌یل تازه‌ى تایبه‌ت له‌هه‌رێم په‌خش بووگ و ده‌رمانگه‌یلیش ئه‌را گشت عراقیه‌یل دابین ئه‌كا، وه‌ل ئه‌وه‌یشا هه‌ولێر بویه‌سه پایته‌خت وه‌رزشى عراق. وه‌لى له‌لایه‌ن گه‌شتیاریه‌وه، دیاره گه‌شت وگوزار له‌هه‌رێم هه‌میشه وه‌ره‌و به‌رزى گام نه‌یگ له‌وه‌رزه‌یل تاوسان و شاند یا وه‌فده‌یل گه‌شتیاریش له‌گشت ده‌وڵه‌ته‌یل و ناوچه‌یل عراقه‌وه شماره‌ى فره‌یگ ڕوى له‌هه‌رێم كه‌ن ئه‌را وه‌سه‌ربردن وه‌خته‌یل خوه‌ش له‌و سروشت سحراوى هه‌رێم كوردستان عراقه‌و هه‌یواین له‌ده‌س گه‌رمى تاوسان. ئمجا جویر ئه‌وه‌ك ئاشكراو دیاره ك خیزانه‌یل له‌هه‌ولێر شه‌وانه تاده‌مه‌وسوو نیشن له‌ناو ئاشخانه‌و چایخانه‌یل شاره‌گه‌و گووش گرنه گورانیه‌یل كوردى و عه‌ره‌بى، له‌جیاى ئه‌وه‌ك گووش بیه‌نه ده‌نگ ته‌قینه‌وه وه‌ڕووژانه یا شه‌وانه. ڕووژه‌یل (دوشه‌ممه‌و په‌نجشه‌ممه)یش جاده‌یل كوردستانى وه‌سویر رازیه‌نه‌وه‌و سه‌یاره‌یل وه‌گوڵ و ڕه‌نگاوڕه‌نگ ئاماده كریه‌ن ئه‌را جیوازكردن وه‌وى و زاوا ئه‌را ناو یه‌كیگ له میوانخانه‌یل جوان یا ئه‌را هه‌وارگه‌یل ده‌وروه‌ر شاره‌گه جویر(هه‌وارگه‌ى سه‌ڵاحه‌دین) یا(شه‌قڵاوه) یا(بێخاڵ) یا(جندیان). وه‌لى له‌به‌غداو شوونه‌یل ده‌وروه‌رى ڕووژیگ نیه ده‌نگ ته‌قینه‌وه‌ى جووراوجوور نه‌ژنه‌فیه‌یگ ، ك ده‌رئه‌نجامیش زه‌ره‌د فره‌یگ ماددى و گیانى له‌لى كه‌فیگه‌وه، ئه‌یه بیجگه له‌نه‌وین ئاسایش و سه‌قامگیرى و خزمه‌تگوزارى و هه‌وه‌جه‌یل تر ژیان و گومبوین ئومید له‌له‌لاى به‌غدادیه‌یل ك ڕووژ وه‌ڕوو وه‌ره‌و دویا چووگ.
