هەرچەن رەوشەگە سەختە.. هەرێم کوردستان پەیمان دەێد وە دابینکردن ژیان گونجیاگیگ ئەرا ئاوارەگان
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو یەکشەممە، پەیمان دا وە وەردوامی لە دابینکردن ژیانیگ گونجیاگ ئەرا زیاتر لە یەک مەلیۆن و دووسەد هه‌زار ئاوارە لە هەرێم. ئەویش لە چەوپیکەفتنیگ هات وەگەرد ئیڤان فایق جابرو وەزیر کۆچ و کۆچبەران و شاندیگ یاوه‌ری. بەیاننامەیگ لە حکومەت رەسیە ئاژانس شەفەق نیوز وت: لە کۆبونەوەگە باسکریا لە دویاترین دۆخ لە عراق، ولەلیان ئەوەگ پەیوەندی دیرێد وە باوەت ئاوارەگان وەتایبەت لە هەرێم کوردستان، وهەوڵدانەگان ئەرا هاتنەوەیان وە ره‌زامه‌نی خوەیان ئەرا ناوچەیلیان. سەرۆک وەزیران ئاماژەدا ک حکومەتەگەی وەردەوامە لە دابینکردن ژیان گونجیاگ ئەرا زیاتر لە یه‌ك مەلیۆن و دووسەد هه‌زارئاوارە لەبان رەوشە ئابووریە سەختەگە ک هەرێم وەخوەی دوینێد، و هەمیش داوا لە کۆمەڵگای ناودەوڵەتی و حکومەت فیدڕاڵی کرد ئەرا ئەنجام داین ئەرکەیلیان وە هاواکاری هەرێم لەی باوەتە.
