زەوی "شەش مانگ" ديرێد پەیاکردن نوویگ زانایەیل سەرسام کەێد
شەفەق نيوز/ توێژینەوەیگ لەی دویاییە ئاشکرا کردگە کە زەوی هاتێ بڕیگ مانگ تەواو داشتوود نەک تەنیا یەک مانگ جویر باوەڕ باویگ لەلای کەسەیل فرەیگ.
تیمیگ توێژەرەیل ئەمریکا، ئیتاڵیا، ئەڵمانیا، فینلاند و سوید ئەرایان دەرکەفتگە کە زەوی لەلای کەمەو شەش مانگ بویچگ دیرێد کە وەشیوەیگ رێکوپیک وەدەوریەو گەردن، کە فرەیان پارچەیل بویچگ هەن ئەو مانگەیل راسگانیە کە گشت شەویگ لە ئاسمان دیارن.
توێژەرەیل وتنە ئی مانگەیل بویچگە تیرەگەیان نزیکەی ٦ پا بوود و لە ئەنجام کاریگەریی کەفتن ئەسارە بویچگەیل لەبان روی مانگ دروس بوین.
زانایەیل ئویشن "وە نووڕستن ئەوە کە لەسەدا ١٨ی ئەو تەنەیلە کە وەشیوەیگ وەختانە پەیوەندی دیرن جویر مانگ بویچگ بیریەنە قەڵەم، ئەنجامەیلمان ئەوە نشان دەن کە نزیکەی ٦.٥ مانگ بویچگ لە سیستەم زەوی-مانگ لە هەر وەختیگ کە تیرەگەیان لە یەک مەتر گەورەترە".
وەگورەی رووژنامەی (دەیلی مەیل) بەریتانی، ئی پارچەیل شکیاگە کە وە "جیماگەیل مانگ" ناسیانە، توەنن وە خولگەیگ جیگیر بجویلن و تا ماوەی ساڵانیگ لە نزیک زەوی بمینن.
ئی پارچەیلە وەردەوامن لە خولگەی زەوی تا شوینیان ئاڵشت کەن یا کەفنە بان زەوی یا مانگ.
شیکاری دوو مانگ بویچگ
توێژینەوەگە کە لە گۆڤار Icarus بڵاو کریاس، پشتی وە شیکاری دوو مانگ بویچگ بەساس کە لەی دویاییە پەیا کریانە وە ناوەیل Kamuualoa و 2024 PT5.
توێژەرەیل وتنیش: کاموئالۆا و ٢٠٢٤ PT5 پارچەی مانگ رەسەنن کە تیرەگەیان لە ناوەین ٤٠ بۆ ١٠٠ مەتر بوود.
2024 PT5 لەوەر قەوارە و وەردەوامی بویینی لە نزیک هەسارەگە ناو مانگ وەختانەی دویەم زەوی لەلی نریاس.
وەرجەیە زانایەیل وە وەکارهاوردن گریمانەی "لەیەکدان مەزن"، دروسبوین مانگ ئاشکرا کردن، کە باس لەوە کەێد کە مانگ دویای لەیەکدان ناوەین زەوی و هەسارەیگ کە قەوارەگەی وە قەوارەی مەریخ نزیکەی ٤ ملیار ساڵ وەرجە ئیسە دروس بویە.
ئەگەر گریمانەی "لەیەکدان مەزن" و ئەنجام شیکاریی ئەسارە بویچگەیل "2024 PT5" راس بوون، واتە ئی تەنە بۆشاییە بیجگە لە "نەوە"ی مانگ، و "گوردەی" زەوی هیچیگ ترەک نییە، واتە لە ئەنجام پارچەی مانگەو بویە کە لە بنەڕەت هن خود زەوی بویە، وەقسەی "دەیلی مەیل".
