برادەر و نیمە برادەر
ئویشن رووژیگ لە رووژەیل، پاتشایگ خوەی کردە پیای لاتیگ، گەردیە ناو بازاڕ، تا بزانێد مەردم چە کەن و چە ئویشن.
وەلای کابرایگ خاوەن دوکان رەد بوی، ئەو کابرا وەرد کوڕەی قسە کەێد، نزیکەو لەلییان بوی تا گووش بەێدە قسەی باوگ و کوڕ.
باوگ وە کوڕ وت: ئەرا ت چەن برادەر دیرید، هەر رووژیگ وەرد کەسیگا ری کەید، و هەر رووژیگ کەسیگ ئەرا میوانی مکیس کەید.
کوڕ وت: باوگە من پەنجا برادەر دیرم.
باوگە وت: من تەمەنم رەسیە پەنجا ساڵ، تەنیا یەک برادەر و نیم برادەر دیرم.
کوڕ وت: باوە نیم برادەر چوینە؟
باوگە وت: بایەسە خوەد بزانید نیم برادەر چوینە.
پاتشا هەرچەگ سەر خڕ دا، لە قسەی ئەو خاوەن دوکانە نەڕەسیەو، ئەراوە هەناێ گلەو خوارد، وە دارودەسەیلی وت: بچن ئەو پیای خاوەن دوکانە ئەرام بارن.
پیای خاوەن دوکان هاوریا وەردەس پاتشا، پاتشا لەلی پرسی، ت چوین یەک برادەر و نیم برادەر دیرید؟
پیاگە وت: جەناب پاتشا، ت فەرمان وەسێدارەدان لەبان من دەرکە، وبا گشت مەردم بزانن من کوشیەم، تا بزانیمن برادەر چوینە، و نیم برادەر چوینە.
پاتشا رازی وەی کارە بوی، و وە دارودەسەیلی وت: دهوڵ وەسێدارەدان ئی پیاگە لەناو شار بکوتن.
دویای رووژیگ، پیایگ هاتە لای پاتشا، وت: ئی پیای خاوەن دوکانە هویچ گوناهیگ نەیرێد تا بەێدەی سێدارە، ئەگەریش کاریگ کردگە، من نیم دارایی خوەم پیشکەش کەم تا لە مردن قورتاری بکەید.
پاتشا وت: نە، بایەسە ئی پیا بمرێد.
کابرا دی هویچیگ نەوت، هەڵسیا وچگە ری.
دویای گڕیگ، پیایگ هاتە وەردەم پاتشا، وت: ئەڕا ئی بیگوناهە دەینە سێدارە، خو م تاوانبارم، م بویمە ک کەسیگ کوشتمە، و م بویمە کە ماڵ دزیمە، و م بویمە کە یەک هەمکەی تاوان کردمە، یە خوەمم هاتمەسە وەردەس دەسەڵات، و ئەو پیای بیگوناهە مەرەقەز بکەن، و مل من وە سێدارە بیەن، و هەرچەگ پویل دارایی دیرم گشتی بوەن.
پاتشا دی زانست، برادەر چوینە، و نیمە برادەر چوینە.
