لاوردن پەردە لەمل پەیکەر ئەدیب کووچکردگ شەماڵ خۆرشید لە گەرمیان.. وینە
چالاکوان سەلام خەلیفە کە یەکیگە لە برادەرەیل ئەدیبەگە، لە قسەیلی ئەرا ئاژانس شەفەق نیوز وت: ئمڕوو رسوومەیل لاوردن پەردە لەمل پەیکەر ئەدیب و زانای ئاسەواری شەماڵ خۆرشید وەڕیەو چگ، وە ئامادەبوین بنەماڵە و برادەرەیلی و بڕ فرەیگ لە مەردم و لایەنەیلیگ سیاسی و ئیداری.
وتیش: پەیکەرەگە لە ناوڕاس شار کفری دانریا، وەبوونەی یەکەم ساڵیاد کوشتنی، و وەخەرج برادەرەیلی دروس کریا، و دیاری کرد ک یادکردنەگە داناین ٦٢ نەمام لە وەردەم ماڵەگەی، و لە شوین کوشتنی وەخوەی گرێد، و سازین رسوومەیل یادکردن و بەشەوکردن کتاویگ لە ژیاننامەی.
لە باوەت ئەنجامەیل لێکۆڵینەوە لە کوشتن مامووستا شەماڵ لەوەردەم ماڵەگەی، برادەرەگەی وت: تا ئیسە لێکۆڵینەوە وەردەوامە و خەوەر لە دەسگیرکردن رانندەی ئەو ماشینە هەس کە بکوشەگە سوار کردیە، و ئیرنگە کەفتیەسە لێکۆڵینەوە، و دووپات کرد ک کوشتن مامووستا شەماڵ لەوەر نویسانن و هەڵوێستەیل نیشتمانیی وەرانەوەر بەشیگ لەو باوەتەیلە هات ک پەیوەندی وە بەرژەوەنی گشتی دیرن.
لە ٢٨ ئاب ٢٠٢٢، فەرمانبەر شەماڵ خۆرشید، کە وەناو شەماڵ ناسریاگە، کە لە وەڕیەوبەرایەتی گشتی کشتوکاڵی لە ئیدارەی گەرمیان کار کەێد، لە وەردەم ماڵەگەی وەدەس کەسەیلیگ نەناسیاگ لە کفری کوشیا.
