مناڵیگ بەریتانی هەفت زوان زانێد و بلیمەتی لە هویرکردن دیرێد
شەفەق نیوز/ ئەربیلا بروکوبیو، ئەو دویەت سێ ساڵان بەریتانیە، چەوی بکەفێدە بان هەر کتاویگ یا بەڕنامەیگ، وە زوی خوەنێدەی و لە هویرمانی مینێد، هەرچەن جاری مناڵە، باوجی ریسگایل سەرەکی ٧ زوان زانێد، و نشانەیل هاتوچو زانێد، و هەمیش سەری لە پڕۆپاگەندەی تەلەڤزیۆنی دەرچوود.
تەنیا یەک گلە بنووڕێدە کتاویگ یا تابلۆیگ لەبان جادە، دی لەهویری نیەچوود، ک گشت ناو هەسارەیل زانێد، و ناونشان ماڵ خوەیان، شمارەی تەلەفۆن داڵگی، نەگ هەریە، باوجی خیزانەگەی ئەربیلا ئۊشن: ئی مناڵیانە توەنێد گشت ئەو پەرتووک و چیرۆکەیلە بخوەنێد.
لەجیای ئەوەگ باوگ و داڵگی بنیشتن وەرجە خەفتن ئی مناڵ سێ ساڵانە چیرۆک و مەتەڵ ئەرای بخوەنن، خوەی ئی ئەرکە جیوەجی کەێد، و هەمیش بەهرەگەی رەسێدە پەیاکردن چەوچەیل بازیەیلە و رێکخستن پارچەیل وینە.
ئەربیلا ک وەگەرد خیزانەگەی لە ناوچەی هارتڤوردشیر بەریتانیا نیشتنە، توەنێد رستەیل فەڕەنسی و چینی و یابانی و ئیسپانی و ئیتالی و بولگاری و ئەڵمانی بۊشێد.
ئی زاڕووە هەنای نووڕێدە شیوەیلە وەزوی چنە بن هویرمانی، و کتاوەیل یاسایل ریوبانەیل خوەنێد، و هەنای تەنیا یەک گلە خوەنێدەی، تەمەی داڵگ و باوگی کەێد، تا مقەیتی ریەگە بوون.
ماریا داڵگ ئی دوەتە ئەرا رووژنامەی "میترۆ" وت: ئەربیلا خاوەن بەهرەیگ جیاوازە، و لەوەختیگ پەیا بویە هەمیشە زیرەکە و زانێد چە لە دەوری بوود.
ئەو داڵگ ٤٠ ساڵانە دیاری کەێد ک دویەتەگەی توەنست پیت و رەنگەیلە لە زوان ئینگلیزی بزانێد هەنای لە تەمەن ١٨ مانگان بوی، ئیجا دەسکردە هووکارەبوین زوانەیلیگتر، و ئەوەیش لە نووڕین بەڕنامەیل بان یوتیووب.
