كورده‌یل فه‌یلى
بى سه‌روشوونكردن جایه‌ڵ جوانه‌یلیان وه چه‌وپرتاننیگ ، بویه له‌كه‌ى سیه‌یگ له تیوڵ كوومه‌ڵگاى ناوده‌وڵه‌تى و گۆنگره‌ى ئسلامى و ریكخریاگه‌یل هه‌ق ئاده‌میزاد .
رژیم دكتاتۆر ، دڕه‌نده‌ترین تاوان ده‌رهه‌ق وه‌كورده‌یل فه‌یلى ئه‌نجامدا ، ته‌نیا تاوانیان ئه‌وه بوى ك یه‌كمجار كوردن و دویاى ئه‌وه‌یش خوه‌ش ملله‌ته‌گه‌یان تواسن و پشتگیرى له‌مه‌سه‌له‌ى مه‌ركه‌زى و جموجویل رزگارى ملله‌ت كردن وه‌حاڵ وماڵ . ئمجا له‌یرا پرسیار كه‌یم له ئازادیخوازه‌یل جه‌هان و ئویشیم : ئایا وه‌رگرى یا دفاع له‌هه‌قه‌یل ئه‌و زوڵملیكریاگه‌یله كه‌ى ؟ گشت رژیمه‌یل تۆتالیتارى تویه‌نن له ڕه‌نگ سیه چه‌رمگ دروس بكه‌ن و له‌چه‌رمگیش سیه ، ك هه‌رچه‌نى تاوه‌خت كه‌میگیش بووگ ، به‌عزه كه‌سه‌یلیگیش ئویشن هه‌قیانه ئه‌وانه‌ك ده‌نگ به‌رزه‌و بكه‌ن و هاوار بكه‌ن و بویشن چوین له‌یوا بووگ تاوان ده‌رهه‌ق مه‌ردم بیتاوان ئه‌نجام بدریه‌یگ ؟
ئویشیم : ئایا گشت پیكهاته‌یل دونیاو گشت ره‌سانن یا ئعلامه‌یل تویه‌نستن قسه‌یگ له‌و باوه‌ته‌وه بكه‌ن ؟ له‌لایگ تره‌وه دوباره‌كردنه‌وه‌ى وه‌رده‌وام له‌هه‌ر كیشه‌و مه‌سه‌له‌یگ وه‌گووره‌ى ده‌زگایه‌یل و هووكاره‌یل ره‌سانن جووراوجوور ، تویه‌نیگ باوه‌ڕیگ باریگه ده‌س چینیگ له‌مه‌ردم ئاسایى ك هه‌رچه‌نى مه‌حاڵیش بووگ ، ئه‌یه بیجگه وجوود ده‌زگایه‌یل سه‌ركوتكردن ك هووكار گرینگ یاموهمیگه ئه‌را بیده‌نگكردن هه‌ركه‌سیگ بتوایگ پرسیار بكاو بویشیگ : ئایا چه ڕویده‌یگ له ده‌وروه‌رمان ؟
وه‌هه‌رحاڵ ، ئه‌و رژیمه‌یله تویه‌نن گشت كاریگ ئه‌نجام بیه‌ن و بیجگه ئه‌وه‌یش كه‌سه‌یلیگ منافق هه‌ن ك حكوومه‌ت هاورده‌یانه كار وه‌گووره‌ى فه‌رمان خوه‌ى و جویر ئه‌وه‌ك سوڵتان دڵى چه بتوایگ ئه‌ڕاى جى وه‌جى كردیان . سه‌به‌بیگ تر ئه‌وه بوى ك وه‌رپرسه‌یل كز و كه‌متوانا دانریاوین ته‌نیا ئه‌را جى وه‌جیكردن فه‌رمانه‌یل و به‌س ، یه‌یش مه‌عناى ئه‌وه‌سه هانده‌ریگه ئه‌را ئه‌وه‌ك رژیم وه مه‌یل خوه‌ى ره‌فتار ئه‌نجام به‌یگ و له‌كه‌سیش نه‌ترسیه‌یگ . وه‌لى له‌باوه‌ت ئه‌وه‌ك رووژیگ له ڕووژان كه‌سیگ ده‌نگ به‌رزه‌و بكردیاگ یا چپه‌یگ له‌گووش ره‌فیقه‌گه‌ى بكرداگ ، ئه‌وه یه‌كسه‌ر زندانه‌یل چه‌وه‌ڕیى كردیان و هه‌ر نه‌ویاتاگ وه‌لاى كه‌مه‌وه (20) ساڵیگ ئه‌ڕاى بڕیاوه له‌زندان و گشت وه‌هار عومرى له‌ورا بردیاگه سه‌ر . كورده‌یل فه‌یلى ئه‌وه‌نه مه‌ویسى و مه‌ینه‌تى و به‌دبه‌ختى كیشانه هه‌وه‌جه وه‌كتاوه‌یل فره‌یگ دیریگ له‌بانیان بنویسیه‌یگ ، ئه‌گه‌ریش ئه‌و مه‌ینه‌تى و ماڵویرانیه ئه‌را ملله‌ته‌یل ئۆرپا باس بكریاتاگ ئه‌وه شایه‌ت خستیانه‌ى خانه‌ى (دروو) یا گه‌وراوه‌كردن مه‌سه‌له‌گه ، ئمجا له‌یرا پرسیم ئایا چ ملله‌تیگ وه‌هه‌زاره‌ها جایه‌ڵ جوانه‌یلى ده‌سگیر كریاو له‌ماوه‌ى چه‌وپرتاننیگ كه‌فتنه خانه‌ى بى سه‌روشوون و نادیاره‌یله‌وه ؟ چ ملله‌تیگ له‌وڵات باوگ و باپیره‌یلى دویره‌و خریا ئه‌را وڵاتیگ تر ، ك تاڕاده‌یگ زوانه‌گه‌یانیش نه‌زانیگ ؟ چ ملله‌تیگ ماڵ و موڵكى و ئه‌وه‌ك داشته‌ى و شه‌كه‌ت بوى وه‌پیه‌وه زه‌فت كریاو دابه‌ش كریا بان پیاوه‌یل رژیمیا وه‌ناهه‌ق ؟ چ ملله‌تیگ بیبه‌ش كریا له‌هه‌ق هاووڵاتیبوین و شوناسنامه‌و كاركردن له‌ده‌زگایه‌یل ده‌وڵه‌ت ؟ چ ملله‌تیگ وه بوغز و كینه‌ته‌وه خیزانه‌یلى به‌شبه‌شه‌و كریاو هه‌ر یه‌كیگ له‌لیان كه‌فته وڵاتیگ له غوربه‌ت ؟ چ ملله‌تیگ حاشا له گوزه‌یشته‌و خه‌بات و قوربانیداینى كریا له‌وه‌ر خاتر (وڵات دایگ)و جویر وه‌كراگیریاگ و خیانه‌تكار و جاسوس له‌قه‌ڵه‌م دریان ؟
به‌ڵى كورده‌یل فه‌یلى گرتنه نیشان ته‌نیا له‌وه‌ر ئه‌وه‌ك نیشتمانپه‌روه‌ر و كورد په‌روه‌ر بوین و خوه‌شیان هات له‌وڵات و ملله‌ت و كه‌س وكار خوه‌یان ، هه‌ر له‌وه‌ر ئه‌وه‌یش زاڵمه‌یل و تاوانكاره‌یل تواسیان كپیانه‌و بكه‌ن و ده‌نگ هه‌ق كپه‌و بكه‌ن ، وه‌لى وه‌ل ئه‌وه‌یشا ژنه‌فتینه ك ملله‌تیگ له‌ملله‌ته‌یل خه‌باتكه‌ر ته‌واو بوى و چیه جه‌هان فه‌رامووشكردنه‌وه ؟ نه‌خه‌یر ئى چووره چشتیگ نیه .
