سه‌رهه‌ڵداين قه‌يران متمانه‌ی رووژنامه‌گه‌ری
بوی ئه‌را ئه‌و شماره‌ی فره ك ئمڕوو له په‌يامه‌يل ره‌سانن كه‌فنه وه‌رچه‌و يا له‌ڕی ته‌له‌فزيۆنه‌يله‌وه په‌خش كريه‌ن ، ئه‌گه‌ر بايگ و بنوڕيمنه تاريخ سه‌رهه‌ڵداين قه‌يران ئه‌و متمانه ئه‌وه تويه‌نيم بويشيم چووگه‌وه ئه‌را كووتايی ساڵه‌يل په‌نجای سه‌ده‌ی وه‌رين و گشت مه‌سه‌له‌يگيش ئيسه پوخته‌وه بويه ، وه‌لی ئايا بوود وه‌ی راسيه‌يله باوه‌ڕ بكه‌يم ؟ ئايا كام له‌و ديد و ئه‌ڕای چوينه‌يله راسه ؟ ئايا ئه‌و مه‌يدان فره‌ی رووژنامه‌و گووڤار و كه‌ناڵه‌يل ته‌له‌فزيۆن و سايته‌يل ئه‌لكترۆنيه ك رووژانه فره‌ترين زانياری له‌تيان په‌خشه‌و كريه‌يگ يارمه‌تيمان ده‌يگ ئه‌را ئه‌وه‌ك له‌ژيانيگ خاستر بژيه‌يم كاريگه‌رتر وه‌رانوه‌ر كه‌سه‌يل تر ره‌فتار بكه‌يم و بتويه‌نيم خاستر گرينگی يا ئه‌هميه‌ت به‌يمنه جه‌هان ده‌وروه‌ر تا له‌يوا له‌ليمان بايگ خاستر له كه‌سه‌يل ئاسايی بڕه‌سيمنه‌وه يا كه‌متر روی وه‌ڕوی سسی و هسكردن وه شكه‌ست بكه‌يم ؟ ئه‌وه‌ك فره ناخوه‌شتر و ترسناكتره له‌ئه‌وسا ، ئه‌وه‌سه ك ده‌زگايه‌يل په‌يوه‌ندی و ره‌سانن له‌يوا له‌ليمان كه‌ن ك زياتر له كه‌شيگ پڕ له‌خوه‌زيه‌و يا پڕ له‌باوه‌ڕ و ئاره‌زوو بژيه‌يم .
بيگومان زوورم ئه‌و خه‌وه‌يليشه وه‌ديهاتنيان زه‌حمه‌ته‌و هه‌مان وه‌خت تويش نائوميدی و دڵه‌ڕاوه‌كی و سسی و شكه‌ستيش تيه‌يم ، يا فره‌جار له‌يوا له‌ليمان تيه‌يگ له‌ناو جه‌هان پڕ له‌هوير و خه‌ياڵ و دروشمه‌يل بريقه‌دار و سه‌خته‌كاريه‌يل بژيه‌يم ، بيگومان يه‌يش خه‌يگه‌مانه دونيای سڕبوين يا به‌نجبوين ده‌روينی و خه‌وه‌وبردن ، ك ته‌نيا له رويداگه‌يل گه‌وراو گرفته‌يل سياسی و ئابووريه‌يل تيه‌يمنه خه‌وه‌را . وه‌لی دی قه‌ده‌ر له‌يواسه ك بايه‌سه ئه‌را چشته‌يل فره‌يگ خوه‌مان ئاماده بكه‌يم و هه‌مان وه‌خت هووكاره‌ی ئه‌وه‌يش بويمن و بتويه‌نيم و بزانيم چوين وه‌ل ئی ئاكامه‌يلا بژيه‌يم ، ئه‌ويش بايه‌سه فره وه‌مقه‌يه‌تی و ئازاييه‌وه ، وه‌نا خوه‌مان و نه‌وه‌يليمان تويش قه‌يريگ ده‌رده‌سه‌ری و شكه‌ست فكری و شارستانی بويمنه‌وه .
گرينگی يا ئه‌هميه‌ت هووكاره‌يل متمانه‌و په‌يوه‌ندی ئه‌را مه‌ردم چووگه‌وه ئه‌را ئه‌وه‌ك ئه‌وانيش ئه‌و مه‌ردمه‌يله‌نه ك خوه‌نن و دوينن و گووشگرن ، هه‌ر يه‌يش بووده سه‌به‌ب ئه‌وه‌ك باوه‌ڕی وه ده‌زگايگ نه‌مينيگ و بيجگه ئه‌وه‌يش رازی نيه‌وگ وه‌و زانياريه‌يله ك ژنه‌فيگه‌يان و گومان له‌ليان ديريگ ، ئمجا هه‌ر له‌وه‌ر ئه‌وه‌يش له‌و وه‌خته په‌نا بريه‌يگه وه‌ر سه‌رچه‌وه‌يل ناڕه‌سمی ئه‌را ده‌سكه‌فتن هه‌واڵ و زانياری يا مه‌علوومات ، يا فره‌جار ته‌ماشا كه‌يد ئه‌و هه‌واڵ و زانياريه‌يله له‌هويرو خه‌ياڵ خوه‌يانه‌وه شيه‌و كه‌ن و له‌يه‌كيه‌و ده‌ن ، يه‌يش زوورمی له‌وه‌خت جه‌نگ و قه‌يرانه‌يله ، ئمجا وه‌ختيگيش چه‌وديری يا مراقبه خريه‌يگه بان وه‌سيله‌يل په‌يوه‌ندی و په‌خشه‌وبوين هه‌واڵ ، وه‌تايبه‌ت له‌و وڵاته‌يله ك خود ده‌سڵات زاڵه له‌بان وه‌سيله‌يل په‌يوه‌ندی و سه‌رچه‌وه‌يل هه‌واڵ ، دی ئه‌و وه‌خته دعايه‌و چرپه‌چرپ فره‌تره‌و بوود و په‌خشكردن نهێنی
