داستانیگ ... پاڵه‌وانه‌یلى كورده‌یل فه‌یلیین
مانگ ڕه‌مه‌زان و ڕیككه‌فت 8 شووبات سیه‌ى ساڵ 1963 ئه‌ندامه‌یل تیم یا فه‌ریق تووپان وه‌رزشى شبیبه‌ى فه‌یلى ئه‌را به‌غداد جدیده چين، وه‌لى تیم وه‌رانوه‌ر ئاماده نه‌وى، وه‌ختى پرسیاریش كریا له‌وه‌ر چه ئاماده نه‌وینه؟ وتن ئه‌را ئیوه نیه‌زانین كووده‌تا كریا ؟!.
تیم شبیبه هاتنه دویاوه ئه‌را شوون خوه‌یان و نوڕستن قسه‌گه راسه‌و كووده‌تا بویه‌و خه‌ریكه مه‌ردم داوه‌زنه جاده‌و رویكردنه وه‌زاره‌ى وه‌رگرى تا بچنه ده‌نگ زه‌عیم باوگ فه‌قیره‌یل و پشتگیرى له‌لى بكه‌ن. له‌یرا خاسترین قوربانى دریا له‌وه‌ر خاتر نیشتمان و شووڕش و سه‌ركرده‌گه‌ى ، ئه‌و ئاده‌میزاد خاسه ك جویر خوین پاك چیه ناو ده‌مار ڕوڵه‌یلى ، هه‌ر له‌وه‌ر ئه‌وه‌یش ملله‌ت وه روح و گیان خوه‌یان كردنه فیداى و گشت چشتیگ له‌وه‌ر خاتر نیشتمان و شووڕش دریا .
مه‌ردم فراوانیگ له وزاره‌ى وه‌رگرى نزیكه‌و بوین و له‌هه‌مان وه‌خت وه‌ده‌نگ به‌رز هاوار كردیان فیداى نیشتمان ، وه‌لى به‌غدا له‌و رووژ سیه رمیاو دویاى چه‌ن سه‌عاتیگ وزاره‌و حكوومه‌تیش گیریاو روى وه‌ڕوى بوینه‌وه‌ى راسه‌قینه له‌ناونى ملله‌ت و خیانه‌تكاره‌یل ڕویدا له‌بان شووڕش ، به‌ڵى ، له‌ى رووژ سیه پایته‌خت ئازادى و برایه‌تى و ئاشتى وه‌ده‌س خیانه‌تكاره‌یل و تاوانباره‌یل رمیا ، وه‌لى خودا تواس ك مه‌ردم جاده‌ى كیفاح و عه‌گد ئه‌لئه‌كراد ئازایه‌تى توومكار بكه‌ن له‌ناو تاریخ سیاسى عراق له‌گشت لایگه‌وه ، ئمجا له‌یرا به‌عسیه‌یل خوسه‌و كینه‌ت له كورده‌یل فه‌یلى گرتنه دڵ .
فه‌یلیه‌یل دویاى ئه‌وه‌ك یه‌كه‌مین شه‌هید دان له‌قاپى وزاره‌ى وه‌رگرى وه‌ناو (هاشم غوڵام عه‌لى) هاتنه‌وه ، وه‌لى نه‌ك ئه‌را ماڵه‌یلیان ، به‌ڵكوو ئه‌را كیفاح و به‌شبه‌شه‌و بوین له‌ناو جاده‌و كویچه‌یل كیفاح و به‌عزیگیش له‌لیان وه چه‌كه‌وه جویر نارنجه‌ك و چوار ڕه‌شاش ( 2 بور سه‌عید و 2 ئسترن ئه‌ڵمانى) ك زه‌عیم عه‌بدولكه‌ریم جه‌ده‌ى پاسه‌وان زه‌عیم عه‌بدولكه‌ریم قاسم داره‌ى پیان .
له‌و وه‌خته سه‌ركردایه‌تى ناوچه‌گه دریا ده‌س شه‌هید پاڵه‌وان (له‌تیف حاج و محه‌مه‌د ساڵح عه‌بلى)ئه‌وانیش چوار ڕشاش دانه (فوئاد حاته‌م و ره‌زا عه‌زیز و تالب و حازم موسڵاوى . هه‌ر یه‌كیگ له‌وانه‌یش شوون خوه‌یان قایم كردن نه‌ك دوشمن بایگه ناوچه‌گه ئه‌ڕایان . ئه‌وه بوى سێ ده‌بابه و دو سه‌یاره‌ى عه‌سكه‌رى له‌دیم باب ئه‌لشێخه‌وه هاتن وه‌ره‌و لاى باب ئه‌لشه‌رجى ، وه‌لى پاڵه‌وانه‌یل له‌لیان هاتنه ده‌س و ناچاریان كردن بچنه دویاوه ئه‌را شوون خوه‌یان . سێ ڕووژ و سێ شه‌و به‌عسیه‌یل و حه‌ره‌س قه‌ومى مقاومه كردن ، وه‌لى له‌وه‌ر ئه‌وه‌ك روڵه‌یل پاڵه‌وان چه‌ك وه‌پیان نه‌مه‌ند ناچار كریان خوه‌یان بكیشنه‌وه ، حازم شه‌هید بوى ك هه‌رچه‌نى دكتۆر باقر هه‌وڵ فره‌یگ دا نه‌مریگ وه‌لى وه‌داخه‌وه گیان پاكى ده‌رچى و ماڵئاوایى له‌ڕه‌فیقه‌یل پاڵه‌وانى كرد ، دویاخریش كه‌ریم ده‌عبوله‌ى پاڵه‌وانیش ده‌سگیر كریا . جه‌نگه‌گه دویاى سێ ڕووژ كووتایى وه‌پى هات ، وه‌لى یادگاریه‌یل ئه‌و وه‌خته تا ئیسه‌یش هه‌ر مه‌ندگه له‌دڵ وژدانمان ، چوینكه كورده‌یل فه‌یلى داستانیگ پڕ له‌ئازایه‌تى توومار كردن له خه‌بات له‌و ڕووژه‌یل سیه ، سڵام له عه‌گد ئه‌لئه‌كراد ... سڵام له‌پاڵه‌وانه‌یل محه‌مه‌د جه‌عفه‌ر و هه‌ردوگ برا تالب و دكتۆر باقر و حه‌مید و وهاب سه‌ید حسێن و جواد و مزه‌فه‌ر عه‌لیخان و مالك و شه‌وكه‌ت ئه‌حمه‌د مجه‌به‌رچى و ئه‌ڵمان و عه‌دنان و عومران و كامل كه‌ره‌م و جه‌عفه‌ر مه‌لا نه‌زه‌ر و سه‌باح ئه‌حمه‌د حسێن و عه‌دنان حه‌یده‌ر و حسێن فانووس و عه‌بد فه‌رهاد و حه‌سه‌ن مراد سه‌لیم و جاسم محه‌مه‌د و تالب عه‌بدولجه‌بار و ساحب عه‌باس و پاڵه‌وانه‌یل تر فه‌یلى . سڵامیگ ئه‌را داڵگ شه‌هیده‌یل ك فه‌خر و شانازى كردن وه‌خوین ڕوڵه‌یلیان.
