كیشه‌ى به‌هره‌داره‌یل
خوه‌ى و ملله‌ته‌گه‌ى توومار بكاو شوونه‌واریگ داشتووگ تا وه‌گووره‌ى ئه‌و شوونه‌واره یاد بكریه‌یگ و له‌هویره‌و نه‌چووگ له‌بانان یا له‌ڕووژگار دویاى خوه‌ى، دى ئه‌و شوونه‌واریشه ئه‌وه‌سه ك داناین(أبداع)داشتووگ له‌و مه‌یدانه‌وه ك سه‌رڕشته‌و به‌هره له‌لى دیریگ ، فره‌جاریش دوینیم كه‌سه‌یلیگ هه‌ن وڵاتیگ له‌داناین یا ئبداع دیرن، وه‌لى نوڕید گرینگى یائه‌همیه‌ت وه‌خوه‌ى نیه‌یگ و نیه‌لیگ كه‌سه‌یل تریش له‌و به‌هره‌یه كه‌ڵگ وه‌ربگرن، هه‌ڵبه‌ته یه‌یش هووكار تایبه‌ت خوه‌ى دیریگ و شایه‌ت نه‌تویه‌نیگ له‌ڕوى خه‌رجه‌وه كتاویگ یا دیوانیگ شعرى بڕه‌سنیگه چاپ.
ئمجا له‌ى باوه‌ته‌وه تویه‌نیم بویشیم جى داخه ك تائیسه له‌وڵاته‌گه‌ى خوه‌مان ده‌رفه‌ت خاسیگ نه‌دریاسه به‌هره‌داره‌یل له‌ڕى چاپكردنه‌وه په‌یام خوه‌یان بڕه‌سنن، دیاره په‌یوه‌ندیداره‌یلیش هویچ گرینگى یا ئه‌همیه‌تیگ نیه‌نه مه‌سه‌له‌گه‌و شایه‌ت نه‌زانن ك هه‌ر به‌رهه‌م یا داناین تازه‌یگ له‌نك قه‌ڵه‌مه‌وه ده‌ربچووگ زانیارییگ زیاتر و ئه‌ده‌بیگ تازه‌تر و زانستیگ پوخته‌تر وه‌ل خوه‌یا تیه‌ریگ ، بیگومان ئى له‌وه‌رچه‌ونه‌گرتن و پشتگووشخستنیشه مشته‌كووڵه‌یگه‌و دریه‌یگ له هه‌نگڵ ڕووشنهویر و به‌هره‌داره‌یل. ئمجا ئایا چ زه‌ره‌دیگ دیریگ ئه‌گه‌ر ملله‌ته‌گه‌د زیاتر ده‌وڵه‌مه‌ن بووگ و ڕووشنهویر و به‌هره‌داریگ زیاتر داشتووگ؟
ئیمه‌ى كورد به‌هره‌داره‌یل فره‌یگ دیریم له‌گشت مه‌یدانه‌یل شعر و هونه‌ر و ئه‌ده‌ب و زانست و ته‌كنۆلۆجیا....هتد، وه‌لى نیه‌تویه‌نن بڕه‌سنه مه‌رام و پشتگیرى خاسیگ له‌لیان نیه‌كریه‌یگ و ده‌زگاى تایبه‌تیگ نیه ئه‌را ئه‌وانه‌ك به‌هره‌دارن و له‌هه‌مان وه‌خت نه‌دارن و له‌ڕوى ماددیه‌وه فه‌قیرحاڵن و توان كتاویگ و بڕه‌سننه چاپ یا داناین وئبداع خوه‌یان نیشان بیه‌ن، تایه‌كسه‌ر وه‌بى واسته‌كارى و خاترانه ڕوى له‌و ده‌زگا بكه‌ن و ئه‌گه‌ر باوه‌ته‌گه‌یان له‌ژیر له‌یه‌كه‌وداین و شیه‌وكردن ده‌رچى و شایسته‌ى په‌خشكردن بوى، خه‌مسه‌ردى له‌لى نه‌كریه‌یگ و(كتابناو كتابكم)نه‌وگ و یه‌كسه‌ره ڕه‌زامه‌نى له‌بانى بدریه‌یگ وه‌مه‌رجیگ تا كابرا خوه‌ى زنگه كارى جى وه‌جى بكریه‌یگ نه‌ك وه‌بار خه‌مه‌وه بچووگه ژیر خاك و ئه‌وسا هه‌وڵ چاپكردن ده‌سنویسه‌گه‌ى بدریه‌یگ ، له‌هه‌مان وه‌خت جى ده‌سخوه‌شیه ك ده‌زگاى ئاراس له‌هه‌ولێر و ده‌زگایه‌یل تر ڕووشنهویرى گام خاسیگ نانه له‌ى باوه‌ته‌وه، وه‌لى لایه‌نه‌یل په‌یوه‌ندیدار ناوچه‌یى و ده‌سڵاتداره‌یل دڵخوه‌شى نیه‌نه به‌هره‌داره‌یل و ده‌س یارمه‌تى ئه‌ڕایان دریژ نیه‌كه‌ن وه‌ئاسانى كاریان بچووگه ڕییه‌وه، چوینكه ئمڕوو ئه‌گه‌ر هات و كه‌سیگ به‌هره‌دار وه‌ئاسانى دیوانیگ شعرى یا كتاویگ تاریخى یا داستان و رۆمانیگ ئه‌ڕاى چاپكریا له‌لایه‌ن ده‌زگایه‌یل چاپه‌مه‌نى حكوومه‌ته‌وه، ئه‌وه بیگومان بووگه هانداین ئه‌را به‌هره‌داره‌یل تر و دى دڵته‌نگى(یأس) نیه‌گریگه‌یان و ئه‌وانیش وه‌رده‌وام بوون له‌بان داناین و هویره‌وكردن، چوینكه هه‌ر نه‌وه‌یگ ده‌نگ و ڕه‌نگ خوه‌ى دیریگ و مامڵه وه‌ل ئه‌زموون خوه‌یا ئه‌كاو جیاوازه له‌نه‌وه‌یل وه‌رجه خوه‌ى و دویاى خوه‌ى ، یه‌یش نه‌ك وه‌و مه‌عنا ك هویچ په‌یوه‌ندییگ نیه له‌ناونیان.
به‌عزه جاریگ دوینیم كارایگ فه‌قیر، خاسترین و جوانترین چشته‌یلیگ له‌هه‌گبه‌ى شاریاسه‌وه‌و هویچ ده‌سڵاتیگ نه‌یریگ ده‌ریان بخه‌یگ ، وه‌لى دوینید كابرایگ دارنده‌و ده‌وڵه‌مه‌ن هه‌ر له‌وه‌ر ئه‌وه‌ك وه‌ناوبانگ بووگ كتاویگ ره‌سنیگه چاپ و چوار باوه‌ت په‌سه‌ن و دڵگیر له‌تى نیه‌و ته‌نیا له‌وه‌ر ئه‌وه‌سه وه‌پى بویشن دانه‌ر(مۆلف)و به‌س. ئمجا خاستر ئه‌وه‌سه ده‌رفه‌ت بدریه‌یگه به‌هره‌داره‌یل نه‌ك سه‌رمایه‌داره‌یل.
