نێچیروان بارزانی پابەندیی وە دژایەتی تونوتیژی و دەسدرویژی لەبان ژن نووەو کەێد
سەرۆک نێچیروان بارزانی لە بەیاننامەیگ رەسیە ئاژانس شەفەق نیوز وە بوونەی رووژ جەهانی دژوە تونوتیژی دژوە ژن وت: پشتگیریکردن تەواومان ئەرا هەڵمەت ١٦ رووژ دژایەتی تونوتیژی دژوە ژن کەیمن، کە وتیش: ئیمە وە زبری دژایەتی هەر جویریگ لە جویرەیل تونوتیژی دژوە دویەت ژن و دەسدرویژی لەبانیان کەیمن لە هەرکوو بویە و وە هەر دەسپیچگیگ بویە.
وتیش: لەی رووژو یاد گشت ئەو ژنەیلە کەیمن کە کەفتنە وەر ستەم ژیانیان لەوەر رەگەزیان و جیاوازییان لەلیان زەفت کریا،و هویچ نیەتوەنێد وەسف ئەو ژان گەورە بکەێد کە خانەوادە و باوگ و داڵگ ئەو قوربانیەیلە رەسیە، و تەنیا سەبوورییان ئەوەسە کە ئیمە گشتمان وەیەکەو کار کەیمن ئەرا وەدەسهاوردن دادپەروەرانە، هەمیش نرخدار ڕۆڵ پیاوەیل ئاینی و هەرکەس کەیمن کار ئەرا خاسەوکردن رەوش ژن وەهەرشیوەیگ بویە.
سەرۆک هەرێم وتیش: وەی بوونە پابەندیمان وە دژایەتی زبریگ و جددی کەیمن ئەرا گشت کارەیل تونوتیژی و دەسدرویژی لەبان ژن ومافەیلی دووپات کەیمن.
سەرۆک هەرێم کوردستان وتیش: هەمیش وەردەوام بویمن وە هەماهەنگی و کار وەگەرد لایەنەیل پەیوەندیدار لە هەرێم کوردستان و عراق و لە ئاست ناودەوڵەتی لەی چوارچیوە، و قەت لە کار وەخاتر بیناکردن کۆمەڵگایگ ئازاد و یەکسانی واز نیاریمن.
