وه‌ل یادگارى خه‌باتكه‌ره‌یلا
شووڕش ، پیاوه‌یلیگ ك خوین خوه‌یان كردنه قوربانى له‌وه‌ر خاتر به‌رزه‌وكردن وشه یا كه‌لیمه‌ى كورد و كوردستان ، به‌ڵى ئه‌وانه نواڕه‌و یه‌كم بوینه ك ده‌ور داشتنه له‌گشت مه‌یدانیگه‌وه . ئمجا ئیمه‌یش هه‌وڵ ئه‌وه ده‌یم رووشنایى بخه‌یمنه بان ژیان به‌عزیگ له‌و خه‌باتكه‌ره‌یله تا یادگارى رووژه‌یل خه‌باتیان بارنه هویر و بوونه ده‌رسیگ ئه‌را ئى نه‌وه‌و ئه‌ڕا نه‌وه‌یل ئاینده .
بیگومان له‌شوون هه‌ر سه‌ركه‌فتنیگ ملله‌ته‌گه‌مان ك هه‌رێم كوردستان ره‌سیه پى له‌گشت لایه‌نیگه‌وه ، پیاوه‌یلیگ بوین ك مووم شووڕش كوردى ده‌مدان تا ریگه‌ى وه‌رده‌م نه‌وه‌یل رووشناوه بووگ ئه‌را ئاینده‌ى دویر و دریژ بى كووتایى .
دیدار ئیمه وه‌ل ریزدار روسه‌م یاسین ساڵح بوى خه‌ڵك شار خانه‌قى ، ك وه یادگاریه‌یل كویه‌ن خوه‌ى به‌یگه‌مانه دویاوه ئه‌را ئه‌و رووژگاره‌یله ك ئنتما كرد ئه‌را حزب دیموكرات كوردستان له‌ساڵ (1951) له‌وه‌ختیگ كارگه‌ر بویه له نه‌فتپاڵوو (وه‌ند) ، ئمجا له‌و هاوڕى و دڵسووزه‌یل خه‌باتكه‌ریشه ك وه‌لیا بوینه خه‌یگه هویر و له‌وانه‌یش ڕه‌حمه‌تى (عه‌زیز پشتیوان) و (محه‌مه‌د جاف) ناسریاگ وه محه‌مه‌د به‌رید و كه‌سه‌یل تر ك له‌ى دونیا ماڵئاوایى كردن .
كاك روسه‌م یاسین وه‌سه‌به‌ب خه‌بات سیاسى ده‌سى له‌كار ده‌ركردن ئه‌را ماوه‌ى ساڵیگ تابچووگه ڕز سوپاى به‌عس فاشى بیكارى ، ك هه‌رچه‌نى ته‌نیا هه‌ر خوه‌ى له‌خیزانه‌گه‌ى كاركردیاگ ئه‌را ژیان رووژانه‌یان و تیكه نان مناڵه‌یلى ده‌سه‌وه‌ر كردیاگ . ئمجا دویاى ئه‌وه‌یش ئه‌وه بوى له‌ساڵ (1974) له‌لایه‌ن حزب دیموكرات كوردستانه‌وه كاندید یا ته‌رشیح كریا ئه‌را سه‌رۆكایه‌تى سه‌ندیكا یا نقابه‌ى كارگه‌ره‌یل نه‌فت ، له‌شوون سه‌رنه‌كه‌فتن ریككه‌فتننامه‌ى (11) ئادار وه‌ل حكوومه‌ت مه‌ركه‌زى ئه‌و سه‌رده‌مه ، په‌یوه‌ندى كرده ڕزه‌یل شووڕش و ناچار بوى خیزانه‌گه‌ى جیواز بكا له‌خانه‌قین ئه‌را ئه‌و شوونه‌یل ك له‌كوردستان ئازاد كریاوین ، وه‌لى هه‌رچى ناوماڵه داشت گشتى بریاو تاڵان كریا ، ئمجا له‌شوون ریككه‌فتننامه‌ى جه‌زایر هاته‌وه ئه‌را خانه‌قى تا جیواز بووگ ئه‌را شار به‌سره ، دى له‌و شوونه مه‌نده‌وه له‌ساڵ 1975 تا 1989 تا وه‌خت خانه‌نشینى (تقاعد) . وه‌لى له‌باوه‌ت یادگاریه‌یلى له‌شار به‌سره ئویشیگ : له‌ڕاسى مه‌ن دویره‌وخریاگ بویم نه‌ك كارمه‌ند ، چوینكه گشت وه‌ختیگ وه‌تایبه‌ت شه‌وه‌كى و ئیواره بایه‌سه بچیاتام ئه‌را دایره‌ى ئه‌من له‌وه‌ر خاتر ئه‌وه‌ك بزانستان وجوود دیرم له‌ناوچه‌گه‌و بیجگه ئه‌وه‌یش بایه‌سه گشت وه‌ختیگیش ئمزا بكردام له سجلات ئه‌من و ئه‌را هه‌ر شوونیگیش بچیاتام پرس و پرسكارى فره‌یگ وه‌لما كریا له‌لایه‌ن ئه‌منه‌وه‌و هویچ وه‌ختیگ ئازاد نه‌ویم .
وه‌ى جووره ئه‌و پیاوه‌یل خه‌باتكه‌ره هه‌وڵ و ته‌قلاى خوه‌یان خستیانه كار و له‌شوڕشه‌یل كورد به‌شدارى بى وچان كردیان ئه‌را ئه‌وه‌ك ملله‌ت بڕه‌سننه گووشه‌ى ئازادى و سه‌رفرازى و نه‌وه‌یل دویاى خوه‌یان ده‌رس له‌لیان وه‌ربگرن ، ك بیگومان ئى جووره كه‌سه‌یله قه‌ڵغان بته‌ویگ بوینه له‌ڕوى دوشمنه‌یل كورد و كوردستان و هه‌میشه مایه‌ى ڕیز و حورمه‌تن .
