دره‌و ئاگره‌يل له‌ناونى خوه‌ڵه‌كوو و ده‌ركردن!
كفاح مه‌حمود/ زياتر له ساڵيگه، هيزه‌يل كيشمه‌كيشكه‌ر له عراق و سوريا چه‌كيگ ئاشكراى چه‌كيگ تر تازه‌ى كارا و مه‌ترسيدار كردنه له جيوه‌جيكردن خاك سزياێ و به‌تاڵكردنى له مه‌ردم، وه‌بى خوينڕشانن يا كوشتن و له‌ناوبردن، به‌ڵكوو گشت چشتيگ ك په‌يوه‌ندى وه رزق و روزى و خوه‌راك ئاده‌ميزاده‌و داشتوود سزنێد و ئه‌خاده‌ى وه‌رده‌م دو بژارده، يه‌كه‌ميان بيگومان فه‌قيركردن و زيلله‌تكردنه و دويه‌ميانيش تيرۆره ك ده‌رئه‌نجامى ته‌هجير و ده‌ركردن و وه‌جيهيشتن ناوچه‌گه‌س ئه‌را ئه‌و هيزه‌يله ك خاوه‌ن داناين ئى چه‌ك تازه‌نه، جوور نه‌خوه‌شى(كۆڤيد 19) ك وه‌شيوه‌يگ قويليگ ده‌سكردنه بڵاوبوين، ئمجا سه‌ربار ئه‌وه‌گ ئى جووره چه‌كه‌و وه‌كارهاوردنى پيشكه‌ش كرد، وه‌لێ ساڵ گوزه‌يشت چيه ناو خزمه‌ت و جيوه‌جيكردن كرده‌وه‌يى و مه‌يدان تاقيكردنيشى له هه‌ريه‌ك له سوريا و عراق بوێ وه‌تايبه‌ت له‌و ناوچه‌يله ك پيكهاتنه له فريه‌يى ئايينى و ره‌گه‌زى و مه‌زه‌وى، له‌عراقيش له‌و ناوچه‌يله ك وه‌پيان ئويشن ناوچه‌يل كيشه له‌سه‌ر له‌ناونى به‌غدا و هه‌رێم كوردستان وه‌تايبه‌ت له شه‌نگاڵ و كركوك و هامارى نه‌ينه‌وا و مه‌خمور و خانه‌قين و مه‌نه‌لى و سه‌ڵاحه‌دين، ك سه‌ركه‌فتن فريه‌يگ له‌تى وه‌ده‌سهاورد له وه‌ناوهاوردن ترس له‌ناونى هاووڵاتيه‌يل ئه‌و ناوچه‌يله، به‌ڵكوو نواگيرى له گله‌وخواردن سه‌دان هه‌زار له‌ليان كردن ئه‌را شوون و ماوايان ك له‌ليه‌و ده‌ركرياوێن و له سه‌ره‌تا رژيم سه‌دام حسێن و دوياتريش ته‌واوكردن نه‌خشه‌گه‌ى له موحيت تا خه‌ليج له‌ژير سايه‌ى په‌يامه‌گه‌ى، وه‌ختيگيش ئه‌مريكا رمانه‌ى گله‌وخواردن ئه‌را ماڵه‌يل و باخ و بووسانه‌يليان و ئه‌وه‌نه وه‌پى نه‌چێ خايه‌يل ئه‌و رژيم فاشيسته دابه‌ش بوێ و جوجيگه‌يل داعشى وه ڕيشه‌و له‌لى كه‌فته‌و وه هه‌ڵمه‌ت ناوزڕ نيشتمانى ئيمانييه‌وه‌و له‌وه‌ر ته‌واوكردن به‌رنامه‌ى ناسرياێ وه ئاڵشتكردن ديموگرافى و ته‌عريب، وه‌لێ ئيجاره فكره‌ى تر هووكاره‌يلى له سه‌ربرين و ده‌سوه‌سه‌ركردن و دويره‌وخستن خيزانه‌يل جوور ئه‌وه‌گ ئاگادار بويمن له‌لى له‌وه‌ختيگ موسڵ و شه‌نگاڵ و ته‌لعه‌فه‌ر و هامارى نه‌ينه‌وا داگير كرياو هه‌زاران ژن و مناڵ له ئێزيديه‌يل ئه‌نفال كريان و كووچ وه سه‌دان هه‌زار له‌ليان كريا وه‌تايبه‌ت ئه‌وانه‌گ تائيسه‌يش له كه‌مپ ئاواره‌يل ژيه‌ن له 2014 تائيسه.
ئى چه‌ك تازه په‌ره وه‌پى دريا تاگشت پيكهاته‌يل جياجياى ره‌گه‌زى و ئايينى و مه‌زه‌وى بگرێده‌و له‌ناوچه‌يليگ ك هيزه‌يل حه‌شد شه‌عبى له‌تيان زاڵن و له‌بان فه‌تواى مه‌رجه‌عيه‌ت باڵاى شيعه له عراق دامه‌زريان له‌وه‌ر روێ وه‌ڕوێ بوينه‌وه‌ى داعش و لاوردن مه‌ترسيه‌يلى له‌بان كه‌ربه‌لا و نه‌جه‌ف و كازميه‌و سامه‌ڕا، وه‌لێ يه‌يش په‌ره وه‌پى درياو بويه جيگره‌وه‌ى ده‌زگايه‌يل سه‌ربازى و ئه‌ركه‌يلى فراوانتر بويى و دريژه‌و بوى ئه‌را ناوچه‌يل گه‌رم له ده‌ورگرد كوردستان، له‌ناو سوريايش ئه‌را مقه‌يه‌تى له مه‌زارگه‌يل شيعه، جوور ئه‌وه‌گ بڕيگ له فه‌سيله‌يل له‌ورا ئاشكراى كردن، گرنگ ئه‌وه‌سه په‌نجه‌ى تومه‌ت راسه‌وخۆ دريژه‌و كريه‌ێد ئه‌را شماره‌يگ له دامه‌زرياگه‌يل تونڕه‌و و بيلايه‌ن جوور داعش و هاوشيوه‌يلى و ئه‌وانه‌گ وه‌بوونه‌وه‌ى ئه‌وانه‌و نه‌ف وه‌رئه‌گرێد له سياسه‌ت ئاڵشتكردن ديموگرافى، ك بيگومان ها وه‌ليانا له‌و هووكاره‌يله ك ده‌سڵاته‌يل وه‌گووره‌ى مێژوو هاورديانه‌ى كار ئه‌را ئاڵشتكارى ناسنامه‌ى شار و شاروچكه‌يل و ئاوايه‌يليگ له ناوچه‌يل كوردستانى ك كه‌فتنه‌سه ده‌يشت ئداره‌ى هه‌رێم كوردستان، ئمجا وه نه‌وين هيزه‌يل پيشمه‌رگه له‌شوون رويداگه‌يل ئوكتۆبه‌ر 2017 ئه‌و ناوچه‌يله ده‌سوه‌ر بوين ئه‌را ئه‌و هيز و ريكخرياگه‌يل تيرۆريستى و ميليشيايه‌يل رويداره ك بوينه هووكار كووچ وه‌پيكردن و ده‌ركردن ده‌يان هه‌زار مه‌ردم و ريگرى له گله‌وخواردن سه‌دان هه‌زار ئاواره كردن ئه‌را شوون و ئاوايه‌يليان.
ئمساڵ چه‌ك تازه وه‌شيوه‌ى فراوانيگ هاوريا كار، دريژه‌و بوێ و روێ كرده پاريزگايه‌يل تر عراقى، ك يه‌يش جه‌خت له ريڕه‌و تازه‌يگ ئه‌و هيزه‌يله ئه‌كا ك ئى چه‌كه‌يله وه‌كار ئه‌يه‌رن وه‌ل فريه‌يى ناو و ناونيشانه‌يليان ك ريڕه‌وه‌گه‌يش په‌ره وه‌پى دريا بيجگه تامداركردنى وه تام ئايينى و مه‌زه‌وى، ئمجا وه‌گووره‌ى ئه‌و شوونه‌يل جوگرافيه ك چه‌كه روێ وه‌ڕوێى ئه‌دێده‌وه ئامانجيگ هاوبه‌ش و ئاشكرا له وه‌كارهاوردنى ده‌ركه‌فت ك ئه‌ويش ويرانكردن ژيرخان كشتوكاڵى و به‌رهه‌مدارى خوه‌راكه ئه‌را وه‌رده‌وامى هاورده‌كردن و به‌تاڵكردن ناوچه‌گه له مه‌رمه‌گه‌ى وه‌خاتر ته‌واوكارى به‌رنامه‌يل كويه‌ن له رويداگ ئالشتكاريه‌يل ديموگرافى ره‌گه‌زى و مه‌زه‌وى كرده‌وه‌كار ناوچه‌يى، ئمجا له‌ناونى ئه‌يه‌و ئه‌وه سوريا مه‌نده‌وه له‌ژير دروشم مه‌ندنه‌وه‌ى به‌شار ئه‌سه‌د يا وڵاته‌گه سزنيم و عراقيش وه خاك خوڵ مه‌نده‌و جوور ئه‌وه‌گ سه‌دام حسێن تواسه‌ى!
