نێچیروان بارزانی دڵنیای خەڵک کوردستان کەێد و نرخدار هەڵوێست سودانی کەێد
یەیش لە وتاریگ هات کە لە مەراسیم دەرچین خوەنەوارەیل زانکۆی سۆران لە ئیدارەی خوەیسەری سۆران لە هەرێم پیشکەشی کرد، سەرۆک بارزانی لە لیدوانیگ ئەرا خەڵک هەرێم کوردستان وت “دڵنیایمن قەیرانەیل رەد بوون و وە تەقەلا و هەوڵ خەڵک کوردستان رەسیمنە بانانیگ خاستر”.
وتیش: "لێرەوە سوپاس خوەمان پیشکەش وە هاوڵاتیەیل هەرێم کوردستان کەیمن کە هەمیشە لە رەوشەگە فامستنە، رەوش سەخت ئابوورییان لەوەرچەو گردنە، و خوەیڕاگر بوین"، دڵنیایی دادە خەڵک کوردستان کە "تەقەلایل ئەرا چارەسەرکردن ئەو گیچەڵەیلە وەردەوامن و لەو رویەو حکومەت هەرێم پەیوەندی جددی وەل حکومەت فیدراڵی کەێد”.
بارزانی سوپاس لە سەرۆک حکومەتی فیدراڵی، محمد شیاع سودانی و هەڵوێست وەرپرسیارەی کرد، کە گشت نیاز خوەی ئەرا چارەسەرکردن کێشەیل وەرد حکومەت هەرێم نشان دا، وتیش؛ ئومید خوازیمن لە بنەمای دەستوور و سیستەم فیدراڵی، و لە بەرژەوەنی گشت عراق بوود.
وتیش: "لە وەختیگ هەرێم وە رەوشیگ فرە سەخت رەد بوود، ئیمە لە عراق وەتایبەت لە هەرێم کوردستان زیاتر لە گشت وەختیگ ترەک هەماهەنگی خوازیمن، بایەسە گشت لاییگ بەرژەوەنی میللەت بخەێدە نوای گشت چشتیگ و ری نەیەیمن وڵاتەگە بوودە بەشیگ لە گیچەڵەیل”.
لەباوەت ئەو مامووستایلە کە لە شار سلێمانی و دەورگردی بایکۆت گردنە، نێچیروان بارزانی وتیش: داوا لە مامووستایل پەروەردە و خوەنستن باڵا کەم کە لەوەر دویاکەفتن مووچە زیان وەپییان رەسیە، پەروەردە و پەروەردەی مناڵەیلمان نەونە قوربانی ئەو رەوشە، وتیش: ئیمە لە نزیکەو هایمنە شوینکەفتن رەوشەیل و بژێوی ژیاندان، دڵنیابوون حکومەت هەرێم کوردستان گشت هەوڵیگ دەێد ئەرا ئاڵشتکردن ئی رەوشە.
وتیش: زانکۆ شوینیگە ئەرا فێربوین و مەعریفەت، بایەسە دەرچگ نموونەی دەسپێشخەر و هویری واز بوود، بایەسە رۆڵیگ لە چارەسەرکردن هەر گیچەڵیگ داشتوود لە هەر بواریگ و بەشدارییگ کارا بوود لە دەوڵەمەنکردن رووشنهیری و ئاست هووشیاری تاک و کۆمەڵگا.
دووپاتیش کرد، بایەسە زانکۆ هەمیشە گرنگی وە بەرزی کوالێتی خوەنستن بیەێد، تا ئەوپەڕ سوود لە زانست و پەرەپیدان تەکنەلۆژی وەربگرێد، زانیاریەیل وە نووترین تەکنەلۆجیا لە گشت بوارەیل نووو بکەێدەو، گرنگی تایبەت وە بوارەیل خوەنستن زانستە مرۆییەیل بیەێد، و وەردەوام لە پەیوەندی بوون وەرد زانکۆە ناودەوڵەتییەیل.
