نێچیرڤان بارزانی و وەزیر وەرگیری تورکیا دووپاتکردن بایەسە نواگیری لە فراوانبوین ململانێیەی لە ناوچەگە بکەن
سەرۆکایەتی هەرێم کوردستان ئمڕوو لە بەیاننامەیگ راگەیان، سەرۆک نێچیرڤان بارزانی ئمڕوو پیشوازیکرد لە وەزیر وەرگیری تورکیا، و سەرۆک دەسەی ئەرکان گشتیسوپای تورکیا مەتین غوراق.
لە بەیانامەگە هاتیە، لەو کۆبوینەوەیە بالیۆز تورکیا لە عراق ئامادەبویە، گفتوگوکریایە لە پەیوەنیەیل ناوەین تورکیا وعراق و هەرێم کوردستان و هاوکاری هاوبەشەیل ناوەینیان، بارودۆخ ئەمنی لە عراق و هەرێم و دویا پیشهاتەیل جەنگ و ململانی لە خوەرهەڵات و کاردانەوەیلیان.
وەپای بەیاننامەگە، هەردگلا دووپاتکردن لە گرنگی هاوکاری هاوبەش لەناوەین تورکیا و عراق و هەرێم کوردستان ئەرا پاراستن ئاشتی و ئارامی لە ناوچەگە و پاراستن ئاسایش سنووری، هەمیش هاورابوین لە پێویست بوین تەقەلایگ هەمەلایەنە ئەرا نواگیری کردن لەفراوانبوین ململانی لە خوەرهەڵات ناوڕاس.
لە بەیاننامەگە دووپاتکرد لە ئەوزەڵکردن پەیوەنیەیل ناوەین تورکیا وەرد عراق و هەرێم کوردستان لەبان بنەمای بەرژەوەنی هاوبەش و هاوسایەتی خاس و نووترین ئەوزەڵکردنەیل لە بەڕەنگاربوین تیرۆر و هەڕەشەیل داعش، و باوەتەیلیگ جی گرنگیدان هاوبەشن تەوەریگ تر بوی لە گفتوگویەیل دیدارەگە.
