دویای ٥١ ساڵ لە رفیانی.. خانەوادەیگ ئەمریکی دویەتیان پەیا کەن

شەفەق نیوز/ هەرچەن یە ٥١ ساڵە بیسەروشوینە، وەلێ ئەو خانەوادەی ئەمریکیە لە ویلایەت تیکساس، دەس لە ئومید پەیاکردن دویەت رفیاگیان نەوڕین، ک هەر ساڵیگ ئاهەنگ لەداڵگبوینی کردیان، تا رەسیە رووژیگ ئارەزوویان هاتە جی، و ئەو خانەوادە گردەو بوین.

لە ساڵ ١٩٧١، ئەلتا ئەبانتنکۆ، کار لە چیشتەخانەیگ کەێد، و کەسیگ خوازێد چەوی وە مناڵەیلی بوود، تا بتوەنێد کار خوەی بوەێدە ری، چوینکە لە شویەگەی جیڤری هایسمیت جیاوە بویە، ئەراوە پڕۆپاگەندە لە رووژنامە بڵاو کرد، وە مینەی کەسیگ دانیشێدە لای مناڵەیلی، و کرا وەپی بەێد.

دویای ئەوە، ژنیگ تەلەفۆنی کرد، و لەناو ئەو چیشتەخانە ک ئەبانتنکۆ کار لەناوی کەێد یەکانگیرەو بوێن، باوجی ئەو ژنە ئامادە نەوی، وە دەسپیچگ ئەوە ک کاریگ تر دیرێد، و بایەتە لەو مەوقە لەلای مناڵەیل کەسیگتر بوود.

ئەبانتنکۆ ناچار بوی داوا لەو ژنە بکەێد بچوودە ماڵەگەی، و چەوی وە مناڵەیلی بوود، تا ئەوەنە کارەگەی تەواو کەێد، ئیجا لەماڵەگە یەکانگیر بوون.

باوجی هەنای چوودە ماڵ، داڵگەگە نووڕێد ک دویەتە دوو ساڵانەگەی وەناو میلیسا نیەسەی، و دی لەو رووژەو وەگەرد پولیس شار فۆرت وورت دەسکردە مینەکردن ئەو دویەتیە،

لەو وەختە، ئەو مناڵە ناوی بویە میلانی و هەر لە خود شارەگەی داڵگی بویە، و خوەییش نیەزانێد ک رفیاگە، و هەر نیەزانیدیش ک خانەوادەگەی مینەی کەن، تا فەیسبووک هاتە دەر.

لەبان فەیسبووک، کابرایگ پسپۆر لە وەشکین دی ئێن ئەی، ک نووڕید بنچینەی مناڵەیل ئەو دویەت رفیاگە وەگەرد بنچینەی ئەو خیزانە گونجیاگە.

لە سەرەتا، میلانی یا میلیسا، نووڕیە ئەو پەیامە ک لە باوگ بایۆلۆژیی ئەرای هات، و گومان کرد ک شایەت خەڵەتانن بوود، و ئەرا رووژنامەوانی وت: باوگم پەیامیگ ئەرام وەبان فەیسبووک کلکرد، و وت: زانێ یە ٥١ ساڵە مینەی دویەتەگەم کەم.

وتیش: باوەڕ وە قسەگەی کردم هەنای خوەی و داڵگم وتن ک من نیشانەیگ لە پشتم دیرم.

باوگ و داڵگ میلانی ئەرا یەکەم جار گردەو بوین، و بڕیگ وەشکین دی ئێن ئەی فەرمی کردن، و باسەگەیان لەبان سۆشیال میدیا نویسانن.

برا و خوەشکەیلی وتن: میلانی خوازێد دووارە ناوی بوودە میلیسیا، و خوازێد وەو ناوە شوی بکەێد، تا باوگی بتوەنێد لە ئاهەنگ سویرەگە لە کلیسە وەگەردی ری بکەێد.