هەردی سەلامی نووترین بەرهەم خوەی لە کۆنسێرتەگەی شار سلێمانی پێشکەش کەێد
2023-10-30T13:30:13+00:00
شەفەق نیوز/ گورانیچڕ ناودیار کورد هەردی سەلامی بڕیاردایە نووترین بەرهەم هونەری خوەی وە ناو "ئازار " لە کۆنسێرتەگەی خوەی کە بڕیارە لە شار سلێمانی وەڕیوەبچوود پیشکەش بکەێد.
هەردی لە هەشمار فەرمی خوەی لە ئنیستاگرام راگەیان، کۆنسێرتەگە لە شار سلێمانی وەڕیوەچوود و گورانیەگە پیشکەش وە هەوادارەیلی کەێد، هەمیش ئویشێد "ئەگەر وە دڵدانە تا زویتر بڵاوبوود".
هەردی سەلامی، لە ساڵ ١٩٨٧ لە سلێمانی لەداڵگبویە، دەرچگ بەش شانۆیە لە پەیمانگای هونەرە جوانەگان، سەرەتا جویر دەرهێنەر کارکردیە و ماوەیگە دەسکردیە وە گورانیچڕین، خاوەن شمارەیگ گورانی و ڤیدیۆ کلیپە.
