زنجیرە درامای "سایلۆ" و پرسیارە گەورەیل ژیان

زنجیرەی "سایلۆ" توەنست ملیۆنا تەماشاکەر لە جەهان گردەو بکەێد، هەرلیوا پلەی  بەرزیگ لە هەڵسەنگاندن وەدەس هاورد، یەیش هیشت بوودە قسەی تەماشاکەر و رەخنەگرەیل و پسپۆڕەیل دروسکردن زنجیرە تەلەفزیۆنییەیل کە یەکیگە لە پیشەسازییە دیارەیل وەخت وەسەربردن لە جەهان.

ملیۆنا کەس لە جەهان لە ری دراما کەفنە فتراق چیرووک کارەکتەرە دڵخوازەیلیان، و بیگومان هەمیشە هەناێ چەوەڕی بڵاوبوین زنجیرەی نوویگ کەن کە وەرەو جەهانیگ نائاسایی بەیدەیان، پرسیارەیل گرنگیگ لەلایان پەیا بوود.

 زنجیرەی "سایلۆ" شایستەی ئەوەس لە پیشەنگی گشت دووسەیل دراما بوود،  ئی زنجیرەی ناوازە هویرکردن نوو و ناتەقلیدی خەێدە وەردەس.

 جەهان دویای کۆتایی 

 "سایلۆ" زنجیرە درامایگ نووە، کە چیرووک ئایەم لە جەهانیگ دویای کۆتایی گرێدە خوەی.  رویداوەیل زنجیرەگە لە ناو سایلۆ (Silo) روی دەن، شوینیگ پڕ لە نهێنی لەناو باڵەخانەی گەپیگ  کە چەن ژوور و ئوتاق ژیر زەوییە، کە خەڵک فرەیگ هانە ناوی، وە یاسای تون لەلایەن سیستەم سایلۆگە کە هیلن  باوەڕ وەوە بکەن کە ئی شوینە تاکە چارەسەرە ئەرا مقیەتیکردنیان لە جەهان دەیشت پیس و ویرانکەر، و  تاکە گەرەنتی سەڵامەتی وە مەنینیان لەناو سایلۆگەس.

 وەلێ جویر هەمیشه له ناو کۆمەڵگەیل ئایەم،  گرووپیگ هەس که له ناو مەردم سایلۆگە کەفنە مینەی راسیەگە، و ئەو پرسیار گەورە  کەن که له راسی پرسیار هەسی و فەلسەفیە، ک پەیوەندیی وە ژیان ئایەمە وەگشتی، پرسیاریگ لەی جویره: کی سایلۆگە دروس کردیە؟  لە دەیشت چەس؟  چە ها پشت ئەوە کە کامێرا توەنێد بوینیدەی؟، ئەڕا چە هایمنە ئیرا؟ چەن ساڵە هایمنە ئیرا؟  چەنیگ وەختمان مەنیە ئەرا دەرچگن؟  چە بوود ئەگەر گشت ئەو چشتەیلە کە لەلامان راسە، تەنیا دروو  گەورەیگ بوود!

 چیرووک دڵڕفن

 سایلۆ شوینیگ تاریک و نهێنی نشان دەێد، کە هەر لە یەکەم ئەڵقەیەو هیلێد تەماشاکەرەیل بکەفنە پرسیار،  چیرووک زنجیرەگە لە ری فۆرماتیگ نوو و نائاساییە باس کریەێد، زنجیرەی "سایلۆ" بیجگە لە مینەکردن لەناو ئی جەهان تاریکە، ئەو ململانێ ئایمە ئاشکرا کەێد کە لە چوارچیوەی ئی رویوەرویبوین و سەختیە روی دەن.

 بەرهەمیگ ئەرا  هویرکردن قویل 

لایەن دەرهێنان زنجیرەی "سایلۆ" چەوپووشی لەلی نیەکریەێد، ک زنجیرەگە وینەیگ هونەری دڵڕفن دیرێد.  کامێرایل خریەنە بان هویردەکارییە هویردەیل لە گشت دیمەنیگ، یەیش چشت و ئەزموون و داهێنان ئەرامان ئاشکرا کەێد لە وەکارهاوردن گشت ئەو تەکنیکەیلە ئەرا  دەرهێنان ئی زنجیرە وەی شیوە.

 شایستەیی

سایلۆ نموونەی هاز پیشەسازی وەخت وەسەربردنە ئەرا وروژانن هویرکردن نوو و نائاسایی، وە کوالیتی دەرھێنان و نمایشکردن، بیجگە لە چیرووکە سەرسڕکەرەگەی، دڵنیامان کەێد کە زنجیرەی "سایلۆ" شایستەی تەماشاکردنە.

زنجیرەی “سایلۆ” لە ٥ ئایار ٢٠٢٣ لەبان پلاتفۆری “ئەپڵ تیڤی+” ئەرا یەکەمجار نمایش کریا، ئی زنجیرە لە بنەمای زنجیرە کوڵە چیرووک “وول” لە نویسین هیو هۆوی و لە ساڵ ٢٠١١ بڵاو کریایە، ئەکتەر لەداڵگبوی سویدی ڕیبێکا فێرگسۆن و تیم ڕۆبینز رۆڵ سەرەکی لەناوی دیرن.