دیموكراسى له كوردستان
دویروریژیگ ك هاته بانى و ئه‌و ژیان سه‌خته ك له‌بانى چه‌سپیا له‌لایه‌ن رژیمه‌یل یه‌ك له‌شوون یه‌ك و دویاخریش ناڕه‌حه‌تى و ماڵویرانى وه پیسترین شیوه له‌بان ده‌س دكتاتۆریه‌ت و دویاى ئه‌وه‌یش ره‌سینمان ئه‌را ئى وه‌زعه ك ئیسه له‌تى ژیه‌یم له‌سایه‌ى ئازادى هه‌رێم كوردستان عراق ك له‌شوون راپه‌ڕین مه‌ردمى ئادار 1991 هاته ده‌س وه‌بان ئه‌و هه‌مگه گرژى و جه‌نگ ناوخوه‌ییه ك ڕویدا، هویر له‌وه‌ئه‌كا گوایا ئه‌و ئه‌قڵیه‌ته ك ناوچه‌گه‌و هویروڕاو ئایدۆلۆجیات و ریڕه‌وه به‌یگه ڕییه‌وه له‌دید ئنسانیه‌وه سه‌رچه‌وه نه‌گرتگه ئه‌را ئه‌و كاره‌یله‌و گشت ئه‌وانه له‌ئه‌نجام كاریگه‌رى ڕووشنهویرى و داب ونه‌ریت و ئایدۆلۆجیاو كیشمه‌كیشه له ناوچه‌گه‌و به‌عزیگیش له‌لى له‌شوون تر وه‌رگرتگه، وه‌لى وه‌ختى وه‌شیوه‌یگ زانستى بچووگه بندروس كاره‌گه، ئه‌و وه‌خته مه‌زه‌نه‌ى ئاست ڕووشنهویرى گشتى كوومه‌ڵگاو هوشیارى گشتى كوردستان ئه‌كا، ك جموجویلده‌ریگ بنه‌ڕه‌تیه ئه‌را په‌خشه‌وكردن دیموكراسى و كریه‌یگ ده‌سنیشان هووكار گرینگ یاموهم بكریه‌یگ ئه‌را وه‌ده‌سهاوردن وه‌زع گشتى ئیسه‌ى كوردستان.
ئه‌گه‌ر بایگ و ته‌ماشاى شوونه‌یل تر بكه‌یم، دوینیم گرووپه‌یل فره‌یگ له‌ژیر ره‌حمه‌ت حزبه‌یل ژیه‌ن و تائیسه زه‌نجیر دكتاتۆریه‌ت له‌لیان نه‌كریاسه‌وه‌و هیمان له‌و به‌دبه‌ختى و ساڵه‌یل حوكم دكتاتۆریه‌ت و كیشمه‌كیش چه‌كدارى و هویروڕا و ئایدۆلۆجیاى ناوه‌جیه ژیه‌ن و نیه‌وگ ڕووشنهویر سه‌روه‌خوه‌ى دویر بووگ له رینمایى سیاسى و سه‌ر وه‌لایه‌نیگ یا حزبیگ نه‌وگ، مه‌گه‌ر كه‌سه‌یل كه‌میگ. وه‌ل ئه‌وه‌یشا دوینید به‌عزه جاریگ هووكاره‌یلیگ هه‌س وه‌ك ژیان و گوزه‌ران یا وه‌زعیگ تایبه‌ت ك خه‌یگه‌ى ژیر فشار و ده‌سڵات له‌بانى نه‌یریگ و چشته‌گه چه‌سپنیگ، ك هه‌رچه‌نى هه‌وڵ ده‌رچگن ده‌یگ له‌و وه‌زعه ك كه‌فته‌سه تى، وه‌لى وه‌خت فره‌یگ توایگ تا له‌لى ده‌ربچووگ وه ئاسانى، چوینكه وه‌ربه‌س و گرفت فره‌یگ ئه‌راى نریه‌یگ و دى مه‌حاڵه یه‌كسه‌ره قورتارى بووگ. دیاره ك مه‌سه‌له‌ى ئابوورى سه‌ره‌تاى خواسته ئه‌را ئازادى ئه‌قڵ، وه‌ل ئه‌وه‌یشا ڕووشنهویرى گشتى هه‌وه‌جه وه پاكه‌وكردن ئه‌قڵ و ئازادى دیریگ، یه‌یش تاڕاده‌یگ كاریگه‌رى راسه‌وخۆ دیریگ له‌بان ڕاده‌ى دیموكراسیه‌ت تاك و دویاى ئه‌وه‌یش له‌بان كوومه‌ڵگا وه‌شیوه‌ى گشتى. یه‌یش مه‌عناى ئه‌وه‌سه هه‌ر تاكیگ یا هه‌ر كوومه‌ڵگایگ ڕووشنهویرى گشت په‌یا كرد وه‌بى ئه‌وه‌ك كه‌سیگ تر به‌یگه‌ى پى و له‌ژیر سایه‌ى ئازادى ته‌واویگ له‌گشت مه‌یدانیگه‌وه، ئه‌وه ئه‌سانه ئه‌ڕاى بنه‌ڕه‌تیگ گونجیاگ دابنه‌یگ ئه‌را وه‌ڕیكردن ئه‌و دیموكراسى راسه‌قینه‌و په‌خشكردن عه‌قڵیه‌ت گونجیاگ له‌وه‌ر خاتر بنیاتناین كوومه‌ڵگایگ دیموكراسى.
