سه‌عه‌د فه‌يلی كۆنسێرتێگ له‌پايته‌خت ساز ئه‌كا
ناوبرياگ له لێدوان تايبه‌تيگ ئه‌ڕا "شه‌فه‌ق نيوز" وت: "ئه‌ڕا سازكردن كۆنسێرتێگ له‌پايته‌خت كوردستان ئه‌ڕا كورده‌يل فه‌يلی سه‌ردان كوردستان كردمه‌و ئيسه هامه شار هه‌ولێر پايته‌خت".
زياتريش وت : "خه‌و وه ئيچنه ڕووژێگه‌و دوينستيام و فره خوه‌شحاڵم ك ئی ئارزوومه هاته‌دی ك هاتن ئه‌ڕا كوردستان و ديدار هاوزووانه‌يل كورد وه‌گشتی و كورده‌يل فه‌يلی وه‌تايبه‌تی بوی له كوردستان و عراق و هه‌ر وه‌ی بوونه‌يشه‌و ئاهه‌نگێگ هونه‌ری و ڕووشنهويری له‌هه‌ولێر ساز كه‌م".
فه‌يلی سه‌باره‌ت وه كۆنسێرته‌گه‌ی هه‌ميش وت: "بڕياره كۆنسێرته‌گه‌م له به‌روار 23/6/2013 له‌وه‌ختشۆمار 18:30 تا 12ی شه‌و له هۆڵ عه‌ينكاوه له‌شار هه‌ولێر پايته‌خت كوردستان وه‌ڕێه‌وبچوود و هاتن ئه‌ڕا گشت لاێگه وه‌بێ وه‌رانوه‌ر".
سه‌عه‌د فه‌يلی نيشته‌جای وڵات سويده‌و بێجگه له هونه‌ر گورانيچڕين و ئاوازدانان، وه‌زووانه‌يل كوردی و فارسی و عه‌ره‌بيش تێكست ئه‌ڕا گورانی نويسێد و تائيسه چه‌ن گورانييگ وه‌و زووانه‌يله تومار كردگه.
ا. ج
