رووژ جهانی (ماچ) و قەیران کۆڕۆنا
کەنعان حاتەم/ رووژ شەش تەمووز لە گشت ساڵیگ، خوەی رووژیگ جهانیە ئەرا (ماچ)، وەلی دیارە ک ئمساڵ سیستەم رۆمانتیکی جهانی وەگەرد کارە مقیەتییەیل لە ڤایڕۆس کۆڤید -١٩ تا رادەیگ پەکی کەفێد، ئەراوە بایەتە تەمەیلیگ تایبەت وەی رووژە لە جهان بڵاو بکریەێد، جوور کاتەلۆکیگ وەگەرد وەکارهاوردن رۆمانتیک لەی سەردەم فرە جیوازە.
شایەت (ماچ) جوور مەرجیگ سەرەکی لە کردەوەیل رۆمانتیک بزانیەێد، و لە خود وەختەگە، ماچکردنیش یەکیگە لە قەیەغە گەورەیلە ئەرا نوواگردن پەتای کۆڕۆنا، ک ئمڕوو هەردوگیان یەکانگیرەو بوون، هەم جوور رووژیگ جهانی ئەرا ماچ، وهەمیش جوور سەردەمیگ رخبردن لە ماچ.
و شایەت ئی گردەوبوینە لەناوبەین رووژە جهانیەگە وپەتاگە، بوودە هووکاریگ ئەرا دویرەخستن دڵدارەیل، و شاعرەیل بکەنەی بەهانەی خاسیگ ئەرا دەرخستن ئەو خەفەتەیلە ک کەفنە ناونی شەیدا وعاشقەیل ئی سەردەمە، چوینکە ئەو بەهانەیل کۆنە وەدەسیان نەمەن، جوێ بەهانەیل سەختی یەکەوگردن عاشقەیل ک ئیسە مۆبایل و ئەنتەرنێت ئەو بەهانە لەناوبردگە، یا جوێ بەهانەی خیزان و کەسوکار وهووز و ئیڵەیل هەردوگ دووسەگە، ک ئەوسا ریگردنیان لەنوای دووسیەیل باو بوی، و ئیسە کاڵەو بویە، یا جوێ رەسانن پەیام دووسی ئەرا دەس دووس، ک ئەوسا وەناو قاقەزیگ بوی، وپڕی لە قسەیل خەفەت ودڵداری بوی، و ئیسە بویەسە (مەسج) ئاسان وفرە کوڵیگ.
وەهەر شیوەیگ بوود، رووژ جهانییگ جوور ئمڕوو ک رووژ جهانییگە ئەرا (ماچ) لەی ساڵ و سەردەمە باس وهەس جیواز خوەی دیرێد، شایەت لە چەن ساڵیگ ئایندە، بوودە یادگاری جیوازیگ، ئەرا دڵدارەیل وهەمیش ئەرا شاعرەیل.
