کۆنترین ساعەت خاسەوکەر لە سلێمانی: پیشەگەم ئەوەسا فەوتیەێد
شەفەق نیوز/ لەناو دوکان بویچگیگ، شایەت جی دوو کەس لەناوی وەزوور بوودەو، لەناو یەکیگ لە جادە سەرەکیەکان لە بازاڕەیل شار سلێمانی، قادر مەڵا تەیب ک ناسریاگە وە وەستا قادر ساعەتچی، ک پیشەی ساعەت خاسەوکردن لە بەنجاکان سەدەی گوزەیشتە لە باوکی بردگە، ئەو وەستا هالە ناو ئەو دوکان بویچگە.
مەڵا تەیب ساعەتچی، ئەرا ئاژانس شەفەق نیوز ئویشێد: ریە دریژەگەم لە تەمەن شەش ساڵان دەس وەپیکرد، ک چیامە دوکانەگەی باوگم لە گەڕەک چەمچەماڵ، و لە نزیکەو نووڕستیامە کارکردنی هەنای ساعەت دروس کردیاد و ساعەتەیل مەردم خاسەو کردیاد، و وەگەرد ساڵەیل کارەگە لەلی هووکارە بویم، و هەنای باوگم مرد، پەرچەم پیشەگە لە شوینی هەڵگردم، و لە پەنجا ساڵ گوزەیشتە تا ئیسە و تا مەوقەی مردنم کار لەبان دەنگ چککەی چرکە و خوەلەکەیل کەم.
دەربارەی کار و پیشە کۆنەیلە، مەڵا تەیب وت: ژیانەگە ئاڵشت بوی، و کار و پیشەیلە گەشە کردن، و جهان بویە باخچەی بویجگیگ، و پیشە کۆنەیلە دیرن لەناو دەریای تەکنۆلۆژیا خنکیەن و ساعەتچییش پیشەیگە لەوانە، ک ئەوەسا رووژیگ لە رووژەیل شوینی بڕیەێدەو، و مەردمەگە دی نێخوازن کەسیگ ساعەتەیل کۆنە ئەرایان خاسەو بکەێد.
