هەر ئیسە.. خانەقین باخچەی کتاویگ ئەرا خوەی دروس کەێد
شەفەق نیوز/ ماڵ رووشنهویری شەهید سەلام لە شار خانەقین، وەهاوکاری دەزگای رووشنهویری جەمال عیرفان، ئمڕوو یەکشەممە، لە جادەی کورنیش، شوونیگ ئەرا باخچەی کتاو دروس کرد.
سەرچەوەیگ لە شار خانەقین ئەرا ئاژانس شەفەق نیوز وت: وە ئامادەبوین قایمقام خانەقین، و بڕیگ لە رووشنهویرەیل شارەگە، ئاهەنگ دامەزران باخچەی کتاو لە ناو باخچەی جادەی کورنیش کریا، ک ئەرا ماویگە شارەوانی خانەقین سەروە هەرێم کوردستان کار و ئامادەکردن وەشیوەی جیواز و رەنگینیگ لەناوی کرد، و شوونیگ ئەرا باخچەی کتاو لەناوی تەرخان کریا، ئمڕوو، ئەو ئاهەنگ کردنەوە و دامەزراننە وەڕیەو چگ.
سەرچەوەگە وتیش؛ ئاهەنگە وە کردنەوەی ژوور کتاوخانەگە و چەن وتاریگ لەلایەن دلێر سایە قایمقام شارەگە، و عەباس عەبدولرەزاق وەرپرس ماڵ شەهید سەلام، و چەن کەسیگ لە رووشنهویریل شارەگە دەس وەپیکرد، ئیجا وە بێشەکەشکڕدن گورانی و مۆسیقا لەلایەن هونەرمەنەیل شارەگە کۆتایی وەپی هات.
