ڕێككه‌فتن "حه‌دكا" و "PKK" له‌بان وه‌رده‌وامی گوفتوگووه‌یل له هه‌ولێر
دانیشتنه‌گه له هۆڵ كۆنفرانسه‌یل سه‌عه‌د عه‌بدوڵڵا له هه‌ولێر و وه‌ئاماده‌بوين وه‌زیر ناوخوه‌ێ حكوومه‌ت هه‌رێم كوردستان كه‌ریم سنجاری و دو شاند پایه‌به‌رز دیمۆكرات و په‌كه‌كه ساز كریا.
له شوون دانیشتنه‌گه كه‌ریم سنجاری له كۆنگره‌ێ ڕوژنامه‌گه‌ریێگ وت: دانیشتنه‌گه وه ده‌سپێشخه‌ری حكوومه‌ت هه‌رێم و له كه‌شێگ ئه‌رێنی ساز كریاگه و هه‌ردولا ڕێكه‌فتنه چاره‌سه‌ر ناكوكیه‌گان بكه‌ن و وه‌ێ زێوه سه‌رله‌نوو وه‌ل یه‌كا دانیشن.
شاند حكوومه‌ت هه‌رێم كوردستان دويه‌كه له شار كۆيه وه‌ل شاند مه‌كته‌ب سیاسی پارت دیمۆكرات كوردستان ئيران دیدار كرد و له قه‌ندیلیش وه‌ل سه‌ركرده‌یل په‌كه‌كه گوفتوگوو كرد.
هه‌ركام له مه‌هات عه‌كید ئه‌ندام ليژنه‌ێ ناوه‌ندی په‌یوه‌نده‌یل كۆنسه‌ێ ملله‌ت كوردستان باڵ سیاسی حزب كارگه‌ره‌یل كوردستان و مه‌حه‌مه‌د پێ‌نجوێنی كه‌سایه‌تی نزیك له پارت كارگه‌ره‌یل كوردستان و ئه‌ندام كۆنگره‌ێ نه‌ته‌وه‌یی كورد وه‌نوێنه‌رايه‌تی له په‌كه‌كه به‌شداری كردن و له‌لايه‌ن پارت دیمۆكرات كوردستانیش حه‌سه‌ن شه‌ره‌فی جێگر سكرتێر حدكا و حه‌مه نه‌زیف ئه‌ندام مه‌كته‌ب سیاسی ئه‌و پارته به‌شداربوين.
سه‌رۆك هه‌رێم كوردستان مه‌سعود بارزانی ڕووژ دوشه‌ممه جه‌نگ و گرژیه‌يل ناونی هه‌ردو حزبه كوردستانیه‌گه له ناوچه‌یل سنووری هه‌رێم كوردستان وه‌ل ئیران شه‌رمه‌زار كرد و له هه‌ردولا داوا كرد دگان بگرنه خوه‌یانا و ناكووكیه‌گان قویله‌و نه‌كه‌ن.
