وەزیر تەندروسی هەرێم مەزەنەی داوەزین زوییگ لە شەپۆل نوو کۆڕۆنا کەێد
\شەفەق نیوز/ دکتۆر سامان بەرزنجی وەزیر تەندروسی لە هەرێم کوردستان، ئمڕوو سێشەممە، مەزەنەی تەواوبوین شەپۆلە نووەگەی ڤایڕۆس کۆڕۆنا کرد، ولێ لە خود وەختەگە هووشداری ئەرا گرنگی پابەندبوین وە ریکارە مقەیەتیەکان ئەرا مسۆگەرکردن ئەو تەوابوبنە کرد.
بەرزنجی لە قسەیلی ئەرا رۆژنامەوانیەیل لە مەوقەی وەرگردن هاوکاری پزشکی ئەرا نواگردن ڤایڕۆسەگە لە رێکخراو تەندروسی جهانی وت: رەوشە تەندروسیەگە هەر خوەیە و لە ئاست بڵاوبوین پەتاگە ئاڵشت نەویە و تووشهاتنەیلە نەداوەزیانە.
وتیش؛ نشانەی سوور پەتاگە ناوچەیل عراق پووشاد، و مەزەنە کەیمن بڕەسیمنە خود نشانەگە، چوینکە ئیسە ئیمە هایمنە رەنگ وەنەوشەیی خەس، و هەڵوێست پەتاگە وەدویا نەچگە، و بایەتە خەڵکەگە پابەند بوون وە رینمایل تەندروسی و بایەتە خۆڕاگری بکەن و لەماڵ نەدران مەگەر ئەرا کار گرنگیگ.
وەزیرەگە نشان دا ک بی گومان وەی زویە ئی شەپۆلە تەواو بوود و رێژەی تووشهاتنەیلە کەمەو بوود، و وەگورەی پسپۆڕەیل زانست پەتایلە، هەر شەپۆلیگ یا ئاڵشتبوی نوویگ لە ٤ - ٦ هەفتە وەردەوام بوود، وەلێ دەربارەی ڤایڕۆس کۆڕۆنا هیچ مەزەنەیگ سەد لە سەد لە کۆتایی نییە چوینکە یە پەتای نوویگە و تۆێژینەوەیل قویلیگ خوازێد و چەن ساڵیگ وەپی چوود، وەلێ وەگەرد ئەوەیش ئیمە پابەندی وە ریکارە تەندروسیەکان خوازیمن.
