نێچیروان بارزانی داوا لە نۊسەرەیل کورد کەێد رووڵ خوەیان وەڕێەو بووەن
شەفەق نیوز/ نێچیروان بارزانی سەرۆک هەرێم کوردستان، ئمڕوو پەنجشەممە، پەیام پیروزبایی ئەرا یەکێتی نۊسەرەیل کورد، وە بوونەی ساڵیاد پەنجا و پەنجەمین دامەزرانی کل کرد.
سەرۆک بارزانی وت: لەی ساڵیاد پێرووزە، وە چەو ڕێز نووڕیمنە زیاتر لە نیم سەدە لە رەنجداین یەکێتی توکمەی خەباتکاردان، ئی رێکخستن دەوڵەمەنە وە بەرهەم و پێشکەشەیلی، ک خزمەتیگ وەرچەو و وەردەوام وە ئەدەب و زوان و کەلتوور کورد پێشکەش کرد، و هەمیش لە مەیدانەیل خەبات نموونەیگ ئازایی و سومبلیگ نواگردن ستەم بۊ، وهەمیشە لە سەنگەر گەل و نەتەوەی خوەی بۊ.
وتیش: وەخاتر ئیسە و دۊارووژمان، چەومان هالە گشت نۊسەرەیل کورد و ئەدیبەیل کوردستان، تا رووڵ گورج خوەیان لە ئەوزەڵکردن هەس نیشتمانپەروەری، بیناکردن مرۆڤ، ئازادی و مقەیەتیکردن شیوە و کەلتوور کورد و کوردستان جیوەجی بکەن، و ئەوەسا وە گشت جۊریگ بۊمنە پاڵپشتیان.
سەرۆک هەرێم کوردستان وتیش: وەی بوونە، ساڵیاد نەمر نۊسەرە شەهیدەیل کەیمن، ک قەت سەر بەرز قەڵەمیان لە سەنگەرەیل خەبات و وەرگری لە ئازادی و مافەیل گەل نەچەمیا، و گیان پاک خوەیان پێشکەش کردن و سفت هەڵوێست خوەیان گردن، ک سڵاو رێز ئەرا خیزانەیل سەربەرزیان، سڵاو ئەرا گیان پاک گشت ئەو نۊسەرەیلە ک ژیان خوەیان ئەرا خزمەت ووشەی کوردی و پیشکەفتن روشنهۊری و کەلتوور گەل کوردستان پێشکەش کردن.
