ئەرا یەکەمینجار لە مێژوو خانمیگ بوودە راهێنەر هەڵوژاردەی ئينگلتەرا
2024-08-07T08:38:36+00:00
شەفەق نیوز/ گاریس ساوسگەیتی راهێنەر هەڵوژاردەی ئینگلتەرا دویای ماڵئاواییکردنی لە جام یۆرۆی 2024 دەستلەکار کیشانەوە پیشکەش کرد و وازهارد لە ئەرکەگەی.
رووژنامەی "گاردیان"ی بەڕیتانی بڵاویکرد، یەکێتی توپان ئینگلتەرا وەردەوامە لە دیاریکردن راهێنەر نوو هەڵوژاردەگەیان و رەزامەندیش دایە لابان ئەوەگ راهێنان بیانی پۆستەگە وەربگرێد.
رووژنامەگە ئاشکەرایکرد، ئیرنگە سارینا ویگمانی خانم هۆڵەندی و راهێنەر ئیسەی دویەتەیل ئینگلتەرا بژردەی یەکەمە ئەرا وەرگردن راهێنەرایەت کوڕەیل ئینگلتەرا لە شوین ساوسگەیت، یەیش یەکەمینجارە لە مێژوو خانمیگ راهێنەرایەتی هەڵوژاردەی کوڕەیل وەربگرێد.
راهێنەرە هۆڵەندیەگە تەمەنی 54 ساڵە، کە راهێنەرایەتی هەڵوژاردەیل ئینگلتەرا و هۆڵەندا کردیە وەگەرد یانەیل لیید و دین هاگ، نازناو جام یۆرۆی دویەتەیل 2017ی ئەرا هۆڵەندا وەدەسهاوردیە، وەگەرد خانمەیل سێ شێرەگەش نازناو جام یۆرۆی دویەتەیل 2022 و فاینالیزمای 2023 بردیەسەو.
