نێچیروان بارزانی: دەستوور کوردستان نووسیمن ماف گشتی لەناوی بوود
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، راگەیان سەرۆکایەتی هەرێم ئەوەسا دەس کەێدە نووسین دەستوور هەرێم کوردستان وە هاوکاری پەرلەمان هەرێم.
بارزانی لە بەشداربوینی لە کۆنگرەی (یەکێتی و دەستوور) لە هەولێر وت: فرە قسەوباس دەربارەی یەکێتی و دەستوور کریا، وەلێ ئەوەگ خوازم بویشمەی ک دەستوور میکانزمیگە ئەرا ئامانج دیاریگ.
وتیش؛ لە دەستوور خوازیمن حکومڕانی سیاسی لە هەرێم رێک بخەێد، و سەروەری یاسا بوود و گشتی لە هەرێم هەس وە ئارامی بکەێد.
بارزانی نشان دا ک پێکهاتەیل فرەیگ لە عراق دیریمن، و ئیمە باس پێکهاتەیل وە کەمینە نێکەیمن چوینکە ڕەنگینی ناوچەگە لەو مۆزائیکەسە ک هاناوی، وتیش؛ ڕەنگینی کوردستان هالە ئی پێکهاتەیلە، و بایەتە دەستوور دڵنیایی وەپیان بەێد.
وتیش؛ بایەتە دەستوور هەرێم کوردستان دڵنیایی بەێدە پێکهاتەیل، و ئەرا حزبیگ یا پێکهاتەیگ یا تایفەیگ نەوود، بەڵام ئەرا گشت کوردستانییەیل بوود، ئەراوە بایەتە وەشیوەی گشتی بوود.
بارزانی هەمیش وت؛ ئەوەسا دەس کەیمنە گامەیل نووسین دەستوور وەگەرد پەرلەمان و حکومەت هەرێم و بایەتە بوودە دەستووریگ ئومید بەێدە گشت کوردستانییەیل.
بارزانی باس ئەوەیش کرد ک حکومەت فیدڕاڵی بەندەیل تایبەت وە هەرێم کوردستان لە دەستوور جیوەجی نەکرد، و وەگەرد ئی ناکۆکیەیلە توانای خزمەتکردن خوەمان و عراقیش نەیریمن.
وتیش؛ ئەو ئەرکەیلە ک خریاسە بان گەردنمان بایەتە وەیەکەو بویمن، و بایەتە گشت بەندەیل دەستوور عراق ک پەیوەندی وە هەرێم کوردستان دیرن جیوەجی بکریەن، و دەستوور عراق ماف داگەسە کوردستان تا بوودە خاوەن دەستووریگ.
بارزانی وتیش: دەسکەفتەیل گەورەیگ وە خوین و قوربانی شەهیدەیل وەدەس هاوردیمن، وەلێ ئەوە نیە ک گرفتەیلیگ نەیریمن، و وەگەرد ئەو گرفتەیلە ک هەن، هەمیش گەشە لە چەن چینیگ دیریمن.
و نشان دا ک لە ویستکەیل فرەیگ نووڕیمن ک هەرێم کوردستان گەشەی فراوان وەگەورایگ وەخوەی دی، و بیگومان ئەیە لە یەکڕزی هێزە سیاسیەیل و پاڵپشتی گەل کوردستاتی هات، وتیش؛ لەباوەت ئاشکرایی و نەفت و ووردبینی ئەنجامەیل خاسیگ وەدەس هاوریان.
هەمیش وت؛ ئەوەسا دەستوورەگە نووسیمن باوجی بایەتە دەستووریگ بوود ک گشتی لەبانی رێک بکەفێد.
