وە میوانی خواردن و دیاری ئەرا کەسوکارەیل قوربانیەیل پیشمەرگە.. هەولێر ئاهەنگ رووژ جەهانی مناڵ کەێد
شەفەق نیوز/ لە شار هەولێر پایتەخت هەرێم کوردستان، ئمڕوو یەکشەممە، ئاهەنگیگ وە بوونەی رووژ جەهانی مناڵ کریا، ک ئاهەنگەگە میوانیکردن خواردن و بەشەوکردن دیاری و وەیلکان ئەرا مناڵەیل وەخوەی دی.
حاجی، سەرپەرشتیار ئاهەنگەگە ئەرا ئاژانس شەفەق نیوز وت: ئی چالاکیە سێیەمە لەیجویرە، ک هەر ساڵیگ دووارە کریەێد، و مکیس مناڵەیلیگ لە چینەیل جیاجیا کریەێد، و ئمڕوو مکیسەگە ئەرا کەسوکارەیل قوربانیەیل پیشمەرگە بویە ک لە ناوچەی بارزان هاتنە.
لەلای خوەییش، نەرمین حاجی خانمە وەڕیەوبەر یەکیگ لە مەکتەوەیل ک لە ئاهەنگەگە بەشداری کەێد ئەرا ئاژانس شەفەق نیوز وت: ئامانج لەی چالاکیە خوەشی ئەرا مناڵەیل دروس بکەیمن، ک کەسوکاریان لەناو جەنگەیل لە هەرێم کوردستان شەهید بوینە، و دووپاتکردن لەبان ماف مناڵەیل لەی رووژە.
بڕیگ لە کەسایەتیەیل حکومەتی ئامادەی ئی ئاهەنگە بوین ک چالاکیەیل فرەیگ ئەرا دڵخوەشکردن مناڵەیل لەناوی بوی.
