وینەی پاسپۆرتەگەی مارلین مۆنڕۆ وە 21 هەزار فرووشیەێد
شەفەق نيوز- وەشوینکەفتن
وینەیگ دەگمەن ئەرا خانمە ئەسارەی ئەفسانەیی هۆڵیوود، مارلین مۆنڕۆ، لە مەوقەی ئامادەبوینی ئەرا گەشتکردن مانگ هەنگوین وەگەرد شویەگەی بازیکەر بیسپۆل ناودیار جۆ دی ماجیۆ، وەرانوەر 21,655 دۆلار لە زیایکردن ئاشکرا لەی هەفتە فرووشیا.
ئەو وینە کە قەوارەی 2.25 × 2.75 بۆسەس، واژوو مۆڕنۆ وە رەنگ سوور وەپیەو بوی وەگەرد پیشکەشکردنیگ کە ئویشێد: "ئەرا بەڕێز بۆڵدز، وەگەرد سوپاس و گەرمترین سڵاو، مارلین مۆنڕۆ دی ماجيۆ".
ئەو وینە لە 29 كانون دویەم 1954 لە سان فرانسيسكۆ گریاس، دویای تەنیا دوو هەفتە لە سویر ئەو وەوی و زاوای ناودارە، ئەرا وەرگردن پاسپۆرتەیل چگن ئەرا مانگ هەنگوین و کارکردن لە ژاپۆن.
وەگورەی چیرووک میژوویی، دی ماجیۆ کە ئەو وەختە تەمەنی 40 ساڵ بویە، ناچار بویە بچوود ئەرا هۆڵ بازییگ نزیک تا وینەی مارلین مۆنڕۆ بگرێد، کە لەو وەختە تەمەنی 27 ساڵان بویە، کە وینەیگ ئەرا دەرکردن پاسپۆرتەگەی نەیاشتیە.
دیارە کە مارلین مۆنڕۆ لە داواکاری پاسپۆرت ناو فەرمی خوەی هاوردیە "نۆرما جين دی ماجيۆ"، و ناونیشان شویەگە لە سان فرانسيسكۆ (2150 بيتچ ستريت) داگە جویر شوین داکاسیان خوەی.
چگن ئەو ژن و شویە وەرەو ژاپۆن کاریگ لەشوینی دەرچگ، کە دویای ئەوە مۆنڕۆ رەسیە کۆریا ئەرا پیشکەشکردن نمایش ئەرا هیزەیل ئەمریکا، و دی ماجیۆ بویە سڵاکار تیمەیل بیسپۆل ژاپۆن.
جی باسە کە سویرکردن مۆنڕۆ و دی ماجیۆ تەنیا نۆ مانگ وەردەوام بوی، و یە دویەم شویکردن بوی ئەرا مارلین مۆنڕۆ، دویای شویکردنی وە ئەفسەریگ پولیس وەناو جەیمس دوهرتی، و دویای ئەوە شوی کردە نویسەر شانۆگەری ئارسەر میلەر، کە وەرجە مردن وەرجەوەختەی لە تەمەن 36 ساڵان لەلی جیاوە بوی.
