کوڵە چیرووک

من و هەمگ سراوی، هاوسەرباز بۊمن. گاجار، شەوەیلی کە شیفت شەو بۊم لە بیمارستان ئێمام حوسەین، هەمگ هەم هاوشیفتم بۊ.

گەپیل هەمگ، بنێ نات. گەپ دریژیگ چنە هزارساڵ...

همایون، تازە دو ساڵی تەمام بوود کە باوگ و داڵگی، دچار بیماری بوون و مرن...

هەمگ ئاوارە بوود، شەوێگ لە ماڵ خاڵو، شەوێگ لە ماڵ مەمو، داپیر و باپیر...

هەمگ، چمان خارچگ سەر سڕکوڵان گەورا بوود. گوشەیل قوت، دگانەیل چڵ و چەفت، مل باریک و سینەی سەنگەلا...

تا ڕەسیدە سن سەربازی، هزار ناو ئڕای داوڕن.

هەمگ تۊتگ، چۊن وە مناڵی، نان لە دەم تۊتگ سینێدەو و خوەی.

هەمگ خوەڵەکوان، هەمگ گەوزە، هەمگ بازە...

هەمگ پەپگ...

هەمگ، هزار ناو داشت و لە هزار فێشتر.

سەواد نیاشت. گاجار وە ژێر و بان، کڕی کیشا و وەت یە ناو منە: هەمایون!

هەمگ پانێدە سن، هەر ماڵێگ جورێگ کار لە لێ کیشن، چیلگ کوکەر، ئاوهار، مناڵ گر، شام سەگ دەر...

هەمگ، بوودە بافڕنەک، بوودە گردەگۊچان، هەمگ بوودە واێ سام و هڵم زەمین لە وەهار...

هەمگ وە هۊرێ نات کە کەی دڵنگ نوو سەنیە، هەرچێ بڕەسیا کردە وەر.

هەمگ وەت: رووژێگ جاکەتەگەم چۊنە دڕیاۊد، دی کتەو نخوارد، پەڵ پەڵ، گریەیان دامە یەکەو...

هەمگ فرە چێشتەیل وەت. وەت کە هناێ تیخ خسم، دی فێشتر دەس ئڕام گرتن و پیم خەنین. چمان خەڵک دی چێشت تر نیاشتن تا پێ بخەنن.

وەتن هەمگ مامربازە، ئێکەش وەتن بزن بازە...

چوە ئڕاد بۊشم بخت خەر و ماین و قاتریش کردنە پیما.

هەمگ وەت: عەزرەت لە دڵم بۊ کە لە نزیکەو بوو خوەش ژنێگ بایدە لۊتما، زڵفێگ سا بخەیدە بان سەرم، دەس گەرمێگ، جارێگ بجەڕنێدەومەو...

هەر وە خوەم نەیم و نەیم.

تا یەی جار بۊمە شووان گەوراماڵێگ، تەنیا یەی جار، تواسم لە ئاوماڕگ، دەسمیەت یەکێگ لە وەۊگان بەیم. وەختێ ڕەسنەگان کیشام، دەسم هاتە مل دەسیا، رەنگم پەڕی و داخ کردم. گڕیگ لەرزیم و چەوم بەسام. دەمێگ وە نەرم دەمم ماچ کرد...

چوە ئڕاد بۊشم...لە ژیانم هەر ئەوە دێرم، هۊرم و خاترەم هەر ئەو ماچەسە...

هەمگ وە دەنگ بەرز قسیە کرد. هەمگ وە دەس نان خوارد و لە کات خواردن، چڵپەی دەمێ هات...

هەمگ وەت، وە مناڵی، هەرکەس لیم پرسی چوە توای؟ هەر یە زانستم کە بۊشم نانێگ بەسمە...

ئمجا ناوێگ ئڕام داوڕین: هەمگ نانی...

فرەجار وە هەمگ دو چای چڕینەم...

ئلانیش هەمگ سەرباز ناومە...

دووس و هاوکارێگم، باوگی لە دنیا چی...

دەم ئێوارگانی، وەتم بچم سەرسڵامەتی بەیمە لێ و بامەو.

هەمگ وەت کە منیش تیەم. دڵم نات بۊشم هەمگ مەو...

دووسەگەم، ماڵ چەن پووشێگ لە بەش دەوڵەمەنەگان داشت. وەختی چیمن، ساڵن ماڵیان هەی و مەی نیاشت...

هەمەگ وەت: ئێ جور ساڵونەیلێگ تەنیا هڵم دەم پەس گەرمیان کەی!

وە زوور نواێ خەنسنم گرتم.

شام ئڕامان هاوردن. هەمەگ وە دەنگ بەرز قسیە کرد و هەر وە ساتێ، گێشتی چرچگانەو.

دووسەگەم وەت فڵانی جاری مەچوو، تەنیام و میەوان تێ...

کەم کەم، هەمگ شەکەت بۊ. یەی جار نیشتە بان موبڵەگان، یەیجار چیەو خوار و پا دریژا کرد. دەمەکاوکگی گرتەی. وە دەنگ بەرز، ئاهاهای باوگەی وەت کە دجارە گێشتی چرچگیانەو.

هەمگ وەت: فڵانی، ت بنیش! م بچم...

وەتم همایون، گڕی بنیش، ئمجا وەل یەکا چییم.

وەت فڵانی! بیلا بچم، دەق کردم وە خودا...

دڵم توای بچمە ناو کۊچەگەیان و ئەوەڵ بگیرم، خاک بکەمە سرا و ئێکەش زووانم درارم وە دەنگ بەرز شیڕ بکیشم...

هەمگ هەڵسا...

لە کۊچە، لە تیەریکی شەوار، دەنگ شیڕ کیشان هەمگ هات...

فەرهاد عزەتی زادە