كیشه‌ى كورده‌یل فه‌یلى وه وژدانه‌وه له‌لایه‌ن دادگاى باڵاى تاوانه‌یل عراقى
ئه‌نجامداین تاوان و كووچ وه‌پیكردن كورده‌یل فه‌یلى ك پیكهاته‌یگ كویه‌ن عراقن. ئه‌و كاره‌ساته‌یله وه له‌ناوبردن وه‌جه‌م(جینۆساید) و تاوان دژ ئاده‌میزاد دانریا له‌دویاى ئه‌وه‌ك ئه‌و تاوانه‌یله له‌بان چه‌سپیا. ئمجا فره خوه‌شحاڵیم و له‌هه‌مان وه‌ختیش حورمه‌ت فره‌یگ له بڕیار دادگا گریم و دادوه‌رى یا عه‌داڵه‌ت دادگاى تایبه‌ت وه به‌رز دوینیم وه‌تایبه‌ت هه‌ڵویسته‌یل دادوه‌ر محه‌مه‌د عه‌بدولساحب كه‌عبى له ده‌ركردن ئى بریار عادڵانه.
ئیمه‌ى كورده‌یل فه‌یلى له‌و كه‌سه‌یله نیم ك تووڵه یا ئنتقام بكه‌یم، به‌ڵكوو توایم وه گووره‌ى قانوون هه‌ق سه‌ربكه‌فیگ و سزاى دادپه‌روه‌رانه‌ى ئه‌و تاوانباره‌یله بدریه‌یگ ك تاوانه‌گه له‌بانیان چه‌سپیا وه‌گشت باوه‌ڕیگمانه‌وه.
بیگومان جویر ئه‌وه‌ك گشتمان زانستیم، ك تاوان سه‌ندنه‌وه‌ى شوناسنامه‌ى عراقى و كووچ وه‌پیكردن زووره‌ملى ده‌رهه‌ق وه زیاتر له نیم ملیۆن عراقى له‌وانه‌ك خاوه‌ن شوناسنامه‌ى عراقى بوین ئه‌را ده‌یشت وڵات خوه‌یان و بیجگه ئه‌وه‌یش كوشتن بیتاوانه‌یل وه‌بى ئه‌وه‌ك هویچ تاوانیگ داشتوون یا وه‌بى دادگاییكردن، گشت ئه‌یانه جویر ئه‌وه‌ك سه‌رۆك ئه‌نجومه‌ن وه‌زیره‌یل نورى مالكى ئشاره‌ت وه‌پى كرد ئه‌قڵ نیه‌ڵگریگه‌ى ك ته‌نیا په‌نج كه‌س له‌و تاوانباره‌یله ئى هه‌مگه تاوانه‌یله ئه‌نجام دانه وه گووره‌ى بڕیار ئه‌نجوومه‌ن سه‌ركردایه‌تى شووڕش رمیاگ 666 له 7 / 5 / 1980و بڕیاره‌یل تر، چوینكه ئه‌یانه‌یش له‌ناونى ئه‌و گرووپ سه‌ركردایه‌تیه بوین وه‌ل باقى ئه‌ندامه‌یل و سه‌رۆك ئه‌نجوومه‌ن سه‌ركردایه‌تى شووڕش رمیاگا ك سه‌رپه‌رشى جى وه‌جیكردن ئه‌و تاوانه‌یل گه‌ورا كردن ده‌رهه‌ق وه‌و عراقیه‌یل بیتاوانه ك هویچ تاوانیگ یا گوناهیگ نه‌یاشتن و زوڵم له‌لیان كریا. بیگومان گشت كه‌سیگ ئه‌و راسیه زانن ك وه‌رپرسه‌یل و داروده‌سه‌ى رژیم ده‌سڵاتدار له وه‌خت خوه‌ى وه‌گشت وزاره‌ته‌یل و ده‌زگایه‌یل وه‌ڕیه‌وبردن و دارایى و ئه‌منى و عه‌سكه‌رى ره‌سمى له‌گشت ئاستیگ وه كرده‌وه به‌شدارى له‌ئه‌نجامداین ئه‌و بڕیار و تاوانه‌یله كردن و زوورمیانیش قانجاز پویلى كردن له‌و كاره‌ساته وه شیوه‌ى جووراو جوور وه‌ك داگیركردن ماڵ و موڵكه‌یلیان و پویله‌یلیان له بانك و چشته‌یل تر. وه‌لى ئیسه چه‌وه‌ڕى ئه‌وه كریه‌یگ ك ئه‌نجوومه‌ن نوێنه‌ره‌یل عراقى بڕیاریگ به‌یگ له‌وه‌ر خاتر ڕیز گرتن و حورمه‌تناین(رد اعتبار) له قوربانیه‌یلمان جویر ئه‌وه‌ك ده‌رهه‌ق وه قوربانیه‌یل حزب ده‌عوه‌ى ئسلامى و قوربانیه‌یل كوردستان عراق نریاو شه‌هیده‌یل كورد فه‌یلییش وه شه‌هید عراق بشماریه‌یگ و جویر ئه‌و باقى شه‌هید پیكهاته‌یل تر بكه‌فنه وه‌ر قانوون و گشت هه‌قیگ ئه‌را كورده‌یل فه‌یلى بایگه‌وه له‌ناو عراق و له‌ده‌یشت عراق و بیجگه ئه‌وه‌یش گشت به‌ڵگه‌و ماڵ و موڵكه‌یل زه‌فتكریاگیان بدریه‌یگه‌وه ك رژیم وه‌رین له‌لیان زه‌فتى كرد.
وه‌ل ئه‌وه‌یشا چه‌وه‌ڕى ئه‌وه‌یش كه‌یم ك كار خاسیگ بكریه‌یگ ، له‌وه‌ر خاتر ئه‌وه‌ك ئه‌نجوومه‌ن نوێنه‌ره‌یل عراقى بڕیاریگ ده‌ربكا وه نه‌هیشتن یا له‌غوكردن بڕیار شماره 666 له‌تاریخ 7 / 5 / 1980 وه‌ل گشت ئه‌و به‌نده‌یله ك په‌یوه‌سن وه‌پیه‌وه له‌گشت مه‌یدانیگه‌وه‌و نه‌هیشتن گشت ئه‌و بڕیاره‌یلیشه ك له‌شوون ئه‌و بڕیاره ده‌رچى ك ئامانج له‌لیان له‌ناوبردن كورده‌یل فه‌یلى و كوومه‌ڵگایه‌یلیان بوى له‌بنه‌ڕه‌ت و ته‌رفتوین كردن ئى پیكهاته‌ى دڵسووزه ئه‌را وڵاته‌گه‌یان ك له‌وه‌ر خاتر ملله‌ته‌گه‌ى قوربانى فره‌یگ دان.
وه‌ل ئه‌وه‌یشا هه‌ڵویست به‌رز سه‌رۆك (مه‌سعود بارزانى) به‌رز گریم ئه‌را ئه‌و به‌یانه ك له‌تى خوه‌شحاڵى خوه‌ى وه بڕیار دادگاى باڵاى تاوانه‌یل نیشاندا، وه ئه‌وه‌ك ئه‌و تاوانه‌یله ك ده‌رهه‌ق وه كورده‌یل فه‌یلى ئه‌نجام دریانه، له‌ناوبردن وه‌جه‌م(جینۆساید)ه وه‌ك ئه‌و تاوانه‌یله ك رژیم وه‌رین ئه‌نجامى دا له ئه‌نفالكردن و كیمیاواران هه‌ڵه‌بجه.
(یه‌كێتى دیموكراسى كورده‌یل فه‌یلى)
