دڕگ نزیکی و زەخم دۊری
کەنعان موڕاد/ ژوژو لە ژوژویگ تر نزیک نێکەفێد، چۊنکە دڕگەیلی ک بۊیەسە قەڵغانیگ لە دوژمنەیلی، هەمیش لە دووسەیلی دۊری خەێد.
هەنای زمسان بوود، و سەردی دەێدە ژوژو، ناچار بوون بکەفنە شان یەک، هەرچەن دڕگەیلیان زیان وەپەیان رەسنن، باوجی ناچارن ئەرا گەرمی لە بەخەڵ یەک بوون، و هەنای کەمیگ گەرمەو بوون، زۊی لەیەک جیاوە بوون، و دووارە دۊر کەفن.
لەناوبەین زەخمەیل نزیکییان لەیەک، و زەخمەیل دۊری و هەڕەشەی سەردی و دوژمنەیل، نموونەیگە شایەت بگونجێد وەگەرد ئیمەیل جۊر ئایەم.
ئەڕا چە هەنای وەتەنیا بۊیمن، و بنووڕیمنە فیلمیگ هەنەکی و خەنینە، وەو دەنگ بەرزە دەنگ خەنینەمان نییە، ک وەوجۊرەگ وەگەرد مەردمیگ تر بخەنیمن؟
و هەنای خوەد تەنیا نووڕێدە بازی تۆپان، وەوجۊرە دەنگ خوەشی یا دڵخوەردی وە بازیەگە بەرز نییە.
ئیمەیش، جاروبار هەکاتی ژوژو، هەنای لەیەک نزیک بۊیمن، شایەت وە قسە و رەفتاریگ زەخمدار بۊیمن، باوجی زەخمەیل بیکەسی، و ژانەیل دۊرکەفتن، فرەترە، و دەنگ خەنینەمانیش وەبی کەسیگ تر تامیگ نەیرێد.
و ئەگەر مینەی برادەریگ بکەێ ک هۊیچ لەکەیگ یا کەموزیاییگ نەیاشتوود، هەرگیز هەر وەتەنیا مینێ، و بایەتە دڕگەیل ئەوەکان وەخوەمان بۊینیمن، چۊنکە دڕگەیل تەنیایی و بیکەسی تیژترە.
