تا خوەمان ئاڵشت نەکەیمن جەهان ئاڵشت نیەوود
ئومید وە هاتن رووژەیلیگ خاستر واتەیگ دیرێد هەناێ وەشیوەی گونجیاییگ هویر وەژیان کریەێد، و شیوەی بڕیار و ڕەفتارەیل پووڕیاگ بوون، واتە ئەوانەگ رزگار بوینە، مینەی نووەوکردن هویرکردن خوەیان کەن لەناو ئاڵووزی و گیچەڵەیل دەوریان.
هاتن ساڵ نوو، دەرفەتیگە ئەرا لاوردن هویر و سیاسەتە بڕمنەیل هن ساڵ ٢٠٢٣، و چوینکە نووەوبوین ساڵەگە ئەرا فرەی مەردمەیل مەگەر تەنیا ئاڵشتکردنیگ لە شمارەیل بوود، کە هەناێ رەوشەگە وەدڵیان نییە، نیەتوەنن وەگەرد ئاڵشتبوین بچاشیەن، یا ئامادەیی خوەیان ئەرا گەشەیل چەوەڕیکریای بکەن، نیەتوەنن یا هەر نیەخوازن دەرفەتەگەیش وەکار بارن.
گەورەترین چشت کە ئی ساڵە یای گردیمن ئەوەسە کە دیبلۆماسی نه‌رم لەناو جەهانیگ پڕ لە ستەم هویچیگ نیەکەێد. هەر کەسیگ تەقەلای وەدەسهاوردن خەونەیل خوەی دەێد، زانێد کە ئەزموونەیل جەهان بی شکست نییە، و هەمیشە وەگورەی تەما و مەزەنە نیەتێد، باوجی یەیش بەشیگە لە کار رەسین وە سەرکەفتن.
رویداوە خویناویەیل ٢٠٢٣ هەیچ دەسپیچگیگ ئەرایان نییە، باوجی چە بکەێد تا دووارەو نەوود؟، سرووشتیە کە ئەرا ئەوەگ دووارەو نەوود، بایەسە یەکەم چشت جەهان دەروینی و هویرکردن خوەمان ئاڵشت بکەیمن.
ئمڕوو، بایەس .. من.. تو.. ئیمە. بزانیمن پامان ها کام شوین، مافمان چەس، تەگبیرمان لەناو ئەو کۆمەڵگە چەس کە وەرجەیە فرە جار پشتمان شکان، و جاروباریش دڵخوەشمان کرد.
لە کەنار ساڵ نوو، لەبان خەفەت فرە، کە کاریگ وە بەخت و چشت چەوەڕینەکریای نەیرێد، سەرکەفتن و شکست هەر گەلیگ پەیوەندی وە توانا و خوازین و بڕیار تایبەت خوەی دیرێد، و ئەوەسە کە هیلێد قەپاڵ تەرازویەگە وەرەو تەقەلا و ئومید لارەو بوود.
ئاست بەشداریکردن مەردم لە کار دووارە ئاوەدانکردن پشت وە پابەندییان و ئاست زڕنگییان بەسێد هەناێ بخوازن ئی جەهان نووە پڕ لە ئاسایش و خوەشی بوود، و چووڵ لە تونەڕەوی بوود، و باوکردن ئەوە لەناو کۆمەڵگا خوەی پەیمانە و مدوو بیوەیی هویرکردن و باوەڕ خەڵکەگەس.
ئی وڵاتە خوەشی وەخوەی نیەوینێد تا هویرمان رووشن نەوود، و ئی وڵاتە ئارامی وەخوەی نیەوینێد تا قورتار خوەی لە رەوشەیل لە تونەڕەوی نەکەێد، و کارەیل بکوش و خوەیکوشتن تەواو نیوود تا لە تاریکی ناێدە دەیشت و نەڕەسێدە وڵاتیگ رووشنایی و دادپەروەری لەناوی باو بوود، و تەنیا ئاڵشتکردن رووژ شمار مانگ و ساڵ بەس نیەکەێد، و ئەرا لەناوبردن سیمای کوشتن وبڕین و تاوان، بایەسە یەکەمین گلە هویر و کۆمەڵگای خوەمان وەرەو دووسی ژیان ئەرا گشت نامە کەسیگ ئاڵشت بکەیمن، ئومید ساڵ نوو خوەشیگ ئەرادان خوازم.
