چیرووک ژیان (قاوەی ژیان)
کوڵەچیرووک/ چەن هاوڕییگ سەردەم خوەنستن ، کە لە دویای دەرچگن لە زانکۆ هەریەکێگیان پیشەیگ داشت، لە دویایی ماوەیگ بڕیاردان وەگەرد یەکەو سەردان زانکۆ بکەن تا دیداریگ وەگەرد ماموساگەیان بیاشتوون، ئەوان سەرقاڵ قسەوباس بوین جویر گشت جاریگ بەشیگ فرە لە باسەیلیان گلەیی لە ژیان بوی.
ماموساگە لەوەخت قسەوباسەیلە قاوە ئامادە ئەکرد و ئەو دەسگای قاوەسازەگە هاورد وەبان میزەگەی نوایان دانارێ و داوا لەلیانکرد هەریەکیگیان خویان قاوا ئەرای خوەی بکەێدە ناوی
.
وەبان مێزەگە چەندین جویر پەرداخ بوی: پەلاستیکی، شیشەیی، چینی و چەندین جویر‌تر، هەنای خوەنەواریلە قاوەگە کردنە ناوی هەرکامنیان قاوەگەی خوەی وەدەسیەو بوی، ماموساگە وە میهرەبانییەو وت: (مناڵەیلە، بنوڕن گشتدان گڵاسە رەنگینیلە هەڵچانن، ئیرنگە تەنیا گڵاسەیل ناشرین وەبان مێزەگە مەننە!).
خوەنەوەرەیلە کە ئەلاجویان وە قسەی ماموساگەیان هات بی دەنگ مەنن، ماموساگە وەیجویرە درویژە وە قسەیلیدا؛ '' لە راسییەو ئەوەگ ئیوە تواستینێ قاوە بوی نەک گڵاس، باوجی گڵاسە رەنگینەیل هەڵچانن لە هەمان وەخت چەودان وە گڵاسەیترەکیش بوی، ژیان جویر قاوەس و کە و مووچە و پێگەی کۆمەڵایەتی گڵاسەگەس، ئی گڵاسیلە ژیان رەنگینەو کەن باوجی کوالێتیەگەی ئاڵشت نیەکەن.
هەڵبەت رەنگینی کاریگەری وەباندان دیرێد ئەرا نوشین قاوەگە، باوجی ئەگەر زیاتر سەرنج بخەنە بان گڵاس و چشتەیل وەبایەخ و کوالیتی لە هویرەو بکەن چێژ لە بونەگەی وەرنەگرن مانای راسی قاوە لەدەس دەن.
