داوه‌تيگ ئه‌را پاكه‌وكردن مه‌يدانه رووشنهويريه‌گه‌مان له هزره‌يل ويرانكه‌ر
شه‌فه‌ق نيوز/ رووشنهوير له‌وه‌ر ئه‌و ئه‌قڵيه‌ت واز و رووشنهويريه ك ده‌سى كه‌فتگه له خوه‌ندن يا خوه‌ندنه‌وه و خوه‌ى رووشنهويركردنه, جوور سالاريگه له‌گشت كۆمه‌ڵگايه‌يل، وه‌ل ئه‌وه‌يشا وه‌رپرسيارێتى گه‌ورايگ ئه‌كه‌فێده بان شان رووشنهوير له بڵاوكردنه‌وه‌ى په‌يڕه‌وه‌يل ساق و نه‌ريته‌يل راس و دورس له كۆمه‌ڵگا، ك بايه‌سه له‌بانى له‌ڕێ ئه‌و بوار تايبه‌تيه‌و په‌يڕه‌و هاووڵاتيبوين دروسيگ و ئنتمايگ راسكانى ئه‌را نيشتمان بكاڵێد و گوزاره‌يل ئاستى و خوه‌يشه‌ويستى و له‌يه‌كوه‌خشين و ژيان ئاشتيانه له‌ناونى تاكه‌يل كۆمه‌ڵگا بڵاو بكاو بايه‌سه روێ وه‌ڕوێ گوزاره‌يل خوسه‌و كينه‌ت و جياوازيكردن و تونڕه‌وى ئايينى و سياسى و مه‌زه‌وى و ره‌گه‌زێ بووسيه‌ێد، چوينكه ئى گوزاره‌يله جيوازى دروس ئه‌كه‌ن له كۆمه‌ڵگا و په‌يوه‌نديه‌يل يه‌كگرتن و هيز كه‌مه‌و ئه‌كه‌ن و ئه‌نجامه‌يليشى مه‌ترسيداره له‌بان كۆمه‌ڵگا, ك جى داخه ئه‌وه‌سه ئمڕوو دوينيمنه‌ى له مه‌يدان رووشنهويرى وه‌تايبه‌ت له مه‌يدان عه‌ره‌بى ك نموونه‌يل فره‌يگ هه‌ن له‌هسان له‌بان چين رووشنهوير و بوينه‌سه خاوه‌ن هزر مه‌ترسيدار و كار له‌بان بڵاوكردنه‌وه‌ى جياوازيكردن ئه‌كه‌ن له‌ناونى تاكه‌يل كۆمه‌ڵگا له‌ڕێ بڵاوكردنه‌وه‌ى مه‌سه‌له‌يليگ ك رێ ئه‌را تايفه‌گه‌رى و مه‌زه‌وى و ئايينى و نه‌ته‌وه‌يى خوه‌ش ئه‌كاو له‌وه‌يش شاره‌زايى رووژنامه‌نويسى يا ره‌ساننيان هاوردنه‌سه كار وه شيوازه‌يل پڕ مه‌كريگ ك شايه‌ت فريه‌جار راسه‌وخۆ بدێ و جارجاريگيش ناڕاسه‌وخۆ.
ئه‌وه‌گ هيشته‌م باس له‌ى باوه‌ته بكه‌م، ئه‌ويش مه‌ترسيه‌گه‌ى له‌بان يه‌كگرتگى كۆمه‌ڵگامان و ئاكامه‌يل مه‌ترسيدارى له‌بان ئاسايش و سه‌قامگيريه‌گه‌ێ بيجگه په‌ره‌سه‌ندن هووكاره‌يل بڵاوكردن و په‌يوه‌نديه‌يل قاقه‌زێ و ئه‌لكترۆنى ك نويسه‌ر له‌تى وه‌ئاسانى باوه‌ته‌يلى بڵاو ئه‌كا وه‌تايبه‌ت له ده‌يان رووژنامه‌و ماڵپه‌ڕه‌يل ئه‌لكترۆنى و جه‌ماوه‌ر فراوانيش ديرێد ك جى داخه فريه‌يگ له‌ليان ته‌ماشاى رێ وشوون و پێ,ه‌ره‌يل پيشه‌يى راسكانى ناكه‌ن له بڵاوكردنه‌وه‌ى باوه‌ت و ته‌نيا ته‌ماشاى فريه‌يى ئه‌كه‌ن، ئنجا دوينيم ئيچنه نويسه‌ره‌يليگ ك باس له‌ليان ئه‌كه‌ن باوه‌ت مينڕيژكرياێ بڵاو ئه‌كا وه هزر مه‌ترسيدار ك هه‌ڕه‌شه له ئاسايش و سه‌قامگيرى كۆمه‌ڵگا ئه‌كا له زياتر له رووژنامه‌يگ ئه‌لكترۆنى و دوينيم ئى هزره‌يله وه گورجى رێ وه‌ره‌و ناو جه‌ماوه‌ر له‌وه‌ر ئه‌گرێد ئه‌را خوه‌نينه‌وه‌ى، ئه‌گه‌ريش بتوايم بزانيم شماره‌ى ئه‌وانه چه‌نيگه ك كاريگه‌ر بوون وه‌ى هزره‌يله ك خريه‌نه روێ و شماره‌ى ئيچنه نويسه‌ره‌يليگ چه‌نيگه له مه‌يدان رووشنهويرى و شماره‌ى خوه‌نه‌واره‌يلى چه‌نيگه ك كاريگه‌رن وه‌پيه‌و, ئه‌و وه‌خته زانيم ك مه‌ترسى ئه‌وانه‌گ له‌بان چين رووشنهوير هساون چه‌نيگه‌و تويه‌نستيايم ئاست مه‌ترسى ئى دياره‌ده‌يشه له‌بان كۆمه‌ڵگامان ده‌سنيشان بكه‌يم.
من ناخوازم بويشم ك ئيمه بايه‌سه گشتمان هاوكارى بكه‌يم ئه‌را روێ روێ بوينه‌وه‌ى ئيچنه ديارده‌يگ مه‌ترسيدار له‌وه‌ر مقه‌يه‌تى له كۆمه‌ڵگاگه‌مان له كاريگه‌ريه‌يل مه‌ترسيدارى و هه‌ر وه‌و خاتريشه هه‌وه‌جه وه هاريكارى گشت لايه‌نه‌يل ديرێم ئه‌را داناين مه‌رزيگ ئه‌را مه‌ترسيه‌گه‌ى له‌بان ئداره‌ى رووژنامه‌و دام و ده‌زگايه‌يل ره‌سانن وه‌تايبه‌ت ئه‌لكترۆنى ك بايه‌سه رۆڵ نيشتمانپه‌روه‌رى و پيشه‌يى خوه‌يان بگرنه وه‌ر وه‌شيه‌وه‌يگ ته‌ندروس و رێ وشوونه‌يل پڕ دقه‌تيگ بگرنه‌وه‌ر وه‌ل پێوه‌ره‌يل پيشه‌يى ئه‌را بڵاوكردنه‌وه‌و بايه‌سه كادر شاره‌زاى ره‌ساننكار تايبه‌ت بكه‌ن ئه‌را خوه‌نينه‌وه‌ى ده‌قه‌يل و باوه‌ته‌يل وه‌رجه ره‌زامه‌نى له‌بان بڵاوكرنى و له‌ده‌سده‌رچن هه‌ليگ له بڵاوكردنه‌وه‌ى تويه‌م جيايى و جيوازيكارى له ده‌روين مه‌ردم و بايه‌سه مقه‌يه‌تى له كۆمه‌ڵگاو خوه‌نه‌وار و مه‌يدان رووشنهويرى بكه‌يم له كاريگه‌رى ئى قه‌ڵه‌مه‌يل وه‌كراگيرياگه له‌وه‌ر ئه‌وه‌گ مه‌يدانه ره‌سانن و رووشنهويريه‌گه‌مان له مه‌ترسى ئيچنه هزره‌يليگ وێرانكه‌ر پاكه‌و بكه‌يم ك شه‌ڕ ئه‌را نيشتمانمان ئه‌خوازن و بايه‌سه مقه‌يه‌تى له رووشنهويرى بكه‌يم جوور شوێڵه‌يگ رووشنكه‌ر ئه‌را مه‌ردم و به‌شدارى بكه‌يم له بڵاوكردنه‌وه‌ى گوزاره‌يل ئاسايش و ئاشتى و سه‌قامگيرى و خوه‌شه‌ويستى و ژيان ئاشتيانه له كۆمه‌ڵگايه‌يلمان.
