نێچیروان بارزانی: دەرفەت ئەرا پشتسەرنان بەسیان سیاسی لە عراق هەس
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وت: دەرفەت ئەرا پشتسەرنان بەسیان سیاسی لە عراق هەس وەمەرجیگ بڕیار و خوازین لەلایەن و هیزەێل سیاسی بوود. ئەوەیش لە چەوپیکەفتنی شەوەکی ئمڕوو وەگەرد مارک هرایسون باڵیۆز بەریتانیا لە عراق وشاندیگ سیاسی وسەربازی یاوەری، وەگورەی بەیاننامیگ لە سەرۆکایەتی هەرێم کوردستان.
بەیاننامەگە دیاری کرد ک لە دیدارەگە باس شیوەیل بتەوکردن پەیوەندیەیل بەریتانیا وەگەرد عراق و هەرێم کوردستان، دویاترین نووەوبویەیل کار سیاسی لە عراق، رەوشەیل ناوخوەیی هەرێم کوردستان، جەنگ دژوە تیرۆر وجویلەیل داعش تایبەت لە ناوچەیل ١٤٠، ئاڵشتبوین کەشوهەوا وکاریگەریی لەبان عراق وهەرێم کوردستان و ناوچەگە کریا.
بەیاننامەگە وتیش: هەردوگ لایەنەگە دووپات لەبان گرنگی هەسی نووڕینیگ ورەسینەوەی هاوبەشیگ ناوبەین لایەنەیل سیاسی کرد ئەرا رەسین وە چارەیگ، ولە رایان رێککەفتن ک ئەگەر بڕیار وخوازین سیاسی بوود، دەرفەتیگ ئەرا رەسین لایەنەیل سیاسی ئەرا چارەیگ هەس تا لە بەسیان سیاسی وەپشتسەر بنریەێد.
بەیاننامەگە وتیش؛ هەردوگ لایەنەگە باس لە نیگەرانییان دەربارەی رەوشەیل شنگال و ئەو گەشەیلە لە ناوچەگە کردن ک هیشت خەڵک ئیزیدی دووارە ئاوارە بوون، و جەخت لەبان گرنگی کار هاوبەش ناوبەین حکومەت فیدراڵی عراق وحکومەت هەرێم کوردستان ئەرا گلەوداین ئارامی ئەرا ناوچەگە.
سەردان سەرۆک نێچیروان بارزانی ئەرا سلێمانی و گردەوبوینی وەرد لایەنەیل سیاسی، پەیوەندیەیل هەولێر-بەغداد، پەیوەندیەیل عراق وەگەرد هاوسایلی، وباوەتەیلیگ گرنگ لەلای هەردوگ لایەن، باسەیلیگتر بوین لە گردەوبوینەگە.
