هاوسه‌نگى له ناونى بارزانى و عه‌بدولمه‌هدى
سوبحى ساڵه‌يى/ جياوازى له‌وه نيه ك ناوچه‌گه له‌بان گڕكان ژيه‌ێد، ئه‌وه‌گ له‌ناونى ئه‌مريكاو ئيرانيش روێ ئه‌ياد زنجير دراماى پشى و مويشه‌يل نيه، يا وازى مار و پله‌كانه، عراقيش وه حوكم پايه‌و په‌يوه‌نديه‌يل تێكه‌ڵ وه‌ل هه‌ردوگى جوور ناوه‌نديگه ئه‌را زه‌ويه‌له‌رزه‌ى پيشبينيكرياێ ته‌قياگ، ك له‌ناونى شه‌و و رووژيگ ئه‌دێده زه‌ردمه‌ن يه‌كه‌م و گه‌ورا له به‌رپايونى له ئيسه‌و دوياو جياوازييش نيه له‌وه‌گ ك ئيسه عراق له‌گشت وه‌ختيگ زياتر هه‌وه‌جه‌ى فريه‌ى ديرێد ئه‌را ئاشته‌وايى كۆمه‌ڵگه‌يى.
وه‌ل ئه‌وه‌يشا دوينيم ك بڕيگ له سياسيه‌يل و نوێنه‌ره‌يل و نويسه‌ره‌يل وه چه‌واشه‌ى هه‌ر يه‌ك له سياسيه‌يل و نوێنه‌ره‌يل و نويسه‌ره‌يل له جه‌هان، هانه وه‌رده‌م حاڵه‌تيگ له به‌رز و نزمى ره‌فتارێ و نازانن يا ناخوازن بزانن وه‌پى له‌وه‌ر كه‌مى له شاره‌زايى و نه‌ياشتن ديد ستراتيجى ئاينده وه‌پى بوينن، ك كه‌فنه وه‌ر گوما و فكره‌يل جياجيايگ و له خه‌ياڵيان سوێڕ ئه‌خوه‌ێد و په‌يوه‌س ئه‌دێده دڵه‌يل كزيان وه په‌رده‌ى پيلان و چه‌وه‌ڕێ روێداگه‌يل ئه‌كه‌ن و تواناى جياكارى ناونى مه‌رزه‌يل لياقه‌ت نه‌يرن ك دبلۆماسيه‌ت و وه‌رپرسيارێتى لێدوان ئه‌را هووكاره‌يل ره‌سانن هه‌وه‌جه وه‌پى ئه‌كا، دى له‌ناونى ساز كويه‌ن و پڕه‌وبوين تايبه‌ت و ئرتجالى وشه‌و گوزارش هاوشيوه‌و د و بڕبڕ له زوورمى ده‌رئه‌خه‌ن.
هه‌ناى ك ريزدار عادل عه‌بدولمه‌هدى سه‌رۆك وه‌زيره‌يل باس له‌وه كرد ك حكومه‌ته‌گه‌ى پابه‌ند ئه‌دێ وه ياساى بودجه‌و مووچه‌ى كارمه‌نده‌يل هه‌رێم، دونيا له دژى وسياو له‌وه‌ر ته‌سكنيى پرسياره‌يل و شاردنه‌وه له‌پشت دروشمه‌يل ناوه‌جێ ده‌سكردنه هه‌وڵدان فريگ ئه‌را دوينستنه‌وه‌ى دروو له‌وه‌ر دروسكردن قه‌يران و به‌هه‌مهاوردن گرفته‌يل تازه‌يگ په‌يوه‌س وه گوزيشت پڕ له‌ژان و تيكه‌ڵكرنى وه‌ناو بودجه‌ى ساڵانه‌و ناپووشرياى وه نهێنى و حوكمكردن وه به‌ش هه‌رێم، ك مه‌ردمانيگ فريه دوير گام نان و ئاشكراى خوه‌يبه‌خشى كردن ئه‌را وسيان وه‌رانوه‌رى و رمانن خوه‌ى و حكومه‌ته‌گه‌ێ و نه‌فره‌ت له ريككه‌فتن و دووسى و ئاشته‌وايى كۆمه‌ڵگه‌يى كرد وه‌گشت شيوه‌يگى، وه‌بى هويره‌وكردن له كيشه‌و گرفته‌يل و له‌كيسداين قسه‌و بڵاوكردنه‌وه‌ى كه‌راهيه‌ت و گرفت و گومان و وه‌بى ئه‌وه‌گ بزانن ك هويچ كه‌سيگ ناتويه‌نێد قه‌ناعه‌ت وه ئاقڵه‌يل بكا وه مه‌سه‌له‌يگ و دژه‌گه‌ى له هه‌مان وه‌خت، يا ته‌نانه‌ت دويره‌وخستنى له شيه‌وكردن مه‌نتقى، يا باوه‌ڕهاوردن وه فكره‌يگ چه‌واشه‌و ناجوور وه‌ل داواكاريه‌گه‌ى.
عادل عه‌بدولمه‌هدى مشتومڕه‌گه ئاشكراوه كرد له‌باره‌ى بودجه‌ى كوردستان هه‌ناى ك وت: نه‌فت له هه‌رێم وه‌رنه‌گرتيمنه‌و به‌ش كوردستان وه ته‌واوى نه‌يايمنه، يه‌يش ده‌رخست ك حكومه‌ته‌گه‌ى مووچه‌و هه‌قده‌سه‌يل هه‌رێم كوردستان ئه‌ياد وه‌گووره‌ى بودجه‌و ئه‌و به‌شه‌گه‌ى تر نايه‌ێد چوينكه ياساى بودجه پاپه‌ندى كردگى وه بڕين له‌جياى ئه‌و 250 هه‌زار به‌رميل رووژانه له نه‌فته‌گه‌ێ. ئه‌وه‌گ عه‌بدولمه‌هدى وته‌ى ديار و ئاشكراس و هويچ سووزدارى يا نه‌رمييگ يا ته‌فريتيگ له‌تى نيه.
ئه‌وه‌كيش نێچيروان بارزانى سه‌رۆك هه‌رێم كوردستان وته‌ى: له‌ڕوێ مه‌بده‌ئه‌و وت: هويچ كيشه‌يگ نه‌يريم له راده‌سكردن 250 هه‌زار به‌رميل رووژانه له نه‌فت وه به‌غدا و له به‌غدايش وه‌ل سه‌رۆك وه‌زيره‌يل له‌ى باوه‌ته‌و قسه كردم و بايه‌سه ئى باوه‌ته تاووتوێ بكريه‌ێد و مه‌سه‌له‌گه ته‌نيا په‌يوه‌س نيه وه راده‌سكردن 250 هه‌زار به‌رميل، به‌ڵكو مه‌سه‌له‌يليگ ياسايى هه‌ن، چوينكه بڕين به‌ش كوردستان له بودجه له‌ساڵ 2014ه‌وه بويه هووكار كه‌ڵه‌كه‌بوين قه‌رزه‌يل له‌بان هه‌رێم كوردستان و هه‌ر بايه‌سه له‌ى باوه‌ته‌و قسه بكريه‌ێد تا بڕه‌سيمنه چاره‌سه‌ريگ ئه‌را نه‌خوه‌شى هه‌رێم كوردستان و به‌غداو گرنگيش ئه‌وه‌سه هه‌ردوگلا ميكانيزميگ بوينيمنه‌و ئه‌را ريككه‌فتن له‌بان مه‌سه‌له‌گه‌و هه‌رێم كوردستانيش ئاماده‌س ئه‌را هه‌ماهه‌نگى ته‌واويگ وه‌ل به‌غدا له‌وه‌ر ره‌سين ئه‌را ئه‌نجاميگ هاوبه‌ش ك هه‌ردوگلا رازێ بكا. ئى قسه‌يشه مه‌نتقى و پڕ دقه‌ت و ئاشكراس و هويچ زيايه‌و كه‌ميگ ئه‌راى دانه‌رياگه له‌باره‌ى ئه‌وه‌گ له ياساى بودجه هاتگه.
ئمجا له‌ناونى ئه‌وه‌گ بارزانى و عه‌بدولمه‌هدى وتنه‌سه‌ى، ئاژا‌وه‌نه‌ره‌يل و خاوه‌ن هه‌ڵويسته‌يل ناوه‌جێ و ناكووكيكه‌ره‌يل و ياخيبويه‌يل و ئه‌وانه‌گ له مه‌جڵس ئاقڵه‌يل نه‌نيشتنه‌و ئه‌وانه‌گ باوه‌ڕ وه ده‌ستوور و ياسايه‌يل و نه‌ريته‌يل په‌يڕه‌وكرياێ ناونى ملله‌ته‌يل نه‌يرن له‌پشت دروشمه‌يل ناڕه‌وا، خوه‌يان شارنه‌و له‌وه‌ر شيوانن بارودوخ و هه‌ڵخه‌ڵه‌تانن راى گشتى و ئه‌زيه‌تداين ملله‌ت عراقى.
