کوولە چیرۆک لە "داستایوفسکی"
داستایوفسکی وە ناو گردێخانە سەگێ دۊنێ کە گشتی ئەوانەی کە گیریانە وە لەقە دەنە لێ ئەو ڕەسێدا ئی سەگە لە یانە ک هانە ناو گردێخانە نیەێوای ،وە چەواشەوا وەختێ نزیکا بوونە لێ،خوەێ چەمنێدو وە شێوەی وسێ کە وە لەقە بەنە لێ ! یەێ ڕووژ داستایوفسکی چوودە نزیکیا و دەس تیەرێدە مل سەریا و نەوازشێ کەێ . سەگە وە ئەڵاجەۊێگا نووڕێدە پێا، سەگە لە لێ ترا دەێدو وە شێوەێ تیەڵێ لۊلنێ. لەو ڕووژە لە دۊا، سەگە هەر جار ک داستایوفسکی دۊنیاد لە لێ ترا دیاد !
ئەو سەگە وەگەرد گەن هەڵسووکەوت کردن خوو یا هووکارە بۊد و لە هەر شێوەێ مێرەبانی ڕخێ چیاد، وەختی کەسی وەگەردیا مێرەبانی ڕەفتار کردیاد ، ئاساش خوەێ وە مەترسی یا خەتەر دۊنیاد ! ئەڕا ئایمەیلیش هە لێواسە. ئایمەیلێ ک تەمام ژیاینیان هەڵسووکەوت گەن و بێ بەقایی دینە، نیەزانن وەختی موحەببەت دۊنن چۊهەڵسووکەوت یا بەرخورد بکەن،
دونیای مێرەبانی و هەڵسووکەوت خوەش و بەقا نیەناسن، وەناو ئی مژارە هەست وە غەریبی کەن و ڕخیان چوود، بێ باوەڕی و دڵەڕاوکی وجودیان داگرێ.
وە ڕاسی ئەڕا ئایمەیلێ ک خاسی نیەناسن لە گەنی ک ناسن، سامناکترە ! بێ مدوو نییە ک گاجار کەسەیلێ ک وەگەردیان گەن هەڵسووکەوت کەی دەس خوەشی وەلێد کەن
و ئەوانەی ک وەگەردیانا هەڵسووکەوت خاس و خوەشێ کەی لە لێد ناڕاحەت بوون ئەڕا یەگ وە خاسی و مێرەبانی هووکارە نین و بێگانەن وەگەردیا !
هەڵگەردان سادق جەلیلیان
